വെള്ളരിക്കുണ്ട് കമ്മാടക്കോളനിയിലെ കോളനി മൂപ്പത്തി കാരിച്ചിയമ്മയുടെ സംസാരശേഷിയും കാഴ്ചശക്തിയും നഷ്ടമായത് പ്രത്യേകിച്ച് ഒരു കാരണങ്ങളുമില്ലാതെയായിരുന്നു. പെട്ടെന്നൊരു ദിവസം സംസാരിക്കാന്‍ കഴിയാതെ ആകുക ആയിരുന്നു. ക്രമേണ കാഴ്ചശക്തിയും ഇല്ലാതാകുകയായിരുന്നു. അന്നത് ആ ചുറ്റുപാടുള്ള എല്ലാവരേയും ഏറെ അതിശയിപ്പിച്ചു.

എന്നാല്‍ 20 വര്‍ഷത്തിന് ശേഷമുള്ള ഒരു പ്രഭാതം ആ നാട്ടുകാര്‍ക്ക് മറ്റൊരു വിസ്മയം കൊണ്ടുവന്നു. കഴിഞ്ഞ ദിവസം പുലര്‍ച്ചെ ഇളയമകള്‍ ശാന്ത എഴുന്നേറ്റത്, സംസാരശേഷി നഷ്ടപ്പെട്ടു എന്ന് കരുതിയ മാതാവ് മൂളിപ്പാട്ട് പാടുന്നത് കേട്ടുകൊണ്ടായിരുന്നു. ഇത്രയും കാലം മിണ്ടാതിരുന്ന അമ്മ നാടന്‍പാട്ടും കഥകളും പറയാന്‍ തുടങ്ങിയതോടെ അവര്‍ക്ക് വിസ്മയമായി.

തുടര്‍ന്നായിരുന്നു സംഭവം മലയോരത്ത് വാര്‍ത്തയായി മാറിയത്. ദശകങ്ങള്‍ക്ക് മുമ്പ് സംസാരശേഷി പോയ കോളനി മൂപ്പത്തി കാരിച്ചിയമ്മ സംസാരിക്കുന്നതിന്റെ വിശേഷം അതിശയത്തോടെയാണ് കമ്മാടക്കോളനിയിലുള്ളവര്‍ കേട്ടത്. ഇതോടെ കോളനിയിലുള്ളവര്‍ മലമുകളിലെ ഇവര്‍ താമസിച്ചിരുന്ന വീട്ടിലേക്കോടിയെത്തി.

ഇപ്പോള്‍ സമീപവാസികള്‍ കാരിച്ചിയമ്മയെ കാണാനായി വീട്ടിലേക്ക് എത്തുകയാണ്. ഇത്രയും കാലം എന്താണ് മിണ്ടാതിരുന്നതെന്ന ചോദ്യത്തിന് സംസാരിക്കാന്‍ കഴിയുമായിരുന്നില്ല എന്നായിരുന്നു ഇവര്‍ നല്‍കിയ മറുപടി.

ഇപ്പോള്‍ വരുന്നവരോട് സംസാരിക്കുകയും അവര്‍ ചോദിക്കുന്ന ചോദ്യങ്ങള്‍ക്ക് മറുപടി പറയുകയുമാണ് കാരിച്ചിയമ്മ ചെയ്തു കൊണ്ടിരിക്കുന്നത്. നാടന്‍പാട്ടുകള്‍ പാടുകയും കഥപറയുകയുമൊക്കെ ചെയ്യുന്നുണ്ട്. 75 കാരിയായ കാരിച്ചിയമ്മയ്ക്ക് പരസഹായം കൂടാതെ വെളിയില്‍ പോലും ഇറങ്ങാന്‍ കഴിയാത്ത സ്ഥിതിയും വന്നിരുന്നു. ഭര്‍ത്താവ് പുങ്ങംചാല്‍ കുഞ്ഞിക്ക നാലു വര്‍ഷം മുമ്പായിരുന്നു മരണമടഞ്ഞത്.