ഹാരിസണ്‍സ് മലയാളം ലിമിറ്റഡിന്റെ നേതൃത്വത്തില്‍ തേയിലയുടെ പാരമ്പര്യവും ചരിത്രവും ഉള്‍പ്പെടുത്തി പൊഴുതന അച്ചൂരില്‍ വയനാട്ടിലെ ആദ്യ ടീ മ്യൂസിയം പ്രവര്‍ത്തനം ആരംഭിച്ചു. 1995-ല്‍ അഗ്‌നിക്കിരയായ പഴയ തേയില ഫാക്ടറി നവീകരിച്ചാണ് മ്യൂസിയം സജ്ജീകരിച്ചിരിക്കുന്നത്. 4000 ചതുരശ്ര അടിയില്‍ മൂന്നു നിലകളിലായാണ് മ്യൂസിയം.

തേയില മേഖലയില്‍ ഇന്ത്യയുടെയും വയനാടിന്റെയും ചരിത്രം, ആദ്യ കാലങ്ങളില്‍ തേയില സംസ്‌കരിക്കാനും മറ്റും ഉപയോഗിച്ചിരുന്ന പഴയ യന്ത്രങ്ങള്‍, ആദ്യകാല ഫോട്ടോകള്‍ എന്നിവയാണ് മ്യൂസിയത്തിലുള്ളതെന്ന് എച്ച്എംഎല്‍ ഡപ്യൂട്ടി ജനറല്‍ മാനേജര്‍ (ഓപറേഷന്‍സ്) മെര്‍ലിന്‍ ജിയോ, എച്ച്എംഎല്‍ വയനാട് ഗ്രൂപ്പ് മാനേജര്‍ ബെനില്‍ ജോണ്‍ എന്നിവര്‍ അറിയിച്ചു.

ഇന്ത്യയിലെ തേയില വ്യവസായത്തിന്റെ പരിണാമം തെളിയിക്കുന്ന 100 വര്‍ഷത്തെ തേയിലത്തോട്ടങ്ങളുടെ പാരമ്പര്യവും അവയുടെ സവിശേഷതകളുമാണ് ഒന്നാം നിലയില്‍ ക്രമീകരിച്ചിട്ടുള്ളത്.

തേയില വ്യാപാരത്തിന്റെ ചരിത്രപരമായ പ്രാധാന്യം വിശദീകരിക്കുന്ന കരകളും സമുദ്ര മാര്‍ഗങ്ങളും ഉള്‍പ്പെടുന്ന ഭൂപടം, തേയില സംബന്ധിച്ച രസകരമായ വസ്തുതകളും ഇന്ത്യയിലെ തേയില വ്യാപാരത്തിന് പ്രേരകമായ ഘടകങ്ങളും ബോസ്റ്റണ്‍ ടീ പാര്‍ട്ടി സംബന്ധിച്ച ചരിത്രപരമായ കാരണങ്ങളും അച്ചൂര്‍ പ്രദേശത്തിന്റെ മാതൃകയും പ്രദര്‍ശിപ്പിച്ചിട്ടുണ്ട്.

പഴയകാല യന്ത്രങ്ങളുടെ ശേഖരമാണ് രണ്ടാം നിലയിലുള്ളത്. വിവിധയിനം ചായകള്‍ രുചിച്ചറിയാനുള്ള സൗകര്യവും ടീ ബാറും ഉള്‍പ്പെടുന്നതാണ് മൂന്നാം നില. ടിക്കറ്റ് മുഖേനയാണ് പ്രവേശനം. എട്ടു മുതല്‍ 12 വയസ്സു വരെയുള്ള കുട്ടികള്‍ക്ക് 30 രൂപയും മുതിര്‍ന്നവര്‍ക്കു 50 രൂപയുമാണ് പ്രവേശന ഫീസ്. രാവിലെ 9 മുതല്‍ വൈകിട്ട് 6 വരെയാണ് പ്രവേശനം.