വെനസ്വേലയില് ആള്ക്കാര്ക്ക് മിനിമം കൂലി 3,0000 ശതമാനം കൂട്ടിയിട്ടും അതൃപ്തി; കാരണം അത് ഇന്ത്യന് രൂപയില് കൂട്ടിയാല് മാസശമ്പളം 50 പൈസ!
കടുത്ത സാമ്പത്തിക അരാജകത്വത്തിലൂടെ മുമ്പോട്ട് പോകുന്ന വെനസ്വേലയില് നടപ്പാക്കിയ പുതിയ ശമ്പളസ്കെയില് പ്രകാരം വെനസ്വേലയില് ആള്ക്കാര്ക്ക് മിനിമം ശമ്പളം 3,0000 ശതമാനം കൂട്ടിയിട്ടും ജനങ്ങള്ക്ക് അതൃപ്തി. ഒരു കിലോ ഇറച്ചി മേടിക്കാന് കൂടി ഇത് തികയുന്നില്ല എന്നത് തന്നെ കാരണം. ഇന്ത്യന് രൂപയുമായി നോക്കിയാല് വെറും 50 പൈസയാണ് കൂലി വരിക. നിലവിലെ വിനിമയ നിരക്ക് പ്രകാരം ഒരു വെനസ്വേലയന് ബൊളിവറിന് രൂപാമൂല്യം 0.00028 എന്നതാണ്.
സാമ്പത്തിക പ്രതിസന്ധി രൂക്ഷമായതോടെ ആള്ക്കാര് അയല്രാജ്യമായ ബ്രസീലിലേക്ക് പലായനം ചെയ്യുന്ന സ്ഥിതിയാണ്. വെനസ്വേല പ്രസിഡന്റ് നിക്കോളാസ് മദൂറോയുടെ പുതിയ സാമ്പത്തിക നയം രാജ്യത്തെ സാമ്പത്തിക നിലയെ വീണ്ടും വീണ്ടും തകര്ക്കുകയാണ്. രാജ്യത്തിന്റെ കറന്സിയുടെ മൂല്യത്തില് കാര്യമായ ഇടിവുതന്നെ കഴിഞ്ഞയാഴ്ച വന്നു. തിങ്കളാഴ്ച മുതല് സോവറിന് ബൊളീവര് എന്ന പുതിയ കറന്സി കൂടി അവതരിപ്പിച്ചതോടെ സമ്പദ് വ്യവസ്ഥ താറുമാറായി. പുതിയ നിരക്ക് പ്രകാരം ഏറ്റവും താണശമ്പളം ഇപ്പോള് 1,800 സോവറിന് ബൊളിവര് ആണ്.
ഇപ്പോള് ലോകത്തെ ഏറ്റവും ഉയര്ന്ന നാണ്യപ്പെരുപ്പം നില നില്ക്കുന്ന രാജ്യമാണ് വെനസ്വേല. 2015 ന് ശേഷം രാജ്യത്തെ നാണ്യപ്പെരുപ്പ നിരക്ക് വെനസ്വേലയന് സെന്ട്രല് ബാങ്ക് ഇതുവരെ പുറത്തു വിട്ടിട്ടില്ല. 2014-ല് എണ്ണവില ശക്തമായി ഇടിഞ്ഞത് മുതലാണ് എണ്ണയെ ആശ്രയിച്ചിരുന്ന രാജ്യത്തിന്റെ വരുമാന മാര്ഗ്ഗം അടഞ്ഞത്. സാമ്പത്തിക ഭദ്രതയിലേക്ക് നീങ്ങാന് വെനസ്വേല കൂടുതല് എണ്ണയുല്പ്പാദനം നടത്തേണ്ട സ്ഥിതിയുണ്ട്.
എന്നാല് 2003-ല് ഹ്യൂഗോ ഷാവേസിന്റെ പിന്ഗാമിയായി എത്തിയ മദുറോ, വിദേശകറന്സി വിനിമയം ഏറ്റെടുത്തതോടെ തകര്ച്ച തുടങ്ങി. വിദേശ കറന്സിയുടെ വിനിമയം സര്ക്കാര് ഏജന്സി വഴി എന്ന രീതിയിലുള്ള മദുറോയുടെ സാമ്പത്തിക പരിഷ്ക്കരണം പ്രാദേശിക കറന്സിയും ഡോളറും തമ്മില് മാറുന്നതിന് ആള്ക്കാര്ക്ക് പ്രതിസന്ധി സൃഷ്ടിച്ചു. സര്ക്കാര് ഏജന്സിയെ ആശ്രയിക്കേണ്ട സ്ഥിതി വന്നതോടെ ഡോളറുകള് മാറാന് കാരണം കാണിക്കണമെന്നായി. അതിന് പുറമേ ഡോളറിന് സര്ക്കാര് വയ്ക്കുന്ന നിര്ബ്ബന്ധിത നിരക്കും പ്രശ്നമായി.
കയറ്റുമതി ഉല്പ്പന്നങ്ങള്ക്ക് കിട്ടുന്ന വിദേശപണം ബൊളീവറായി മാറിയെടുത്താല് സര്ക്കാര് വെച്ചിരിക്കുന്ന നിര്ബ്ബന്ധിത നിരക്കേ കിട്ടു എന്നായതോടെ സ്വതന്ത്രമായി ഡോളര് വാങ്ങാന് കഴിയാത്ത അവസ്ഥ വരികയും കരിഞ്ചന്ത വ്യാപകമാകുകയും നാണ്യപ്പെരുപ്പത്തിന് കാരണമാകുകയും ചെയ്തു.
നിക്ഷേപകരും വെനസ്വേലയില് നിന്നും കയ്യെടുക്കുക കൂടി ചെയ്തതോടെ സ്വന്തമായി പണം അടിക്കേണ്ട സ്ഥിതിയും പ്രതിസന്ധി രൂക്ഷമാക്കി. ആഭ്യന്തര കറന്സിയുടെ വിലയിടിഞ്ഞ് പണപ്പെരുപ്പം വീണ്ടും കൂടി. സോവറിന് ബൊളീവര് എന്നാണ് പുതിയ വെനസ്വേല കറന്സിയുടെ പേര്. നേരത്തേ ഉണ്ടായിരുന്നത് സ്ട്രോംഗ് ബൊളീവറായിരുന്നു. രാജ്യത്തെ ഇലക്ട്രോണിക് കറന്സിയായ പെട്രോയ്ക്ക് 60 ഡോളറാണ് മൂല്യം.
https://www.facebook.com/Malayalivartha