കംബോഡിയയുടെ തലസ്ഥാനമായ ഫ്‌നോം പെന്‍ഹിലെയില്‍ എത്തിയാല്‍ , ചെ റാറ്റിയുടെ റെസ്‌റ്റോറന്റില്‍ കയറിത്തന്നെ ഐസ്‌ക്രീം കഴിക്കണം.

വളരെ വ്യത്യസ്തമായ അനുഭവമാണ് അവിടെ നിങ്ങളെ കാത്തിരിക്കുന്നത്. ജീവനുള്ള പെരുമ്പാമ്പും തേളും തുടങ്ങി ഒട്ടേറെ ജീവികള്‍ തീന്മേശയില്‍ നിങ്ങളെ കാത്തിരിപ്പുണ്ടാകും. ഇവിടെയെത്തുന്നവരുടെ കഴുത്തിലും കൈയിലുമെല്ലാം പാമ്പും തേളും മറ്റും ഓടിപ്പാഞ്ഞു നടക്കുന്നതും കാണാം.

ഇത്തരമൊരു വ്യത്യസ്തത പരീക്ഷിച്ചത്, ഇഴജന്തുക്കളെ പേടിക്കുന്നത് തെറ്റിദ്ധാരണമൂലമാണെന്ന് ആളുകളെ ബോധ്യപ്പെടുത്താനാണെന്ന് ചെ റാറ്റി വിശദീകരിച്ചു.

ഇഴജന്തുക്കളെ പേടിയുള്ളവര്‍ക്ക് ഇവിടെ എത്തിയാല്‍ രണ്ടുണ്ട് ഗുണം. ചായയും കുടിക്കാം പേടിയും മാറ്റാം. പൂച്ച കഫേകള്‍ക്ക്പണ്ടേ പേരു കേട്ടതാണ് കംബോഡിയന്‍ ആസ്ഥാനം. എന്നാല്‍, ഫ്നോം പെന്‍ഹിലെ ആദ്യ ഇഴജന്തു കഫേയാണ് ചെ റാറ്റിയുടെ ഉടമസ്ഥതയിലുള്ളത്.

കഫേയുടെ ഭിത്തിയില്‍ നിറയെ ചില്ലുകൂടുകളില്‍ വിവിധ വലുപ്പത്തിലും നിറങ്ങളിലുമുള്ള പാമ്പുകളാണ്. തായ്‌ലാന്‍ഡില്‍ നിന്ന് ഇറക്കുമതി ചെയ്തവയാണ് എല്ലാം. കാര്യം ചെറിയൊരു 'മൃഗശാല'യാണെങ്കിലും ഇവിടെ പ്രവേശനം സൗജന്യമാണ്.

കഫേയിലേത് വ്യത്യസ്തമായ അനുഭവമാണെന്ന് ഇവിടെ എത്തുന്നവര്‍ സാക്ഷ്യപ്പെടുത്തുന്നു. അസാധാരണമായ അനുഭവമാണ് കഫേ നല്‍കുന്നത്. ഇവിടെയുള്ള ഇഴജന്തുക്കളെ ഇതിനു മുമ്പ് കണ്ടിട്ടില്ല. അവ മനോഹരമാണ് കഫേയിലെത്തിയ 22-കാരി പറഞ്ഞു.