ഇസ്രയേലിന്റെ പലസ്തീന് അധിനിവേശത്തിനെതിരെ പ്രതിഷേധിക്കുന്ന പലസ്തീന് യുവാവിന്റെ ചിത്രം ശ്രദ്ധനേടുന്നു
പലസ്തീന് അധിനിവേശ വിരുദ്ധ പോരാട്ടത്തിന്റെ പ്രതീകമെന്ന് വിശേഷിപ്പിക്കാവുന്ന ചിത്രം സമൂഹമാധ്യമങ്ങളില് തരംഗം സൃഷ്ടിക്കുന്നു.
ചിത്രത്തിലുള്ളത് ഇസ്രയേലിന്റെ അധിനിവേശത്തിനെതിരെ പോരാടുന്ന ഇരുപതുകാരനായ പലസ്തീന് യുവാവ് അഹദ് അബൂ അംറോ ആണ് . കത്തിച്ചിട്ട ടയറുകളില് നിന്നുയരുന്ന പുക പടലങ്ങള്ക്കിടയില് ഷര്ട്ട് ധരിച്ച പ്രതിഷേധക്കാര്ക്കും ബുള്ളറ്റ് പ്രൂഫ് ജാക്കറ്റണിഞ്ഞ മാധ്യമ പ്രവര്ത്തകര്ക്കുമിടയില് ഷര്ട്ട് ധരിക്കാതെയാണ് അഹദ് അബൂ അംറോ നില്ക്കുന്നത്.
ഒരു കയ്യില് പലസ്തീന്റെ പതാകയും മറുകയ്യില് കവണയുമേന്തി ഷര്ട്ട് ധരിക്കാതെ ഇസ്രയേല് അധിനിവേശത്തിനെതിരെ, പലസ്തീന്-ഇസ്രയേല് അതിര്ത്തിയില് പ്രതിഷേധിക്കുന്ന യുവാവിന്റെ ചിത്രമാണ് സമൂഹമാധ്യമങ്ങളില് തരംഗമാകുന്നത്. ഫ്രഞ്ച് വിപ്ലവ ചിത്രമായ 'ലിബര്ട്ടി ലീഡിങ്ങ് ദ പീപ്പിളുമായിട്ടാണ് ഈ ചിത്രം താരതമ്യം ചെയ്യപ്പെടുന്നത്.
തുര്ക്കി വാര്ത്താ ഏജന്സി അനദോളുവിന്റെ മുസ്ഥഫ ഹസൂന് ഒക്ടോബര് 22-ന് പകര്ത്തിയ ചിത്രം വൈകാതെ സമൂഹമാധ്യമങ്ങളിലും തീ പടര്ത്തി. ഗാസയിലെ അല് സൈതൂനിലാണ് അഹദ് അബു താമസിക്കുന്നത്. തന്റെ സുഹൃത്തുക്കള്ക്കൊപ്പം എല്ലാ വെളളിയാഴ്ചയും തിങ്കളാഴ്ചയും അബു അതിര്ത്തിയിലെത്തി പ്രതിഷേധിക്കാറുണ്ട്.
തന്റെ പ്രതിഷേധം ക്യാമറ കണ്ണുകള് പകര്ത്തുന്നത് അബു അറിഞ്ഞതേയില്ല. വൈറലാകുന്ന ഈ ചിത്രം സുഹൃത്തുക്കള് അയച്ചു തന്നപ്പോള് താന് ഞെട്ടിപ്പോയെന്നും പലസ്തീന് പോരാട്ടത്തിന്റെ പുതിയ മുഖമായ യുവാവ് ആശ്ചര്യത്തോടെ പറയുന്നു.
https://www.facebook.com/Malayalivartha
