സംസ്ഥാന സര്‍ക്കാരിന്റെ മദ്യനയം അതേരൂപത്തില്‍ അംഗീകരിച്ച ഹൈക്കോടതിയുടെ നടപടി ഒരര്‍ത്ഥത്തില്‍ കെപിസിസി പ്രസിഡന്റ് വിഎം സുധീരന്റെ വിജയം കൂടിയാണ്. സമ്പൂര്‍ണ മദ്യ നിരോധനത്തിനായി തുടക്കം മുതല്‍ ആത്മാര്‍ത്ഥമായി പ്രവര്‍ത്തിക്കുന്ന ഏക വ്യക്തി കൂടിയാണ് സുധീരന്‍. ഇതിന്റെ പേരില്‍ സുധീരന്‍ പലപ്പോഴും ഒറ്റപ്പെടുകയും ചെയ്തിരുന്നു. എക്‌സൈസ് മന്ത്രി ബാബു പോലും സുധീരനെ തള്ളിപ്പറഞ്ഞു. എന്നാല്‍ ഒരു വിട്ടുവീഴ്ചയ്ക്കും സുധീരന്‍ തയ്യാറായിരുന്നില്ല.
മാത്രവുമല്ല ബാര്‍ കേസില്‍ സുധീരന്റെ ഒരു കണ്ണ് എപ്പോഴും ഉണ്ടായിരുന്നു. സാധാരണ തോറ്റു കൊടുക്കുന്ന പതിവ് ശൈലി പാടില്ലെന്ന് സുധീരന്‍ ഉറപ്പിച്ചു പറഞ്ഞു. ഇക്കാര്യത്തില്‍ സോണിയാ ഗാന്ധിയുടെയും രാഹുലിന്റേയും ശ്കതമായ പിന്തുണയും സുധീരന് കിട്ടി. കേസ് വാദിക്കുന്ന ഇന്ത്യയിലെ തന്നെ പ്രമുഖ വക്കീലും കോണ്‍ഗ്രസ് നേതാവുമായ കപില്‍ സിപലിനോട് ഇക്കാര്യം സുധീരന്‍ വ്യക്തമാക്കുകയും ചെയ്തു. അങ്ങനെ സുധീരന്റെ ഏകോപനത്തില്‍ ബാര്‍ കാര്യത്തില്‍ സര്‍ക്കാരിനനുകൂലമായ വിധി വന്നു.
കോടതി ഉത്തരവ് വന്നതോടെ സംസ്ഥാനത്തെ 718 ബാറുകളുടെയും പ്രവര്‍ത്തനം നിലച്ചു. 24 ഫൈവ് സ്റ്റാര്‍ ബാറുകള്‍ക്കു മാത്രമാണ് ഇനി പ്രവര്‍ത്തനാനുമതി. 
മദ്യപാനം മൗലീക അവകാശമല്ലെന്ന കോടതി പരാമര്‍ശം ചരിത്രപരമെന്ന് വി.എം. സുധീരന്‍ പറഞ്ഞു. ജനതാല്‍പര്യം മുന്‍ നിര്‍ത്തിയുള്ള മഹത്തായ വിധിയാണ് ഹൈക്കോടതി പുറപ്പെടുവിച്ചിരിക്കുന്നത്. 
അതേസമയം ഈ അപ്രതീക്ഷിത തിരിച്ചടിയില്‍ ബാര്‍ ഉടമകള്‍ പ്രതികാര ദാഹികളായി മാറിയിട്ടുണ്ട്. എങ്ങനെയും പൂട്ടിയ ബാറുകള്‍ തുറക്കാനുള്ള ശ്രമത്തിലാണ് ബാര്‍ ലോബി.
കേസ് നടത്താനായി കോടികള്‍ പിരിച്ച് നല്‍കിയ കാശും പോയി. ബാറുകളും പൂട്ടി. ഈ സന്ദര്‍ഭത്തില്‍ സര്‍ക്കാരിനെതിരെ ശക്തമായ തെളിവുകളുമായി പലരും രംഗത്തെത്തും. ഇത് തലവേദനയാകുന്നത് കോണ്‍ഗ്രസ് മന്ത്രിമാര്‍ക്കായിരിക്കും. രമേശ് ചെന്നിത്തല അടക്കമുള്ളവര്‍ ഇപ്പോള്‍ കോഴയുടെ നിഴലിലാണ്. അവരെയൊക്കെ വെള്ളം കുടിപ്പിച്ച് അനുകൂല വിധി സമ്പാദിക്കുകയാണ് ബാറുകാരുടെ ലക്ഷ്യം.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha