ഇഷ്ടികചൂളയില്‍ ദിവസക്കൂലിയ്ക്ക് പണി എടുക്കുന്ന പഞ്ചാബിലെ മാണ്ഡ്വി ഗ്രാമത്തിലെ മനോജ് കുമാറിന് ലോട്ടറി അടിക്കുന്നതായി സ്വപ്‌നം കാണാനുള്ള ധൈര്യം പോലും ഉണ്ടായിരുന്നില്ല. കാരണം ഇഷ്ടികചൂളയില്‍ പണിയെടുത്താല്‍ ഒരു ദിവസം കൂലിയായി കിട്ടുന്നത് 250 രൂപയാണ്.

അത് ഉപയോഗിച്ചാണ് അച്ഛനും അമ്മയും നാല് മക്കളും അടങ്ങുന്ന കുടുംബം ഏറെ ബുദ്ധിമുട്ടി നിത്യച്ചിലവ് കഴിച്ചിരുന്നത്. ആ കാശില്‍ നിന്നും 200 രൂപ എടുത്ത് ലോട്ടറി വാങ്ങിയാല്‍ കുടുംബത്തിന്റെ ഒരുപാട് ആവശ്യങ്ങള്‍ മുടങ്ങും. അത്കൊണ്ട് എന്നെങ്കിലും തനിക്ക് ലോട്ടറി അടിക്കുമെന്നും താനും കുടുംബവും സന്തോഷമായി ജീവിക്കുമെന്നും ഉള്ള സ്വപ്‌നം പോലും അയാള്‍ക്ക് സ്വന്തമായി ഉണ്ടായിരുന്നില്ല!

പക്ഷേ അത് കഴിഞ്ഞ കഥ. ആഗസ്ത് 30 എന്ന ദിവസം അവരുടെ ജീവിതം മാറ്റിമറിച്ചു. സെപ്റ്റംബര്‍ മുതല്‍ റിയല്‍ എസ്‌റ്റേറ്റ്, ബാങ്ക് ഏജന്റുമാരുടെ ബഹളമാണ് ഇവരുടെ വീട്ടില്‍. കാരണം മനോജ് കുമാര്‍ ഒരു സ്വപ്‌നം കാണാന്‍ ധൈര്യം കാണിച്ചു!

അയല്‍ക്കാരന്റെ കൈയില്‍ നിന്ന് 200 രൂപ കടംവാങ്ങി ഒരു ലോട്ടറിടിക്കറ്റ് എടുത്തു! അത് മനോജ് കുമാറിന്റെയും ഭാര്യ രാജ് കൗറിന്റെ ജീവിതം മാറ്റിമറിച്ചു. ഇവരെടുത്ത രാഖി ബംബര്‍ ലോട്ടറിയുടെ സമ്മാനമായ ഒന്നരക്കോടിയാണ് ഇവര്‍ക്ക് അടിച്ചത്. അന്നന്നത്തെ അന്നത്തിന് കൂലിപ്പണി ചെയ്തിരുന്ന ആ സാധുകുടുംബം അങ്ങനെ കോടീശ്വരരായി.

പത്താം ക്ലാസോടെ പഠനം നിര്‍ത്തി ജോലി അന്വേഷിക്കുന്ന മൂത്ത മൂന്ന് പെണ്മക്കളോടും പഠനം പുനരാരംഭിക്കാന്‍ മനോജ് കുമാര്‍ ആവശ്യപ്പെട്ടിരിക്കുകയാണ്. ആഗ്രഹമായി കൊണ്ടുനടന്ന പോലീസ് ഉദ്യോഗമാണ് അവരുടെ ലക്ഷ്യം.

മനോജിന്റെ പിതാവ് അടുത്തിടെയാണ് ആസ്ത്മ സംബന്ധമായ രോഗത്തെ തുടര്‍ന്ന് മരിച്ചത്. സ്വരുക്കൂട്ടിയതും സമ്പാദ്യവുമെല്ലാം പിതാവിന്റെ ചികിത്സയ്ക്കായി ചിലവഴിക്കേണ്ടി വന്നു. പിതാവ് മരിക്കും മുമ്പ് ഈ ലോട്ടറി അടിച്ചിരുന്നെങ്കില്‍ ആ ജീവന്‍ രക്ഷിക്കാമായിരുന്നു എന്ന ചിന്തയും അദ്ദേഹം പങ്കുവെക്കുന്നു. ഒരു ഇഷ്ടിക ഉണ്ടാക്കിയാല്‍ 50 പൈസയാണ് കൂലി. അങ്ങനെ ദിവസേന 250 രൂപയ്ക്ക് പണിയും. ആ ജീവിതം ഒരു നിമിഷം കൊണ്ട് മാറി.