തന്റെ സ്മാര്ട്ട് ഫോണ് കവര്ന്നെടുത്തവരെ പിന്തുടര്ന്ന് അത് വീണ്ടെടുത്ത് ലക്ഷ്മിക്കുട്ടിയമ്മ സ്മാര്ട്ട് ആയി!
മൊബൈല് മോഷ്ടാക്കളെ പിന്നാലെയെത്തി പിടികൂടിയ 70 വയസ്സുകാരി ഏറ്റുമാനൂരില് താരമായി. തന്റെ ഫോണുമായി കടന്ന കുട്ടിമോഷ്ടാക്കളെ ഏറ്റുമാനൂര് പട്ടിത്താനം നിരപ്പേല് ലക്ഷ്മിക്കുട്ടിയമ്മ പിന്തുടര്ന്നു പിടികൂടുകയായിരുന്നു.
പട്ടിത്താനം ചുമടുതാങ്ങി ജംക്ഷന് സമീപമുള്ള പാറക്കുളത്തില് ഇന്നലെ വൈകിട്ട് 5-ന് ആയിരുന്നു സംഭവം. ഫോണ് കുളത്തിന്റെ കരയില് വച്ചശേഷം തുണികള് കഴുകുന്നതിനിടെ മറുകരയില് ചൂണ്ടയിടുകയായിരുന്ന 3 വിദ്യാര്ഥികള് പരിചയ ഭാവം കാട്ടി ലക്ഷ്മിക്കുട്ടിയമ്മയുടെ അടുത്തെത്തുകയും വില കൂടിയ ഫോണുമായി കടന്നു കളയുകയുമായിരുന്നു.
ഫോണ് കാണാതായതോടെ സംശയം തോന്നിയ ലക്ഷ്മിക്കുട്ടിയമ്മ കുട്ടികള് പോയ ദിശയിലേക്ക് ഓടി. വഴിയില് കണ്ടവരോടെല്ലാം കുട്ടികളുടെ അടയാളങ്ങള് ചോദിച്ച് മനസ്സിലാക്കി 2 കുട്ടികളെ കണ്ടെത്തി. ഫോണ് എടുത്തില്ലെന്ന് വിദ്യാര്ഥികള് പറഞ്ഞെങ്കിലും പിന്നാലെ പൊലീസ് വരുന്നുണ്ടെന്ന് പറഞ്ഞ് ലക്ഷ്മിക്കുട്ടിയമ്മ വിരട്ടിയതോടെ ഇവരിലൊരാള് വീട്ടിലെത്തി ഫോണെടുത്തു നല്കി.
എറണാകുളത്തുള്ള മകന് അമ്മയോട് വിഡിയോ കോളിലുടെ സംസാരിക്കാനാണ് സ്മാര്ട്ട് ഫോണ് വാങ്ങി നല്കിയത്. വിദ്യാര്ഥികളായതിനാല് കേസ് കൊടുക്കുന്നില്ലെന്നു ലക്ഷ്മിക്കുട്ടിയമ്മ പറഞ്ഞു.
https://www.facebook.com/Malayalivartha