ഒരു വ്യത്യസ്ഥനായ ബാര്‍ബര്‍ വാര്‍ത്തകളില്‍ നിറയുകയാണ്. കര്‍ണാടകക്കാരനായ രമേഷ്ബാബു. തൊഴില്‍ കട്ടിംഗും ഷേവിംഗും ആണെങ്കിലും രമേഷ് കോടീശ്വരനാണ്. ആഡംബര വാഹനമായ റോള്‍സ് റോയ്‌സ് അടക്കം 67 കാറുകളുടെ ഉടമസ്ഥന്‍ കൂടിയാണ് രമേഷ്. 
കാറുകളുടെ ശേഖരത്തില്‍ ബി.എം.ഡബ്‌ളിയു. മേഴ്‌സിഡസ് തുടങ്ങിയവയും ഉള്‍പ്പെടും. ഈ കാറുകളൊക്കെ ആഡംബരം കാണിക്കാന്‍ വെറുതെ വാങ്ങിയിട്ടിരിക്കുകയല്ല. അവ വാടകയ്ക്ക് കൊടുത്തിരിക്കുകയാണ്. അതില്‍ നിന്ന് വലിയ വരുമാനവും അയാള്‍ക്ക് ലഭിക്കുന്നുണ്ട്. അതാണ് അയാളെ ഇന്ത്യയിലെ കോടീശ്വരനായ ബാര്‍ബര്‍ ആക്കി മാറ്റിയതും. 
1979ല്‍ ഒന്‍പതു വയസുള്ളപ്പോള്‍ രമേഷിന് അച്ഛനെ നഷ്ടപ്പെട്ടു. കുട്ടിക്കാലത്ത് ഒരുനേരത്തെ ആഹാരത്തിന് വേണ്ടി തെണ്ടേണ്ടി വന്നിട്ടുണ്ട് രമേഷിന്. രാപകലില്ലാതെ പണിയെടുത്തു. അച്ഛന്റെ മരണത്തോടെ അദ്ദേഹം നടത്തിക്കൊണ്ടിരുന്ന സലൂണ്‍ രമേഷ് വാടകയ്ക്ക് എടുത്ത് നടത്താന്‍ തുടങ്ങി. ബ്രിഗേഡ് റോഡിലെ ആ സ്ഥാപനത്തിന് അഞ്ചു രൂപയായിരുന്നു അന്ന് ദിവസ വാടക. എന്നാല്‍ മുടി വെട്ടിക്കൊടുത്ത് കിട്ടുന്ന വരുമാനം കുടുംബത്തിന്റെ ആവശ്യങ്ങള്‍ നിറവേറ്റാന്‍ പര്യാപ്തമായിരുന്നില്ല. വളര്‍ന്നതോടെ കുടുംബത്തിന്റെ ഉത്തരവാദിത്തം രമേഷിനായി. പഠനം തുടരണോ അതോ കുടുംബത്തിനായി വരുമാനം ഉണ്ടാക്കണോ എന്ന് തീരുമാനിക്കാനാവാത്ത അവസ്ഥ. എങ്കിലും അമ്മയുടെ നിര്‍ദ്ദേശപ്രകാരം രമേഷ് പ്രീ യൂണിവേഴ്‌സിറ്റി തലം വരെ പഠിച്ച് ഇലക്ട്രോണിക്‌സില്‍ ഡിപ്‌ളോമ നേടി. അപ്പോഴും സലൂണ്‍ തുച്ഛമായ വാടകയ്ക്ക് കൊടുത്തിരുന്നു.
1989ല്‍ സലൂണ്‍ നോക്കി നടത്താന്‍ രമേഷ് തീരുമാനിച്ചു. തുടര്‍ന്ന് പതുക്കെ ബിസിനസ് പച്ച പിടിക്കാന്‍ തുടങ്ങി. 1991ല്‍ രമേഷ് സ്വന്തമായി സലൂണ്‍ തുടങ്ങി. ഇന്നര്‍ സ്‌പേസ് എന്ന പേരില്‍ തുടങ്ങിയ ആ സലൂണ്‍ പട്ടണത്തിലെ ശ്രദ്ധാകേന്ദ്രമായി മാറി. 
1994ലാണ് രമേഷിന്റെ ജീവിതം മാറ്റിമറിച്ച ആ സംഭവം നടക്കുന്നത്. ഒരു മാരുതി ഒമ്‌നി വാന്‍ വാങ്ങി രമേഷ് അത് വാടകയ്ക്ക് കൊടുക്കാന്‍ തുടങ്ങി. 17 വര്‍ഷത്തിനു ശേഷം രമേഷിന്റെ കാര്‍ ശേഖരം പടര്‍ന്നു പന്തലിച്ചു. മൂന്നു കോടിയുടെ റോള്‍സ് റോയ്‌സ് കൂടാതെ നാല് മേഴ്‌സിഡസ്, അത്ര തന്നെ ബി.എം.ഡബ്‌ളിയു, 50 ടൊയോട്ട ഇന്നോവ എന്നിവയെല്ലാം ഇന്ന് രമേഷ് വാടകയ്ക്ക് കൊടുക്കുന്നുണ്ട്. കാറുകളുടെ ഏറ്റവും കുറഞ്ഞ ദിവസ വാടക ആയിരം രൂപയാണ്. കൂടിയത് 50,000 രൂപ, അത് റോള്‍സ് റോയിസിന്റേതാണ്.
2004വരെ ആറ് കാറുകള്‍ മാത്രമാണ് രമേഷിനുണ്ടായിരുന്നത്. സലൂണ്‍ ബിസിനസില്‍ ശ്രദ്ധ കേന്ദ്രീകരിച്ചതിനാല്‍ തന്നെ റെന്റ് എ കാര്‍ ബിസിനസിന് അത്ര പ്രാധാന്യം നല്‍കിയിരുന്നില്ല. ഈ മേഖലയില്‍ കടുത്ത മത്സരം നടക്കുന്നത് തന്നെ കാരണം. അങ്ങനെയാണ് ലക്ഷ്വറി കാറുകള്‍ വാടകയ്ക്ക് കൊടുക്കുക എന്ന ആശയത്തിലേക്ക് രമേഷ് എത്തിയത്.
2004ല്‍ ആദ്യ ലക്ഷ്വറി കാര്‍ വാങ്ങുമ്പോള്‍ എല്ലാവരും രമേശിനെ കുറ്റപ്പെടുത്തി. ജീവിതത്തിലെ ഏറ്റവും വലിയ അബദ്ധം എന്നാണ് ബന്ധുക്കളും സുഹൃത്തുക്കളുമൊക്കെ പറഞ്ഞത്. എന്നാല്‍ ബിസിനസ് വിജയിക്കണമെങ്കില്‍ റിസ്‌ക് എടുക്കണമെന്നാണ് രമേഷിന്റെ അഭിപ്രായം. അങ്ങനെ ബിസിനസ് തഴച്ചു വളര്‍ന്നു. ഇപ്പോള്‍ രമേഷിന്റെ എല്ലാ കാറുകളും യാത്രയുടെ തിരക്കിലാണ്. ഈ വര്‍ഷം ലിമോസിന്‍ കാറുകള്‍ വാങ്ങാനാണ് രമേഷിന്റെ തീരുമാനം. 
രമേഷ് ഇപ്പോള്‍ കോടീശ്വരനൊക്കെയാണെങ്കിലും വന്ന വഴി മറന്നിട്ടില്ല. തലയൊന്നിന് നൂറു രൂപയ്ക്ക് രമേഷ് ഇപ്പോഴും മുടിവെട്ടുന്നുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha