യു എസ് സംസ്ഥാനങ്ങളെ ഒന്നടങ്കം ഭീതിപ്പെടുത്തിയ ഫ്‌ലോറന്‍സ് ചുഴലിക്കാറ്റും തുടര്‍ന്നുണ്ടായ പേമാരിയും ന്യൂസ് ചാനലുകളും സോഷ്യല്‍മീഡിയയും കഴിഞ്ഞ രണ്ടു മൂന്നു ദിവസമായി ലൈവായി റിപ്പോര്‍ട്ട് ചെയ്തിരുന്നു.

അത്യാധുനിക ടെക്‌നോളജിയും ഗ്രാഫിക്‌സ് സാധ്യതകളുമെല്ലാം കഴിഞ്ഞ ദിവസങ്ങളില്‍ ന്യൂസ് റൂമുകളില്‍ പരീക്ഷിക്കുന്നതും കണ്ടു.

ഇതില്‍ ഏറെ അദ്ഭുതപ്പെടുത്തിയ വെര്‍ച്വല്‍ ന്യൂസ് റൂം 'ദ വെതര്‍' ചാനലിന്റേതായിരുന്നു.

പേമാരി പെയ്യുന്ന പ്രദേശങ്ങളില്‍ രണ്ട് അടി മുതല്‍ 13 അടി വരെ വെള്ളം ഉയരുമെന്നായിരുന്നു നാഷണല്‍ ഹരിക്കെയിന്‍ സെന്റര്‍ നല്‍കിയ മുന്നറിയിപ്പ്.

അങ്ങനെ സംഭവിച്ചാല്‍ നഗരത്തിലെ റോഡുകള്‍ക്കും വീടുകള്‍ക്കും വാഹനങ്ങള്‍ക്കും എന്തായിരിക്കും സംഭവിക്കുക എന്ന് വെര്‍ച്വല്‍ ന്യൂസ് റൂമിലിരുന്ന് അവതരിപ്പിക്കുന്ന വിഡിയോ സോഷ്യല്‍മീഡിയ ഏറ്റെടുത്തു കഴിഞ്ഞു. യുട്യൂബില്‍ ഈ വിഡിയോ വ്യൂസ് 18 ലക്ഷം കടന്നു. 

മിക്‌സഡ് റിയാലിറ്റിയുടെ സാധ്യതകളെ ഉപയോഗിച്ച് പ്രളയം മൂന്ന് അടി, ആറ് അടി, ഒമ്പത് അടി എന്നിങ്ങനെ വ്യത്യസ്ഥ നിലയിലെത്തുമ്പോള്‍ എന്തെല്ലാം അപകടങ്ങള്‍ പ്രതീക്ഷിക്കാമെന്നാണ് റിപ്പോര്‍ട്ടര്‍ വിശദീകരിക്കുന്നത്. നദികള്‍ കരകവിഞ്ഞതോടെ തീരമേഖലകളിലെ പട്ടണങ്ങള്‍ മുങ്ങി. വ്യാപകമായി മരങ്ങള്‍ കടപുഴകി. അഞ്ചുലക്ഷത്തോളം വീടുകളില്‍ വൈദ്യുതി മുടങ്ങി. കനത്ത മഴ വ്യാപക നാശമുണ്ടാക്കിയെങ്കിലും ചുഴലിക്കാറ്റ് ദുര്‍ബലമായി തീരമേഖല കടന്നു.

കഴിഞ്ഞയാഴ്ച യുഎസ് തീരത്തേക്ക് അടുക്കുമ്പോള്‍ അതീവ അപകടസാധ്യത സൂചിപ്പിക്കുന്ന കാറ്റഗറി 4-ല്‍ ആയിരുന്ന ഫ്‌ലോറന്‍സ് ചുഴലിക്കാറ്റ് ക്രമേണ ശക്തി കുറഞ്ഞ് ഇന്നലെയായപ്പോള്‍ കാറ്റഗറി 1-ലേക്കു താണു. ഇരു കാരലൈനകള്‍, വെര്‍ജീനിയ എന്നിവിടങ്ങളില്‍ 17 ലക്ഷത്തോളം പേരെ കനത്ത മഴ മൂലമുള്ള വെള്ളപ്പൊക്കം ദുരിതത്തിലാക്കിയിട്ടുണ്ട്. വരുംദിവസങ്ങളിലും കനത്ത മഴ തുടരുമെന്നാണു കാലാവസ്ഥാ മുന്നറിയിപ്പ്.