കേരള പോലീസ്, മുഖ്യമന്ത്രിയുടെ ദുരിതാശ്വാസ നിധിയിലേക്ക് പത്ത് കോടി രൂപ സംഭാവന നല്കുന്നത് പിടിച്ചു പറിച്ചിട്ടാണെന്ന് പറയുന്നവര്ക്ക് കേരള പോലീസിന്റെ കിടിലന് മറുപടി
മഞ്ഞും മഴയും വെയിലും സഹിച്ച് ജനങ്ങളുടെ സ്വത്തിനും ജീവനും സുരക്ഷയുറപ്പാക്കി നിയമ സംരക്ഷണം നടത്തുന്നവരാണ് പോലീസ്. കഴിഞ്ഞ ദിവസങ്ങളില് കേരളം നേരിട്ട പ്രളയക്കെടുതിയിലും ഈ സേവനം നാം കണ്ടതാണ്.
പ്രളയക്കെടുതിയില് ദുരിതമനുഭവിക്കുന്നവര്ക്ക് കൈത്താങ്ങായി കേരള പോലീസ്, മുഖ്യമന്ത്രിയുടെ ദുരിതാശ്വാസ നിധിയിലേക്ക് പത്ത് കോടി രൂപ സംഭാവന നല്കുമെന്ന് അറിയിച്ചിരുന്നു. എന്നാല് ഈ വാര്ത്തയ്ക്ക് പിന്നാലെ സോഷ്യല് മീഡിയയില് നിരവധി ട്രോളുകളുമിറങ്ങി.
ദുരിതാശ്വാസ നിധിയിലേക്ക് പോലീസ് പത്ത് കോടി രൂപ കൊടുക്കാന് ഉദ്ദേശിക്കുന്നതിനാല് ഹെല്മറ്റും സീറ്റ് ബെല്റ്റും ഇടുകയും രേഖകള് കരുതുകയും വേണമെന്നും കാരണം പോലീസിന് സ്വന്തമായി നോട്ട് അടിക്കുന്ന പ്രസ് ഇല്ല എന്നുമാണ് സോഷ്യല് മീഡിയയില് പ്രത്യക്ഷപ്പെട്ട ഒരു പോസ്റ്റ്.
ഇത്തരത്തില്, പോലീസ് സേനയെ മുഴുവന് അവഹേളിക്കുന്ന വിധത്തില് സോഷ്യല് മീഡിയയില് പരിഹാസ സ്വരമുയര്ത്തിയ വ്യക്തിക്ക് ഒരു പോലീസുദ്യോഗസ്ഥന് നല്കിയ മറുപടി ഏറെ ശ്രദ്ധപിടിച്ചു പറ്റി.
പോലീസ് ഉദ്യോഗസ്ഥന് നല്കിയ മറുപടിയുടെ പൂര്ണരൂപം:
പോലീസുകാര്10 കോടി രൂപ ദുരിതാശ്വാസ നിധിയിലേക്ക് സംഭാവന നല്കുന്നത് നാട്ടുകാരുടെ കൈയ്യില് നിന്ന് പിടിച്ച് പറിച്ചിട്ടാണ് എന്ന് പോസ്റ്റിയ സഹോദരന് അറിയാന്, രണ്ട് ദിവസത്തെ ശമ്പളവും അതു കൂടാതെ 2750 രൂപ ഉത്സവബത്തയും അടക്കം ഏകദേശം 5000 രൂപയ്ക്ക് മുകളില് മുഖ്യമന്ത്രിയുടെ ദുരിതാശ്വാസനിധിയിലേക്ക് സംഭാവന ചെയ്ത കേരള പോലീസിന് ഞങ്ങള് സേനയിലെ 55000 പേര് 1818 രൂപ വീതം കൂടി എടുത്താല് പോലും ഈ പറഞ്ഞ 10 കോടി നിഷ്പ്രയാസം സമാഹരിക്കാന് പറ്റും.
അത് ഞങ്ങള് കൊടുക്കുന്നത് നിങ്ങള് ഓണ അവധിക്ക് വീട്ടിലിരുന്ന് ഞങ്ങള്ക്ക് എതിരേ എഴുതുന്ന ഈ സമയത്തും, അവധിയില്ലാതെ സൂര്യന് ഉദിക്കുന്നത് മുതല് താങ്കളും കുടുംബവും ആഘോഷമൊക്കെ കഴിഞ്ഞ് പിരിഞ്ഞ് പോകുന്ന പാതിരാ വരെ, റോഡിലും വെയിലത്തും മഴയത്തും മഞ്ഞത്തും നിന്ന് വിയര്പ്പൊഴുക്കുന്നതിന്റെ ഒരു പങ്കാണെന്ന് തലയുയര്ത്തി നിന്ന് പറയാന് കഴിയും.
താങ്കള് ഹെല്മറ്റ് ധരിച്ചാല് ഒരു പക്ഷേ ഒരു വലിയ ഉറക്കത്തില് നിന്ന് താങ്കളും, തീരാനഷ്ടത്തില് നിന്ന് താങ്കളുടെ കുടുംബവും രക്ഷപ്പെട്ടേക്കാം.
പിന്കുറിപ്പ് : ഒരോ ദിവസവും പോലീസ് ഈടാക്കുന്ന പെറ്റികേസുകള്ക്ക് രസീത് നല്കുകയും ഫൈന് പിറ്റേദിവസം തന്നെ ട്രഷറിയില് അടയ്ക്കുകയാണ്. അല്ലാതെ പോലീസുകാര് വീതം വച്ച് വീട്ടില് കൊണ്ടു പോകുകയല്ല എന്ന കാര്യം കൂടി മനസ്സിലാക്കുക.. ആധികാരികമായി അതിനെ കുറിച്ച് അറിയണമെങ്കില് വിവരാവകാശപ്രകാരം ഒരു അപേക്ഷ വച്ചാല് ലഭിക്കുന്നതായിരിക്കും..
താങ്കള്ക്കോ താങ്കളുടെ പരിചയത്തിലോ ആര്ക്കെങ്കിലും പ്രളയത്തില് അകപ്പെട്ട വീട് വൃത്തിയാക്കാനുണ്ടെങ്കില് അറിയിച്ചാല് പ്രതിഫലം വാങ്ങാതെ അതും പോലീസ് വന്ന് ചെയ്തു തരും.
https://www.facebook.com/Malayalivartha