സ്വര്ണ്ണക്കടത്ത് മുഖ്യമന്ത്രിയിലേക്ക് തിരിയുമ്പോള് നായകന് പടക്കളത്തില് ഒറ്റയ്ക്ക്; മുഖ്യമന്ത്രിയില് സി പി എമ്മുകാര്ക്ക് ഉണ്ടായിരുന്ന വിശ്വാസം പോലും നഷ്ടമായി; പിണറായി വിജയന് ത്രിശങ്കുവിയില്; രാജി പ്രതിപക്ഷത്തിന്റെ മാത്രം ആവശ്യമല്ല
സ്വപ്ന സുരേഷിന്റെ മൊഴി എന് ഐ എ കോടതിയില് സമര്പ്പിച്ചതോടെ സ്വര്ണ്ണക്കടത്ത് കേസ് മുഖ്യമന്ത്രിയുടെ ഓഫീസില് നിന്നും മുഖ്യമന്ത്രിയിലേക്ക് തിരിഞ്ഞു. സി പി ഐ ഉള്പ്പെടെയുള്ള ഘടകകക്ഷികള് മുഖ്യമന്ത്രിയുടെ പ്രവര്ത്തനങ്ങളില് അനിഷ്ടം പ്രകടമാക്കിയതായാണ് അറിയുന്നത്. കാബിനറ്റിലെ സഹമന്ത്രിമാര്ക്ക് പോലും സ്വപ്നയുടെ വെളിപ്പെടുത്തല് ദഹിക്കുന്നില്ലെന്നാണ് ലഭിക്കുന്ന വിവരം.
സര്ക്കാരിന്റെ പതനം ഘടകകക്ഷികള് പ്രവചിക്കുമ്പോള് ഉമ്മന് ചാണ്ടി മന്ത്രിസഭയുടെ അവസാന നാളുകള് അതുപോലെ ആവര്ത്തിക്കുന്നു.
വരും ദിവസങ്ങളില് ഇക്കാര്യത്തില് മുഖ്യമന്ത്രിയുടെ ഓഫീസിനും അദ്ദേഹത്തിന്റെ ഉറ്റവര്ക്കുമുള്ള പങ്ക് കൂടുതല് വ്യക്തമായി പുറത്തുവരുമെന്നാണ് അന്വേഷണ ഏജന്സികളില് നിന്നു ലഭിക്കുന്ന സൂചനകള്.
മുഖ്യമന്ത്രിയുമായി സ്വപ്നക്ക് അടുത്ത ബന്ധമുണ്ടെന്ന് അസിസ്റ്റന്റ് സോളിസിറ്റര് ജനറല് വിജയകുമാര് എന് ഐ എ കോടതിയില് വെളിപ്പെടുത്തിയതോടെ ബി ജെ പിയും പിണറായി വിജയനുമായി അവിശുദ്ധ ബന്ധമുണ്ടെന്ന വാദവും പൊളിഞ്ഞു.
ശിവശങ്കരനില് തന്ത്രപൂര്വം ഒതുക്കി നിര്ത്തിയിരുന്ന സ്വര്ണ്ണക്കടത്ത് കേസാണ് പെട്ടെന്ന് ചങ്ങല പൊട്ടിച്ച് മുഖ്യമന്ത്രിയില് നേരിട്ട് എത്തിയിക്കുന്നത്. മുഖ്യമന്ത്രിയുമായി തനിക്ക് close acquaintance ഉണ്ടെന്ന് സ്വപ്ന സുരേഷ് പറഞ്ഞപ്പോള് കേരളത്തിന്റെ ഉടുമുണ്ട് അഴിഞ്ഞു വീണു. മുഖ്യമന്ത്രിയില് സി പി എമ്മുകാര്ക്ക് ഉണ്ടായിരുന്ന വിശ്വാസം പോലും നഷ്ടമായി. സ്വപ്ന സുരേഷ് ഒരു ആഗോള കള്ളക്കടത്ത് കേസിലെ പ്രതിയാണ്. അവര്ക്ക് മുഖ്യമന്ത്രിയുമായി യാതൊരു ബന്ധവും ഉണ്ടായിരിക്കേണ്ടതില്ല. തനിക്ക് സ്വപ്നയെ അറിയില്ലെന്നാണ് ഇക്കാലമത്രയും മുഖ്യമന്ത്രി പറഞ്ഞു കൊണ്ടിരുന്നത്.സ്വപ്നയും മുഖ്യമന്ത്രിയുമായുള്ള ചിത്രങ്ങള് പുറത്തുവന്നപ്പോഴും ഇതു തന്നെയായിരുന്നു മറുപടി. സ്വപ്നയുമായുള്ള അകല്ച്ച വ്യക്തമാക്കാന് മുഖ്യമന്ത്രി ഉപയോഗിച്ച വാക്ക് വിവാദ വനിത എന്നാണ്.
സ്വപ്നയുടെ വെളിപ്പെടുത്തല് വ്യാഴാഴ്ച ഉച്ചയ്ക്കാണ് പുറത്തു വന്നതെങ്കിലും വെള്ളിയാഴ്ച രാവിലെ വരെയും മുഖ്യമന്ത്രിയോ അദ്ദേഹത്തിന്റെ ഓഫീസോ പ്രതികരിച്ചിട്ടില്ല. ഒരു പക്ഷേ എന് ഐ എ കോടതിയില് കൊടുത്ത രേഖയുടെ വിശ്വാസ്യത മുഖ്യമന്ത്രി സംശയിക്കുന്നുണ്ടാകും. എന്നാല് വ്യാഴാഴ്ച രാത്രി 8 ന് ഏഷ്യാനെറ്റ് ന്യൂസ് അവര് അവതരിപ്പിച്ച വിനു വി ജോണിയോട് മുഖ്യമന്ത്രിയുമായി ബന്ധപ്പെട്ട് പുറത്തു വന്ന വാര്ത്തകള് ശരിയാണെന്ന് സോളിസിറ്റര് ജനറല് പറഞ്ഞിട്ടും മുഖ്യമന്ത്രിയോ അദ്ദേഹത്തിന്റെ ഓഫീസോ പ്രതികരിച്ചില്ല. സി പി എം പോലും ഇതു സംബന്ധിച്ച് യാതൊരു പ്രതികരണവും നടത്തിയിട്ടില്ല. മുഖ്യമന്ത്രിയെ എന്തിനും ഏതിനും പിന്തുണക്കുന്ന മന്ത്രി ഇ.പി. ജയരാജനും പൂര്ണമായ നിശബ്ദത പാലിക്കുന്നു. എ. കെ. ബാലനും മിണ്ടാട്ടമില്ല.
ശരിക്കും ത്രിശങ്കുവിലായിരിക്കുന്നത് മുഖ്യമന്ത്രി തന്നെയാണ്. പടക്കളത്തില് ഒറ്റയ്ക്കായ അനുഭവമാണ് അദ്ദേഹത്തിനുള്ളത്. തനിക്കേറെ പ്രിയപ്പെട്ടവര് പോലും തന്നെ അനുകൂലിക്കുന്നില്ലെന്ന് മുഖ്യമന്ത്രിക്ക് അറിയാം.
അതേ സമയം സ്വപ്നയുടെ വെളിപ്പെടുത്തല് പുറത്തു വന്നിട്ടും ഉത്തരവാദപ്പെട്ട കോണ്ഗ്രസ് നേതാക്കള് പ്രതികരിക്കാത്തതും അത്ഭുതമുണ്ടാക്കി. രമേശ് ചെന്നിത്തല മുഖ്യമന്ത്രി രാജിവയ്ക്കണമെന്ന ആവശ്യം ഉന്നയിച്ചിട്ടുണ്ട്. മൊഴി കോടതിയിലെത്തിയതോടെ ബിജെപി സംസ്ഥാന പ്രസിഡന്റും രാജി ആവശ്യം ഉന്നയിച്ചു.
സ്പ്രിംഗ്ളര് കരാര് പോലെ സ്വര്ണ്ണ കടത്തും ശിവശങ്കരനില് ഒതുക്കി നിര്ത്താനാണ് മുഖ്യമന്ത്രി ശ്രമിച്ചത്.സ്പ്രിംഗ്ളര് കരാര് പുറത്തു വന്നപ്പോള് വിശ്വസ്തനായ അടിമയെ പോലെ അതിന്റെ ഉത്തരവാദിത്വം ശിവശങ്കര് ഏറ്റെടുത്തിരുന്നു. എന്നാല് സ്പ്രിംഗ്ളര് ഇടപാടില് മുഖ്യമന്ത്രിയുടെ താത്പര്യങ്ങളാണ് നടന്നതെന്ന് പിന്നീട് പുറത്തു വന്നു . സംഗതി ഇങ്ങനെയൊക്കെയാണെങ്കിലും പിണറായിയുടെ പതനത്തില് അദ്ദേഹത്തിന്റെ വേണ്ടപ്പെട്ടവര് പോലും സന്തോഷിക്കുന്നു.
https://www.facebook.com/Malayalivartha