ഓക്‌സ്ഫഡ് സര്‍വകലാശാല, മാങ്ങയെന്ന് പേരിട്ട് ഒരു കാക്കയെ വളര്‍ത്തുന്നുണ്ട്. മാംഗോയ്‌ക്കൊപ്പം പിന്നെയുമുണ്ട് ഏഴു കൂട്ടുകാര്‍. പലതരം പരീക്ഷണങ്ങള്‍ക്കു വേണ്ടിയാണ് ഇവയെ ഗവേഷകര്‍ വളര്‍ത്തുന്നത്. ഫ്രാന്‍സിന്റെ ഭാഗമായ ന്യൂ കാലിഡോണിയയില്‍ നിന്നാണ് ഇവയെ കൊണ്ടു വന്നത്. അവിടത്തെ കാക്കകള്‍ നേരത്തേതന്നെ 'ബുദ്ധി'ക്കു പേരു കേട്ടതാണ്.

മാംഗോ ഉള്‍പ്പെടെ എട്ടു കാക്കള്‍ക്കു മുന്നില്‍ ഗവേഷകര്‍ ഒരു പെട്ടി വച്ചു. അതിന്റെ നടുവില്‍ അവയ്ക്കു കഴിക്കാനുള്ള ഭക്ഷണവും. പെട്ടിയുടെ ഇരുവശത്തും ഓരോ കുഞ്ഞുവാതിലുണ്ട്. ഒരു വാതിലിലൂടെ നീളന്‍ കമ്പു കൊണ്ടു തട്ടിയാല്‍ മറുവശത്തു കൂടെ ഭക്ഷണം പുറത്തെത്തും. ആ രീതിയിലായിരുന്നു പരീക്ഷണം.

അങ്ങനെ ആദ്യം കൊടുത്ത നീളന്‍ വടി കൊണ്ട് മാംഗോയും എല്ലാ കൂട്ടുകാരും ഭക്ഷണമെടുത്തു. പിന്നെ ഈ കാക്കള്‍ക്ക് കൊടുത്തത് ഓരോ സിറിഞ്ചിന്റെ ട്യൂബും ആണികളുമായിരുന്നു. രണ്ടും കൂട്ടിച്ചേര്‍ത്താല്‍ മാത്രമേ ഭക്ഷണത്തിന് അടുത്തേക്ക് എത്താനുള്ളത്ര നീളമാവുകയുള്ളൂ. അതും നാലു കാക്കകള്‍ വിജയകരമായി പൂര്‍ത്തിയാക്കി. പിന്നെയായിരുന്നു ശരിക്കും പരീക്ഷണം. സിറിഞ്ച് ട്യൂബുകളും ആണികളും മൂന്നും നാലുമെണ്ണമാക്കിക്കൊടുത്തു. അവയെല്ലാം കൂട്ടിച്ചേര്‍ത്ത് നീളന്‍ വടിയാക്കി ഭക്ഷണം എടുക്കാനായത് മാംഗോക്കാക്കയ്ക്കു മാത്രമായിരുന്നു!

പലതരം വസ്തുക്കള്‍ കൂട്ടിച്ചേര്‍ത്ത് ഉപകരണങ്ങളുണ്ടാക്കാന്‍ മനുഷ്യന്‍ ആരംഭിച്ചത് മൂന്നു ലക്ഷം വര്‍ഷങ്ങള്‍ക്കു മുന്‍പായിരുന്നു. അങ്ങനെ പലതരം ഉപകരണങ്ങളുണ്ടാക്കിപ്പഠിച്ചാണ് മനുഷ്യന്റെ ബുദ്ധിയിലും മാറ്റം വന്നത്. കാര്യങ്ങള്‍ 'പ്ലാന്‍' ചെയ്യാനും ഭാഷയ്ക്ക് രൂപം നല്‍കാനുമൊക്കെ മനുഷ്യന്‍ തുടങ്ങിയത് അങ്ങനെയായിരുന്നു.

ഇന്നത്തെക്കാലത്ത് അഞ്ചു വയസ്സിനും ഒന്‍പതു വയസ്സിനും ഇടയ്ക്കാണ് കുട്ടികള്‍ ഇത്തരത്തില്‍ ഉപകരണങ്ങള്‍ കൂട്ടി യോജിപ്പിക്കാന്‍ പഠിക്കുന്നതു തന്നെ! അതും ആരെങ്കിലുമൊക്കെ ചെയ്യുന്നതു കണ്ടു പഠിച്ചു വേണം. അഞ്ചു വയസ്സു തന്നെ ഏറെ വൈകിയിട്ടാണെന്നാണ് ഗവേഷകരുടെ പക്ഷം.

എന്തായാലും ബുദ്ധി ഉപയോഗിച്ച് ഉപകരണങ്ങളുണ്ടാക്കുകയെന്നത് ഏറെ ബുദ്ധിമുട്ടുള്ള കാര്യമാണെന്നത് ഉറപ്പ്. അങ്ങനെയെങ്കില്‍ മാംഗോക്കാക്കയും കൂട്ടുകാരും അതീവ ബുദ്ധിമാന്മാരാണ്. പക്ഷേ ഈ ബുദ്ധിക്കു പിന്നിലുള്ള രഹസ്യം മാത്രം ഗവേഷകര്‍ക്ക് ഇതുവരെ പിടികിട്ടിയിട്ടില്ല. എങ്ങനെയാണ് ഈ കാക്കകള്‍ക്കു മാത്രം ഇങ്ങനെ ഓരോന്നും കണ്ടുമനസ്സിലാക്കി പഠിക്കാനാകുന്നതെന്നും അറിയാനായിട്ടില്ല. ഇനി അതു കണ്ടെത്താനുള്ള ശ്രമത്തിലാണ് ഗവേഷകര്‍.