ജാപ്പനീസ് ശതകോടീശ്വരന്‍ യുസാകു മെയ്‌സവ ചന്ദ്രനിലേക്കുള്ള ആദ്യ വിനോദസഞ്ചാരി. 2023-ല്‍ ചന്ദ്രനിലേക്ക് സ്‌പേസ് എക്‌സ് നടത്തുന്ന വിനോദയാത്രാ പദ്ധതിയിലെ ആദ്യ വ്യക്തിയെ സ്ഥാപകന്‍ എലോണ്‍ മസ്‌ക് ഇന്നലെയാണ് പ്രഖ്യാപിച്ചത്. 1972-ലെ അമേരിക്കയുടെ അപ്പോളോ ദൗത്യത്തിനുശേഷം ചന്ദ്രനിലേക്കു പോകുന്ന ആദ്യ വ്യക്തിയാണ് നാല്‍പത്തിരണ്ടുകാരനായ മെയ്‌സവ. ചരിത്രപ്രധാനമായ ഈ തീരുമാനത്തിലേക്ക് കടക്കാന് മെയ്‌സവ എത്ര തുക ചെലവാക്കിയെന്ന് പ്രസിദ്ധപ്പെടുത്തിയിട്ടില്ല. ആറ് അല്ലെങ്കില്‍ എട്ട് കലാകാരന്മാരെയും തന്റെയൊപ്പം ചന്ദ്രനിലേക്ക് കൂട്ടാനാണ് അദ്ദേഹത്തിന്റെ പദ്ധതി.കുട്ടിക്കാലത്ത് ചന്ദ്രനെ ഏറെ ഇഷ്ടപ്പെട്ടിരുന്ന തനിക്ക് ഇതൊരു സ്വപ്നസാക്ഷാത്കാരമാണെന്ന് കലിഫോര്‍ണിയയിലെ സ്‌പേസ്എക്‌സ് ആസ്ഥാനത്ത് നടന്ന ചടങ്ങില്‍ മെയ്‌സവ പറഞ്ഞു.

ജപ്പാനിലെ ഏറ്റവും വലിയ ഓണ്‍ലൈന്‍ ഫാഷന്‍ മാളിന്റെ ചീഫ് എക്‌സിക്യൂട്ടീവ് ആയ മെയ്‌സവ ഫോബ്‌സിന്റെ ജപ്പാനിലെ ധനികരുടെ പട്ടികയില്‍ 18-ാം സ്ഥാനത്തായിരുന്നു. മോഡേണ്‍ ആര്‍ട്ടിലും മെയ്‌സവയ്ക്ക് ഏറെ താത്പര്യമുണ്ട്. അതുകൊണ്ടുതന്നെയാണ് കലാകാരന്മാരെ തന്റെയൊപ്പം ചന്ദ്രനിലേക്കു പോരാന്‍ അദ്ദേഹം ക്ഷണിക്കുന്നത്. തിരികെയെത്തുമ്പോള്‍ യാത്രയില്‍ നിന്ന് പ്രചോദനം ഉള്‍ക്കൊണ്ട് എന്തെങ്കിലുമൊരു സൃഷ്ടി ആവശ്യപ്പെടാനാണ് തീരുമാനം. നിലവില്‍ ഇന്നുവരെ നാസയുടെ 24 സഞ്ചാരികള്‍ മാത്രമേ ഭൂമിയുടെ ഭ്രമണപഥത്തിന് പുറത്ത് കടന്നിട്ടുള്ളൂ. അപ്പോളോ യുഗമായിരുന്ന 60-70 കാലഘട്ടത്തിലായിരുന്നു അത്. 12 പേര്‍ ചന്ദ്രന്റെ ഉപരിതലത്തിലൂടെ നടന്നിട്ടുമുണ്ട്.

ആദ്യ സ്‌പേസ് ടൂറിസ്റ്റ് എന്ന പേര് അമേരിക്കന്‍ ബിസിനസുകാരനായ ഡെന്നിസ് ടിറ്റോയ്ക്കാണ്. 2001-ല്‍ രണ്ടു കോടി ഡോളര്‍ നല്‍കി റഷ്യന്‍ പേടകത്തില്‍ അദ്ദേഹം അന്താരാഷ്ട്ര ബഹിരാകാശനിലയത്തില്‍ എത്തി. ബിഗ് ഫാല്‍ക്കണ്‍ റോക്കറ്റാണ് (ബിഎഫ്ആര്‍ ) ദൗത്യത്തിനായി ഉപയോഗിക്കുക. മനുഷ്യരെ വഹിക്കാനുള്ള ശേഷിയുള്ള ഈ റോക്കറ്റ് വികസിപ്പിച്ചെടുക്കാന്‍ അഞ്ചുവര്‍ഷംകൂടി കാത്തിരിക്കണം. ചരിത്രത്തിലെ ഏറ്റവും കരുത്തുള്ള റോക്കറ്റ് എന്ന വിശേഷണത്തോടെ 2016-ലാണ് ബിഎഫ്ആര്‍ പ്രഖ്യാപിച്ചത്. അഞ്ചു പതിറ്റാണ്ടുകള്‍ക്ക് മുമ്പ് അപ്പോളോ ദൗത്യങ്ങള്‍ക്ക് ഉപയോഗിച്ചിരുന്ന സാറ്റണ്‍ വി മൂണ്‍ റോക്കറ്റിനേക്കാളും കരുത്തുള്ള റോക്കറ്റായിരിക്കും ബിഎഫ്ആര്‍.