നീതി കിട്ടുന്നതിനായി സെക്രട്ടേറിയറ്റിനുമുന്നില്‍ ശവപ്പെട്ടിയില്‍ കിടന്ന് സമരം. കൊല്ലം പുലിയില സ്വദേശിയും മജീഷ്യനുമായ പ്രമോദ് കേരളയാണ് സെക്രട്ടേറിയറ്റിനുമുന്നില്‍ ശവപ്പെട്ടിയില്‍ കിടന്ന് സമരം ആരംഭിച്ചത്. കൊല്ലം ജില്ലാ സഹകരണ ബാങ്കില്‍ പണയംവച്ച വീടിന്റെയും 21സെന്റ് സ്ഥലത്തിന്റെയും ആധാരം തിരിച്ചു കിട്ടുന്നതിനും ഇതിനായി ബാങ്കിനുമുന്നില്‍ സത്യഗ്രഹം അനുഷ്ഠിച്ച തന്നെ അക്രമിച്ച ജീവനക്കാരെ നിയമത്തിനുമുന്നില്‍ കൊണ്ടുവരണമെന്നും ആവശ്യപ്പെട്ടാണ് പ്രമോദിന്റെ സമരം.
എട്ടുവര്‍ഷംമുന്‍പ് പഠനാവശ്യങ്ങള്‍ക്കായി കൊല്ലം ജില്ലാ സഹകരണ ബാങ്കില്‍നിന്ന് ആധാരം പണയംവച്ച് രണ്ടു ലക്ഷം രൂപ വായ്പയെടുത്തിരുന്നു. പ്രമാണങ്ങള്‍ തിരികെ വാങ്ങാന്‍ ചെന്നപ്പോഴാണ് ആധാരം കൈമോശം വന്ന വിവരം ബാങ്ക് അധികൃതര്‍ അറിയിക്കുന്നത്. ആധാരം തിരികെ ലഭിക്കാതെ വന്നപ്പോള്‍ ബാങ്കിനുമുന്നില്‍ സത്യഗ്രഹം കിടന്ന പ്രമോദിനെ ബാങ്ക് ഉദ്യോഗസ്ഥര്‍ മര്‍ദിച്ചു. പ്രശ്‌നത്തില്‍ ഇടപെട്ട ആഭ്യന്തരമന്ത്രി പ്രമോദിന്റെ പ്രശ്‌നങ്ങള്‍ പരിഹരിച്ചെന്ന് അറിയിച്ചിരുന്നു. ആഴ്ചകളായിട്ടും നടപടികളൊന്നും ഉണ്ടാകാത്തതിനെതുടര്‍ന്നാണ് സമരം ആരംഭിച്ചതെന്ന് പ്രമോദ് പറഞ്ഞു.

 അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha