ലണ്ടനില്‍ നിന്നും പുറപ്പെട്ട ബ്രിട്ടീഷ് എയര്‍വെയ്‌സ് വിമാനത്തില്‍ ടോയ്‌ലറ്റ് നിറഞ്ഞൊഴുകിയത് കാരണം തിരിച്ചിറക്കി. ടോയ്‌ലെറ്റില്‍ നിന്നുള്ള ദുര്‍ഗന്ധം യാത്രക്കാര്‍ക്ക് സഹിക്കാന്‍ കഴിയാതെ വന്നതോടെ പൈലറ്റ് വിമാനം തിരിച്ചിറക്കാന്‍ നിര്‍ബന്ധിതനാകുകയായിരുന്നു. ടോയ്‌ലെറ്റ് നിറഞ്ഞൊഴുകിയതാണെന്ന് പൈലറ്റ് സ്ഥിരീകരിക്കുകയും ചെയ്തു. ടോയ്‌ലറ്റിനു സമീപത്തെ സീറ്റുകളിലെ യാത്രക്കാരാണ് ആദ്യം പരാതി ഉന്നയിച്ചത്. ഇതു പരിഹരിക്കാന്‍ വിമാന ജീവനക്കാര്‍ക്കു കഴിഞ്ഞില്ല. വൃത്തികെട്ട ദുര്‍ഗന്ധം പരന്നതോടെ യാത്രക്കാര്‍ അസ്വസ്ഥത പ്രകടിപ്പിക്കുകയായിരുന്നു. ഇതിനകം പറന്ന് ബെല്‍ജിയത്തിനു മുകളിലെത്തിയ വിമാനം പൈലറ്റ് ലണ്ടനിലേക്കു തന്നെ തിരിച്ചു പറത്തുകയായിരുന്നു.

ടോയ്‌ലെറ്റില്‍ നിന്നുള്ള അസഹനീയ ദുര്‍ഗന്ധം കാരണം ഏഴു മണിക്കൂര്‍ യാത്ര മുടങ്ങിയെന്ന് വിമാനത്തിലുണ്ടായിരുന്ന ഹെര്‍ട്‌സ്മിയറിലെ ടോറി കൗണ്‍സിലര്‍ അഭിഷേക് സച്‌ദേവ് ട്വീറ്റ് ചെയ്തു. കൃത്യസമയത്തു തന്നെ പറന്നുയര്‍ന്ന വിമാനത്തിനകത്ത് അര മണിക്കൂറോളം പ്രശ്‌നങ്ങളൊന്നുമുണ്ടായിരുന്നില്ലെന്ന് അദ്ദേഹം പറയുന്നു. എന്താണു പ്രശ്‌നമെന്ന് പൈലറ്റ് ജീവനക്കാരോട് ആവശ്യപ്പെടുകയും ചെയ്തു. പിന്നീട് അല്‍പ്പ സമയം കഴിഞ്ഞ് ടോയ്‌ലെറ്റില്‍ നിന്നും മല വിസര്‍ജ്യത്തിന്റെ അവശിഷ്ടങ്ങള്‍ പുറത്തേക്ക് വരുന്നതാണ് അസഹനീയ ദുര്‍ഗന്ധത്തിന് കാരണമെന്ന് പൈലറ്റ് തന്നെ വ്യക്തമാക്കി. ജീവനക്കാര്‍ക്ക് ഇതു ശരിയാക്കാന്‍ കഴിയില്ലെന്നും എന്നാല്‍ ഇതു വിമാനത്തിന്റെ സാങ്കേതിക തകരാറല്ലെന്നും പൈലറ്റ് പറഞ്ഞതായി സച്‌ദേവ് വിവരിച്ചു.
അപ്രതീക്ഷിതമായി യാത്ര മുടങ്ങിയ യാത്രക്കാരെ മുന്ന് മണിക്കൂറിനു ശേഷം മറ്റൊരു വിമാനത്തില്‍ കയറ്റി വിടുമെന്ന് അറിയിച്ചിരുന്നെങ്കിലും ഒടുവില്‍ യാത്രക്കാര്‍ക്ക് 15 മണിക്കൂര്‍ കാത്തിരിക്കേണ്ടി വന്നതായും സച്‌ദേവ് പറഞ്ഞു. സംഭവത്തില്‍ ബ്രിട്ടീഷ് എയര്‍വേയ്‌സ് യാത്രക്കാരോട് ക്ഷമാപണം നടത്തുകയും ഇവര്‍ക്കു വേണ്ട താമസ ഭക്ഷണ സൗകര്യങ്ങള്‍ ഒരുക്കി കൊടുക്കുകയും ചെയ്തു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha