ഇന്നത്തെ റഷ്യയിലെ വൈബോര്‍ഗ് നഗരത്തിനു സമീപം, 725 വര്‍ഷം മുന്‍പ് 1293-ല്‍ നിര്‍മിച്ചതെന്നു കരുതുന്ന ഒരു കോട്ടയും കൊട്ടാരവും ഇപ്പോള്‍ മാധ്യമശ്രദ്ധ നേടുന്നു. അതിനെക്കുറിച്ച് പതിനാറാം നൂറ്റാണ്ടില്‍ തയാറാക്കിയ ചില രേഖകളുണ്ട്. അതു പരിശോധിച്ച ഗവേഷകര്‍ക്ക് കൗതുകകരമായി തോന്നിയത് ഒറ്റക്കാര്യമാണ്. ആ വന്‍ കോട്ടയ്ക്കുള്ളില്‍ ഒരു 'സീക്രട്ട് ഹൗസു'ണ്ട്. കോട്ടയ്ക്കു താഴെ എവിടെയോ ആണത്.

പിരിയണ്‍ ഗോവണികളിറങ്ങി താഴേക്കു പോകണമെന്നാണ് എഴുതിയിരിക്കുന്നത്. ഒരു രഹസ്യ സങ്കേതം കൂടിയായിരുന്നു അത്. സീക്രട്ട് ഹൗസില്‍ നിന്ന് 'തീരത്തേക്ക്' ഒരു വഴിയുണ്ടെന്നും എഴുതിയിരുന്നു. എങ്കിലും ആ സൂചനകള്‍ക്കു പിന്നാലെ പോകുവാന്‍ പുരാവസ്തുഗവേഷകര്‍ ആരും മുതിര്‍ന്നില്ല. അതുകൊണ്ട് റഷ്യയിലെ വൈബോര്‍ഗ് കോട്ടയുടെ ഈ രഹസ്യം ഇത്രയും കാലം അജ്ഞാതമായി തുടര്‍ന്നു.

ഗള്‍ഫ് ഓഫ് ഫിന്‍ലന്‍ഡ് കടലില്‍ സ്ഥിതി ചെയ്യുന്ന ദ്വീപില്‍ നിന്ന് തീരത്തേക്കുള്ള വഴിയായിരിക്കും പുരാതന രേഖയിലുണ്ടായിരുന്നതെന്നാണു ഗവേഷകര്‍ കരുതുന്നത്. സ്വീഡിഷുകാരാണ് ഈ കോട്ട നിര്‍മിച്ചത്. കോട്ട കേന്ദ്രീകരിച്ചു രൂപപ്പെട്ട നഗരമായതിനാലാണ് വൈബോര്‍ഗ് സിറ്റിക്ക് ആ പേരു ലഭിച്ചതും.

നൂറ്റാണ്ടുകളോളം വിസ്മൃതിയിലായിരുന്ന സീക്രട്ട് ഹൗസ് കഴിഞ്ഞ മാസമാണ് ഗവേഷകര്‍ കണ്ടെത്തിയത്. 1935 മുതല്‍ വിബോര്‍ഗ് കോട്ടയെപ്പറ്റി ഗവേഷണം നടക്കുന്നുണ്ട്. എന്നാല്‍ പലതും പാതിവഴിയില്‍ നിന്നുപോയി.

കോട്ട തകര്‍ന്നു വീഴുമെന്ന അവസ്ഥയായപ്പോഴാണ് മ്യൂസിയമാക്കി മാറ്റാന്‍ അടുത്തിടെ 2.5 കോടി ഡോളറിലേറെ ചെലവിട്ട് അറ്റകുറ്റപ്പണി ആരംഭിച്ചത്. കോട്ടയ്ക്കുള്ളിലെ രഹസ്യങ്ങളോരോന്നായി പുറത്തു വരുന്നത്, അതിന്റെ ഭാഗമായുള്ള പരിശോധനയിലാണ്.

എന്നാല്‍ രഹസ്യത്തിനുള്ളില്‍ മറ്റൊരു രഹസ്യമാണ് അവരെ കാത്തിരുന്നത്! ആ സീക്രട്ട് ഹൗസില്‍നിന്നും മെഡീവല്‍ കാലഘട്ടത്തിലെ ഒരു തരം ബോര്‍ഡ് ഗെയിം അവര്‍ക്കു ലഭിച്ചു. തുടക്കത്തില്‍ കളിമണ്ണു കൊണ്ടുള്ള വെറുമൊരു ഫലകം എന്നാണ് അതിനെപ്പറ്റി കരുതിയത്. പ്രത്യേകതരം ഗെയിമിനുള്ള ബോര്‍ഡാണ് അതെന്ന് സൂക്ഷ്മപരിശോധനയിലാണു മനസ്സിലായത്.

ചെസില്‍ കരുക്കള്‍ക്കു വേണ്ടി കളിക്കുന്നതു പോലെ 'മെന്‍' എന്ന ചെറുകല്‍ കഷ്ണങ്ങള്‍ക്കു വേണ്ടിയായിരുന്നു ഈ കളിയെന്നാണു കരുതുന്നത്. നൂറ്റാണ്ടുകള്‍ പഴക്കമുള്ള ഗെയിമാണതെന്നും ഗവേഷകര്‍ തിരിച്ചറിഞ്ഞു, റോമന്‍ സാമ്രാജ്യത്തിന്റെ പ്രിയപ്പെട്ട മത്സരങ്ങളിലൊന്നും ആയിരുന്നു ഇതെന്നാണു നിഗമനം. 'കൗബോയ് ചെക്കേഴ്‌സ്' എന്നും ഇതിനു വിളിപ്പേരുണ്ട്. വൈബോര്‍ഗ് കാസിലില്‍ നിന്ന് ഇന്നേവരെ കണ്ടെത്തിയതില്‍ ഏറ്റവും ആശയക്കുഴപ്പം സമ്മാനിക്കുന്ന കണ്ടെത്തല്‍ എന്നാണ് ഗെയിമിനെ വൈബോര്‍ഗ് മ്യൂസിയത്തിലെ ഗവേഷകര്‍ വിശേഷിപ്പിച്ചത്.

'ടാബ്ലെയ്' എന്നാണ് ഗവേഷകര്‍ ഇതിനു നല്‍കിയ പേര്. രണ്ടു കളിക്കാരുണ്ടാകും. ഒരാളുടെ 'മെന്നിനെ' മറ്റൊരാള്‍ സ്വന്തമാക്കും വിധമാണ് ഗെയിം. കളത്തിലെ ഒരു നിരയില്‍ മൂന്നു 'മെന്‍' ഒരുമിച്ചു നിന്നാല്‍ അതിനെ ഒരു 'മില്‍' ആയി കണക്കാക്കാം. ഒരു മില്‍ കിട്ടുന്നവര്‍ക്ക് എതിരാളിയുടെ ഒരു 'മെന്നി'നെ ലഭിക്കും. രണ്ടു മെന്‍ മാത്രം ഏതെങ്കിലും ഭാഗത്ത് അവശേഷിക്കുമ്പോള്‍ അയാളെ തോറ്റതായി പ്രഖ്യാപിക്കും. പിന്നീട് അയാള്‍ക്ക് 'മില്‍' രൂപപ്പെടുത്താന്‍ പറ്റില്ലല്ലോ! ഗെയിമിനു പിന്നാലെ 'സീക്രട്ട് ഹൗസിലെ' കൂടുതല്‍ വിവരങ്ങള്‍ തേടിയുള്ള അന്വേഷണത്തിലാണ് ഗവേഷകര്‍.