മരങ്ങള്‍ മുറിച്ച് വീട് പണിയുന്നവരുടെ ഇടയില്‍ തികച്ചും വ്യത്യസ്തനായ കുന്നപ്പള്ളി മാത്യുവിന്റെ (മാത്തന്റെ) പുതിയ വീട്ടില്‍ പക്ഷികള്‍ക്കും മറ്റു ജീവികള്‍ക്കും സുഖമായി താമസിക്കാം. പ്രകൃതി സൗഹൃദപരമായാണ് മാത്യു തന്റെ വീട് നിര്‍മിച്ചത്. പരസ്യചിത്രക്കാരനായ കുന്നപ്പള്ളി മാത്യുവിന്റെ വീട്ടില്‍ മാവും ഞാവലും പുറത്തല്ല, വീടിന്റെ അകത്താണ്.

വീടിന്റെ നടുമുറ്റത്താണ് മരങ്ങള്‍ സുഖകരമായ ആവാസവ്യവസ്ഥ പകര്‍ന്ന് തരുന്നത്. ഒരു കമ്പ് പോലും മുറിക്കാതെയാണ് മരങ്ങള്‍ വീടിന്റെ അകത്തുള്ളത്. വീട്ടുകാര്‍ക്കൊപ്പം കുരുവി, കുയില്‍, മൂങ്ങ, അണ്ണാന്‍, മാടത്ത തുടങ്ങിയവയൊക്കെയും ഇവിടെ ജീവിക്കുന്നു.

ഞാവല്‍പ്പഴം ഭക്ഷിച്ച് ചില്ലകളില്‍ കൂടുകൂട്ടി വീട്ടുകാരുമായി ഇടപഴകുകയാണ് ഇവിടുത്തെ അതിഥികള്‍. വീട്ടുപകരണങ്ങളിലും ഇദ്ദേഹം, പഴമയുടെ ചാരുത നിലനിര്‍ത്തുകയാണ്. ആട്ടുകട്ടില്‍, ദിവാന്‍കോട്ട്, പഴയ രീതിയിലുള്ള കസേരകള്‍, റാച്ചോ മോഡല്‍ അലമാരകള്‍, സപ്രമഞ്ച കട്ടില്‍ എന്നിവ വീടിന്റെ പ്രത്യേകതയാണ്.

വീടിന്റെ മുന്‍ വാതില്‍ ഗ്ലാസുകൊണ്ടാണ് നിര്‍മിച്ചിരിക്കുന്നതിനാല്‍ കാറ്റും മഴയും വെയിലും മഞ്ഞും എല്ലാം എത്തുന്നത് ഒരു തടസ്സമില്ലാതെ കാണാം. വീടിന്റെ മാതൃക രൂപകല്‍പന ചെയ്തിരിക്കുന്നതില്‍ മാത്യുവിന്റെ ഭാര്യ രഞ്ചുമാത്യുവിനും പങ്കുണ്ട്. പരസ്യകലയിലൂടെ പ്രശസ്തനായ മാത്യുപോളിന്റെ ജേഷ്ഠപുത്രനാണ് കെ.ജി.മാത്യു.

15 വര്‍ഷമായി മാത്യു മാത്തന്‍ പരസ്യകലയിലും ഫോട്ടോഗ്രഫിയിലും ശ്രദ്ധേയനാണ്. ജയലക്ഷ്മി, ജോസ് ആലുക്കാസ്, ആലപ്പാട്, ഐ.ടി.ഡി, ബിഗ്ബസാര്‍ തുടങ്ങി പ്രശസ്തസ്ഥാപനങ്ങളുടെ പല പരസ്യചിത്രങ്ങളും ഫോട്ടോകളും ഇദ്ദേഹം സംവിധാനം ചെയ്തതാണ്. വസ്ത്രവില്‍പനശാലയായ പോത്തീസിന്റെ പരസ്യചിത്രീകരണവും ഈ വീട്ടിലാണ് നടത്തപ്പെട്ടിട്ടുള്ളത്.

2016-ല്‍ കുമളിയില്‍ ഹില്‍സ് ആന്‍ഡ് ഹ്യൂസ് എന്ന റിസോര്‍ട്ടിന്റെ രൂപകല്‍പ്പനയ്ക്ക് ഇദ്ദേഹത്തിന് സൗത്ത് ഏഷ്യന്‍  അവാര്‍ഡ് ലഭിച്ചിട്ടുണ്ട്.

മാത്യുവിന്റെ ഭാര്യ രഞ്ചുമാത്യു എറണാകുളം ഡി.ടി.സി. ഓഫീസില്‍ ഉദ്ദ്യോഗസ്ഥയാണ്. മക്കള്‍ നിസയും ഈഥയും വിദ്യാര്‍ഥികളാണ്. എറണാകുളം കേന്ദ്രീകരിച്ച് ഒരു ആര്‍ക്കിടെക്ച്ചറല്‍ ഇന്റീരിയര്‍ ആന്‍ഡ് കണ്‍സെപ്റ്റ് ഡെവലപ്പിങ് സ്ഥാപനവും ഇദ്ദേഹം നടത്തുന്നുണ്ട്.