ഈ അമ്മയെ മറന്നാലും അവരുടെ കൈപുണ്യം മറക്കില്ല... മോഹന്ലാല്, മമ്മൂട്ടി, സുരേഷ് ഗോപി തുടങ്ങിയ സൂപ്പര്താരങ്ങള്ക്ക് വച്ചുവിളമ്പിയ അമ്മ ദുരിതത്തില്
ഒരു പക്ഷേ ഈ അമ്മയെ സൂപ്പര് താരങ്ങള് മറന്നിരിക്കാം. പക്ഷെ ഈ അമ്മ വച്ചുവിളമ്പിയ ഭക്ഷണത്തിന്റെ രുചി സൂപ്പര് താരങ്ങളുടെ നാവില് നിന്ന് പോയിട്ടുണ്ടാവില്ല. ഷൂട്ടിംഗ് ലൊക്കേഷനുകളില് മോഹന്ലാലിന്റെയും മമ്മൂട്ടിയുടെയും സുരേഷ്ഗോപിയുടെയുമൊക്കെ ഇഷ്ടാനിഷ്ടങ്ങള് ചോദിച്ചറിഞ്ഞ് അവര്ക്ക് പ്രിയപ്പെട്ട ഭക്ഷണമുണ്ടാക്കി കൊടുത്തിരുന്ന ആളാണ് പട്ടാമ്പിക്കാരി ലക്ഷ്മിക്കുട്ടിയമ്മ.
രണ്ട് വര്ഷം മുമ്പുവരെ പ്രധാന ഷൂട്ടിംഗ് ലൊക്കേഷനുകളിലെ മെസ്സില് ലക്ഷ്മി അമ്മയുണ്ടായിരുന്നു. എന്നാലിന്ന്, അര്ബുദം ബാധിച്ച് കോഴിക്കോട് മെഡിക്കല് കോളേജ് ആശുപത്രിയിലെ ഇരുപതാം വാര്ഡിലാണ്. ഒരു നേരത്തെ ആഹാരത്തിനും മരുന്നിനും വകയില്ലാതെ വേദന കടിച്ചമര്ത്തി കിടക്കുന്നു. ടാക്സി ഡ്രൈവറായ മൂത്ത മകന് മുരളി മാത്രമാണ് കൂടെ.
തൃശൂരിലെ അമലയിലായിരുന്നു മാസങ്ങളോളം. ശസ്ത്രക്രിയയ്ക്ക് ആറ് ലക്ഷം രൂപ വേണമെന്നറിഞ്ഞപ്പോള് തൃശൂര് മെഡിക്കല് കോളേജിലേക്ക് മാറ്റി. അവിടെ രണ്ട് മാസം. അപ്പോഴേക്കും തൈറോയിഡിലെ രോഗബാധ ഹൃദയത്തിലേക്ക് വ്യാപിച്ചുകഴിഞ്ഞിരുന്നു. അടിയന്തര ശസ്ത്രക്രിയ പറഞ്ഞതോടെ കഴിഞ്ഞ 31ന് കോഴിക്കോട് മെഡിക്കല് കോളേജ് ആശുപത്രിയിലേക്ക് മാറ്റി. പ്രമേഹവും രക്തസമ്മര്ദ്ദവും കാരണം ശസ്ത്രക്രിയ പലവട്ടം മാറ്റിവച്ചു. എന്ത് ചെയ്യണമെന്ന് ഒരു രൂപവുമില്ല മകന് മുരളിക്ക്. കൈയിലുണ്ടായിരുന്ന കാശെല്ലാം അമ്മയ്ക്ക് മരുന്നു വാങ്ങിയും പരിശോധന നടത്തിയും തീര്ന്നു. പണിക്ക് പോയിട്ട് മാസങ്ങളാവുന്നു.
സിനിമാക്കാര്ക്കൊപ്പമായിട്ടും സമ്പാദ്യങ്ങളൊന്നുമുണ്ടായിരുന്നില്ല ഈ അമ്മയ്ക്ക്. വലിയ വലിയ താരങ്ങളുമായുള്ള അടുപ്പം മാത്രം. അമ്മയുടെ കൈയിലുള്ള ഫോണ് നമ്പരില് പലരേയും വിളിച്ചു. സംസാരിക്കാന് പോലും നേരമില്ലായിരുന്നു പലര്ക്കും. ഇതിനിടയില് ആരോ പറഞ്ഞറിഞ്ഞ് കഴിഞ്ഞ ദിവസം സുരേഷ് ഗോപിയെത്തി. 25,000 രൂപയും നല്കി.
രോഗത്തിന്റെ അവശതയില് ശരീരമാസകലം വിറയ്ക്കുമ്പോഴും പ്രിയതാരങ്ങളെക്കുറിച്ച് പറയുമ്പോള് ലക്ഷ്മി അമ്മയുടെ മുഖം പ്രസന്നമാകും. രോഗത്തിന്റെ ഗുരുതരാവസ്ഥയെക്കുറിച്ചൊന്നും ഇവരെ അറിയിച്ചിട്ടില്ല. രോഗംമാറി വീണ്ടും സെറ്റിലെത്താനുള്ള മോഹമാണ് മനസില്. ഫെഫ്കയിലെ അംഗവും മലയാളം സിനി ടെക്നിഷ്യന്സ് കോ ഓപ്പറേറ്റീവ് സൊസൈറ്റിയുടെ ഡയറക്ടര്ബോര്ഡ് മെമ്പറുമായിരുന്നു. രോഗ വിവരമറിഞ്ഞിട്ടും ഫെഫ്ക ഭാരവാഹികളാരും തിരിഞ്ഞുനോക്കിയില്ല. പെന്ഷനോ മറ്റ് ആനുകൂല്യങ്ങളോ ഒന്നും നല്കിയതുമില്ല.
ഭര്ത്താവ് ചെറുപ്പത്തിലേ മരിച്ചുപോയി. പിന്നെ മൂന്ന് മക്കളെ ഹോട്ടലുകളില് പാചകപ്പണിയെടുത്താണ് ഈ അമ്മ വളര്ത്തിയത്. അതിനിടെയാണ് അമ്മയുടെ കൈപ്പുണ്യം രുചിച്ചിട്ടുള്ള ചിലര് വഴി സിനിമാ ലൊക്കേഷനിലെത്തുന്നത്. അടുക്കളത്തിരക്കിനിടയില് ഒരു വടക്കന് വീരഗാഥ, വധു ഡോക്ടറാണ് തുടങ്ങി ഏതാനും ചിത്രങ്ങളില് മുഖം കാണിക്കുകയും ചെയ്തു.
രോഗങ്ങളില് നിന്നും മുക്തിയാകാന് സുമനസുകളായ താരങ്ങളുടെ സഹായത്തിനായി കേഴുകയാണ് ഈ കുടുംബം.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha