വൈപ്പിനില്‍ ദേശാടനപക്ഷികളുടെ കേന്ദ്രമായ എടവനക്കാട് താമരവട്ടത്ത് ഇക്കുറി അപൂര്‍വ അതിഥി വന്നണഞ്ഞു. ഗ്രേറ്റര്‍ ഫ്ലെമിംഗോ എന്നറിയപ്പെടുന്ന വലിയ രാജഹംസമാണ് ഇവിടത്തെ പാടശേഖരങ്ങളില്‍ എത്തിയിരിക്കുന്നത്.

അരയക്കൊക്ക്, പൂനാര എന്നീ പേരുകളിലും അറിയപ്പെടുന്ന ഇവ അപൂര്‍വമായാണു കേരളത്തില്‍ എത്താറുള്ളതെന്നു പക്ഷിനിരീക്ഷകര്‍ അഭിപ്രായപ്പെടുന്നു. ഒരു മീറ്ററോളം നീളമുള്ള കാലുകള്‍ക്കും നീണ്ട കഴുത്തിനും പുറമെ പിങ്ക് നിറം കലര്‍ന്ന കൊക്കും വെളുത്ത തൂവലുകളുമാണ് ഇവയുടെ പ്രത്യേകത.

ചിറകുകളിലെ തൂവലുകള്‍ക്കു കടുത്ത പിങ്ക് നിറമായിരിക്കും. നീണ്ടുവളഞ്ഞ കൊക്കിന്റെ അഗ്രഭാഗം കറുപ്പുനിറത്തിലായിരിക്കും. ആഫ്രിക്ക, തെക്കുകിഴക്കന്‍ ഏഷ്യ, യൂറോപ്പ് എന്നിവിടങ്ങളില്‍ നിന്നാണ് ഇവയുടെ വരവ്.

നൂറുപക്ഷികളെങ്കിലും അടങ്ങുന്ന സംഘമായിട്ടായിരിക്കും യാത്ര. ഒരു ദിവസം അഞ്ഞൂറിലേറെ കിലോമീറ്റര്‍ താണ്ടും.

വെള്ളക്കെട്ടുകളിലും ചതുപ്പു പ്രദേശങ്ങളിലും പരതി ചെറുമീനുകള്‍, കക്കകള്‍, ചെമ്മീനുകള്‍, പ്രാണികള്‍ എന്നിവയെ ആഹാരമാക്കുന്നതാണു രീതി. പക്ഷിനിരീക്ഷകനും വന്യജീവി ഫൊട്ടോഗ്രഫറുമായ എടവനക്കാട് സ്വദേശി റോമി മാളിയേക്കലാണ് ഇവയുടെ ചിത്രം പകര്‍ത്തിയത്.