കിടങ്ങൂര് കാവാലിക്കടവിന് പ്രളയം സമ്മാനിച്ചതൊരു 'ബീച്ച്'!
പ്രളയദിനത്തില് കലിതുള്ളിയെത്തിയ മീനച്ചിലാറിന്റെ തീരത്ത്, കിടങ്ങൂര് കാവാലിക്കടവില് ഇരുന്നൂറോളം മീറ്റര് നീളത്തിലും നൂറുമീറ്റര് വീതിയിലുമായി അരയേക്കറോളം ഭാഗത്താണ് പഞ്ചസാര മണല് അടിഞ്ഞു കൂടിയത്. പ്രകൃതി ഒരുക്കിയ മണല്തിട്ടയില് ഇപ്പോള് സഞ്ചാരികളുടെ തിരക്കാണ്.
'കടന്നിരിക്കാം നമുക്കീ കാവാലിപ്പുഴകടവില്' എന്ന പദ്ധതിയിലൂടെ പ്രകൃതി സംരക്ഷകനും ഫോട്ടോഗ്രാഫറുമായ രമേഷ് കിടങ്ങൂരിന്റെ നേതൃത്വത്തില് ഈ പഞ്ചസാര മണല്തിട്ട ഇന്ന് ഒരു മിനി ബീച്ചാക്കി മാറ്റയിരിക്കുകയാണ്. ഇതര ജില്ലകളില്നിന്ന് പോലും കുടുംബസമേതമാണ് ആളുകള് ഇവിടെ സായാഹ്നം ചെലവഴിക്കാനെത്തുന്നത്.പ്രളയത്തില് മീനച്ചിലാര് കരകവിഞ്ഞപ്പോഴാണ് ഒഴുകിയെത്തിയ പഞ്ചസാര മണല്തിട്ട രമേശ് കിടങ്ങൂരിന്റെ ശ്രദ്ധയില്പ്പെടുന്നത്.
തുടര്ന്ന് മാലിന്യവും പ്ലാസ്റ്റിക്കും അടിഞ്ഞുകൂടിയ പ്രദേശം വൃത്തിയാക്കാന് എത്തണമെന്ന രമേശിന്റെ ഫേസ്ബുക്ക് പോസ്റ്റ് ശ്രദ്ധയില്പ്പെട്ട് നൂറുകണക്കിനാളുകളാണ് കാവാലിക്കടവിലെത്തിയത്. മണല്തിട്ടയിലെ മാലിന്യങ്ങള് വൃത്തിയാക്കുകയും ശുചീകരണ പ്രവര്ത്തനങ്ങള് നടത്തുകയും ചെയ്തു.തുടര്ന്ന് നാട്ടുകാരുടെ നേതൃത്വത്തില് രൂപീകരിച്ച ജനകീയ കൂട്ടായ്മയുടെ നേതൃത്വത്തില് മുളകൊണ്ടും തടികൊണ്ടും ഇരിപ്പിടങ്ങള് ഉണ്ടാക്കി. മണല്തിട്ടയോടു ചേര്ന്നുള്ള മരത്തില് ഇപ്പോള് ആറ് ഊഞ്ഞാലുകള് ഉണ്ട്. ഈ ഊഞ്ഞാലില് കുട്ടികളും മുതിര്ന്നവരും ആടി രസിക്കുകയാണ്. ചായയും കാപ്പിയും ലഭിക്കുന്ന ചെറിയ ഒരു കടയും അടുത്ത നാളില് തുടങ്ങിയിട്ടുണ്ട്. കാവാലിക്കടവിലെ കടത്തുവള്ളത്തില് കയറാനും അവസരമുണ്ട്.
മണല്തിട്ടയോടു ചേര്ന്നു മീനച്ചിലാറ്റില് 20മീറ്റര് നീളത്തില് വെള്ളം കുറവാണ്. ഇവിടെ കുളിക്കാനും അവസരമുണ്ട്. മിനി ബീച്ച് സന്ദര്ശിച്ച മോന്സ് ജോസഫ് എംഎല്എ തൂക്കുപാലം നിര്മിക്കാമെന്ന് വാഗ്ദാനം നല്കിയിട്ടുണ്ട്. പ്രളയത്തെ തുടര്ന്ന് പുനര് നിര്മാണം നടത്തിയ സ്ഥലങ്ങള് സന്ദര്ശിക്കുന്ന യുഎന് പ്രതിനിധി സംഘം കഴിഞ്ഞ ദിവസം കടവും മണല്തിട്ടയും സന്ദര്ശിച്ചിരുന്നു. പഞ്ചായത്തിന്റേയും പോലീസിന്റേയും ജനകീയ പ്രസ്ഥാനങ്ങളുടെയും പിന്തുണ മിനി ബീച്ചിനും തുടര് പ്രവര്ത്തനത്തിനുമുണ്ട്.
കിടങ്ങൂര്പാലാ റോഡില് കിടങ്ങൂര് ജംഗ്ഷനില് നിന്നും അര കിലോമീറ്റര് വലത്തോട്ട് തിരിഞ്ഞാല് കാവാലിക്കടവിലെത്താം. കിടങ്ങൂര് അമ്പലത്തിനു സമീപത്തു നിന്നും ചെമ്പിളാവ് റൂട്ടില് ഉത്തമേശ്വരം അമ്പലം കഴിഞ്ഞ് ഇടത്തോട്ട് തിരിഞ്ഞാലും കടവിലെത്താം.
https://www.facebook.com/Malayalivartha