ജോസ്ഗിരിക്കടുത്ത കാട്ടില് കൗതുക കാഴ്ചയൊരുക്കുന്നു ചുവന്നു തുടുത്ത മൂട്ടിപ്പഴങ്ങള്!
കണ്ണൂര് ചെറുപുഴ ജോസ്ഗിരിയില് നിന്നു മൂന്നു കിലോമീറ്റര് അകലെയുള്ള കാട്ടിനുള്ളില് മൂട്ടിപ്പഴം പഴുത്തു പാകമായി നില്ക്കുന്നത് കണ്ണിനു കൗതുക കാഴ്ച ഏകുന്നു. മൂട്ടിപ്പഴം, മൂട്ടിപ്പുളി, മൂട്ടിക്കായ്പന്, കുറുക്കന്തൂറി, കുന്തപ്പഴം, മൂട്ടിത്തൂറി തുടങ്ങിയ പേരുകളിലും ഇവ അറിയപ്പെടുന്നു.
മൂട്ടിപ്പഴമരത്തെ സാധാരണ കാണാനാവുന്നത് ദക്ഷിണേന്ത്യയിലെ നിത്യഹരിതവനങ്ങളിലാണ്. ബക്കൗറിയ കോറിട്ടിലെന്സിസ് എന്ന ശാസ്ത്രീയ നാമത്തിലാണ് ഈ സസ്യം അറിയപ്പെടുന്നത്.
പഴയ കാലങ്ങളില് ആദിവാസി വിഭാഗത്തില്പെട്ടവരും നായാട്ടിനു കാട്ടില് കയറുന്നവരുമാണ് ഈ പഴം ഉപയോഗിച്ചുവന്നിരുന്നത്. അടുത്ത കാലത്താണ് ജോസ്ഗിരിയിലെ ചിലര് മൂട്ടിപ്പഴത്തിന്റെ ഗുണം മനസ്സിലാക്കിയത്.
മരത്തിന്റെ തടിയിലാണ് പൂക്കള് വിരിയുന്നത്. ഡിസംബര്- ജനുവരി മാസങ്ങളിലാണ് പൂവിടുന്നത്. ദളങ്ങളില്ലാത്ത പൂക്കള്ക്കു ചുവപ്പു നിറമാണ്. പഴുക്കുമ്പോള് പഴത്തിന്റെ നിറം കടുംചുവപ്പാകും. മറ്റുള്ള വൃക്ഷങ്ങളെ പോലെ ഇതിന്റെ ശിഖരങ്ങളില് അധികം പഴം ഉണ്ടാകാറില്ല.
പകരം വൃക്ഷത്തിന്റെ തായ്ത്തടിയുടെ മൂട്ടില് നിന്നും മുകളിലേക്ക് പഴങ്ങള് തൂങ്ങി കിടക്കുകയാണ് ചെയ്യുന്നത്. ഇതുകൊണ്ടാണ് ഈ വൃക്ഷത്തിനു മൂട്ടിപ്പഴമെന്ന പേരുവന്നത്. പുളിപ്പും മധുരവുമുള്ളതുമാണ് ഈ ഫലം. മലയണ്ണാന്, കുരങ്ങ്, കരടി തുടങ്ങിയ മൃഗങ്ങളുടെ ഇഷ്ടഭക്ഷണം കൂടിയാണിത്.
റംബൂട്ടാന്റെ ഫലവുമായി ഇതിന് ഏറെ സാമ്യമുണ്ട്. കട്ടിയുള്ള തോട് പൊളിച്ച് അകത്തുള്ള ജെല്ലി പോലെയുള്ള ഭാഗമാണ് ഭക്ഷിക്കുന്നത്. ഇതിന്റെ തോടു കൊണ്ട് അച്ചാര് ഉണ്ടാക്കാനും സാധിക്കും. ഉദരരോഗത്തിനു മൂട്ടിപ്പഴം ഉത്തമമാണെന്നു പറയപ്പെടുന്നു.
https://www.facebook.com/Malayalivartha
