ബിവ്റേജസിനെ പറ്റിച്ച ബവ്ക്യൂ അവസാനം മാറ്റത്തിനൊരുങ്ങുന്നു; ഉപഭോക്താക്കള്ക്ക് ഇഷ്ടമുള്ള മദ്യ ഔട്ട്ലറ്റ് തിരഞ്ഞെടുക്കുന്ന രീതിയില് ബവ്ക്യൂ ആപ്പ് പരിഷ്കരിച്ചു; ബവ്ക്യു ആപ്പ് ബിവ്റേജസ്, കണ്സ്യൂമര് ഫെഡ് ഔട്ട്ലെറ്റുകള്ക്ക് വരുത്തി വച്ചത് കോടികളുടെ നഷ്ടം
ബവ്ക്യു ആപ്പ് വന്ന ശേഷം ബിവറേജസിനും കണ്സ്യുമര് ഫെഡ് ഔട്ട്ലെറ്റിനുമുണ്ടായത് വന് നഷ്ടമാണ്. ആപ്പ് ടോക്കണ് നല്കുന്നതില് ഓപ്ഷനുണ്ടായിരുന്നില്ല. അതുകൊണ്ട് തന്നെ ആപ്പ് ടോക്കണ് നല്കുന്ന സ്ഥാപനം അത് ബാറായാലും ബിവ്റേജസ് ഔട്ട്ലെറ്റായാലും അവിടെ നിന്നും മദ്യം വാങ്ങാന് ഉപഭോക്താക്കള് നിര്ബന്ധിതമായി. പലപ്പോഴും ബിവ്റേജസ്, കണ്സ്യൂമര് ഫെഡ് ഔട്ട്ലെറ്റുകളെ ആപ്പ് ഒഴിവാക്കുന്നുവെന്നും പരാതി ഉയര്ന്നിരുന്നു. ഈ സാഹചര്യത്തിലാണ് ആപ്പ് പുതിയ പരിഷ്കരണവുമായി രംഗത്ത് വരുന്നത്. ഉപഭോക്താക്കള്ക്ക് ഇഷ്ടമുള്ള മദ്യ ഔട്ട്ലറ്റ് തിരഞ്ഞെടുക്കുന്ന രീതിയില് ബവ്ക്യൂ ആപ്പ് പരിഷ്കരിച്ചു. ഉപഭോക്താവ് നല്കുന്ന പിന്കോഡിന് അനുസരിച്ച് മദ്യശാലകള് ആപ്പ് നിര്ദേശിക്കുന്ന രീതിയായിരുന്നു ഇതുവരെ. ഗൂഗിളിന്റെയും ആപ്പിളിന്റെയും അനുമതി ലഭിച്ചാല് പുതിയ പരിഷ്ക്കാരങ്ങള് നാളെ മുതല് നടപ്പിലാകും. ഓണക്കാലം കഴിഞ്ഞാലും ഈ രീതി തുടരുമെന്ന് അധികൃതര് അറിയിച്ചു.
ഉപഭോക്താവ് ബവ്ക്യൂ ആപ്പില് പിന്കോഡ് കൊടുക്കുന്ന സമയത്ത് പിന്കോഡിന്റെ ദൂരത്തില് വരുന്ന ബാര്, ബവ്റിജസ്, കണ്സ്യൂമര് ഫെഡ് ഔട്ട്ലറ്റുകളുടെ വിവരങ്ങള് കാണാന് കഴിയും. ഉപഭോക്താവിന്റെ സൗകര്യമനുസരിച്ച് ഇതില് ഏതു വേണമെങ്കിലും തിരഞ്ഞെടുക്കാം. ആപ്പില് പിന്കോഡ് ഒരിക്കല് റജിസ്റ്റര് ചെയ്താല് മാറ്റാന് കഴിഞ്ഞിരുന്നില്ല. ഉപഭോക്താവിന് ഇനി ഏതു സമയത്തും പിന്കോഡ് മാറ്റാന് കഴിയും. ബുക്കിങ് സമയം ആപ്പായിരിക്കും തുടര്ന്നും നിശ്ചയിക്കുന്നത്. മാറ്റങ്ങള് പ്ലേസ്റ്റോറിലും ആപ്പ് സ്റ്റോറിലും അപ്ലോഡ് ചെയ്തിട്ടുണ്ടെന്നു കമ്പനി അധികൃതര് അറിയിച്ചു. ഗൂഗിള് അനുമതി ഇന്നു ലഭിക്കുമെന്നാണ് പ്രതീക്ഷ. ആപ് സ്റ്റോറിലും ബീറ്റ അപ്രൂവല് കിട്ടി. ഇനി പ്രൊഡക്ഷന് അപ്രൂവല് കിട്ടണം. പുതിയ മാറ്റങ്ങള് വരുന്നതോടെ ഉപഭോക്താക്കള് കൂടുമെന്നു ബവ്ക്യൂ ആപ്പ് നിര്മാതാക്കള് പറയുന്നു. പ്രതിദിനം ഒരു ലക്ഷംവരെ ഉപഭോക്താക്കള് വര്ധിക്കുമെന്നാണു കണക്കുകൂട്ടല്. ഇന്നലെ 2.80 ലക്ഷം ടോക്കണുകള് വിതരണം ചെയ്തു. ഓണക്കാലത്ത് പ്രതിദിനം 4 ലക്ഷം ബുക്കിങ് ഉണ്ടാകുമെന്നാണ് കണക്കാക്കപ്പെടുന്നത്. ഒരു ഔട്ട്ലറ്റില് ദിവസേന 800 പേര്ക്ക് മദ്യം വിതരണം ചെയ്യും.
മദ്യ വില്പനയ്ക്കുള്ള സര്ക്കാര് ഏജന്സികളായ ബിവറേജസ് കോര്പ്പറേഷന്റേയും കണ്സ്യൂമര്ഫെഡിന്റേയും വരുമാനത്തില് വലിയ കുറവാണുണ്ടായത് നേരത്തെ കണക്കുകള് പുറത്ത് വന്നിരുന്നു. ബിവറേജസ് കോര്പ്പറേഷന് ഔട്ട് ലെറ്റുകള് വഴി 162.64 കോടിരൂപയുടെ മദ്യമാണ് വിറ്റഴിച്ചത്. രണ്ടു മാസത്തെ ഇടവേളയ്ക്കുശേഷം മേയ് 28നാണ് സംസ്ഥാനത്ത് മദ്യ വില്പന ആരംഭിച്ചത്. അന്നു മുതല് ജൂണ് ആറുവരെയുള്ള ആറു വരെയുള്ള കണക്കാണിത്. ബിയര്വൈന് പാര്ലറുകളിലൂടേയും ബാറുകളിലൂടേയും വിറ്റ മദ്യത്തിന്റെ കണക്ക് ലഭ്യമല്ല.ബെവ്കോയുടെ 267 ഔട്ട്ലെറ്റുകളാണ് സംസ്ഥാനത്ത് പ്രവര്ത്തിക്കുന്നത്. ലോക്ക് ഡൗണിനു മുന്നേ ഒരു ദിവസത്തെ ശരാശരി മദ്യ വില്പന 22 മുതല് 32 കോടി രൂപവരെയായിരുന്നു. ചില ദിവസങ്ങളില് ഇത് ഉയരും. എന്നാല് ലോക്ക് ഡൗണിനു ശേഷം ബെവ്ക്യൂ ആപ്പ് വഴി മദ്യ വില്പന ആരംഭിച്ചപ്പോള് പ്രതിദിന ശരാശരി 20.33 കോടിയായി കുറഞ്ഞു.
ബിവറേജസ് കോര്പ്പറേഷന്റെ വെയര് ഹൗസുകളില് നിന്നാണ് ബാറുകള്ക്കും ബിയര്വൈന് പാര്ലറുകള്ക്കും മദ്യം നല്കുന്നത്. എട്ടുദിവസം ഇവിടെ നടന്നത് 310.44 കോടി രൂപയുടെ മദ്യ വില്പനയാണ്. ശരാശരി പ്രതിദിന വില്പന 38.85 കോടി രൂപ. ഇതും സാധാരണ വില്പനയെക്കാള് കുറവാണ്. ആപ്പിന്റെ സാങ്കേതിക തകരാറാകാം വില്പനയില് ഇടിവുണ്ടാക്കിയതെന്നാണ് ബെവ്കോയുടെ അനൗദ്യോഗിക വിശദീകരണം. എന്നാല് ആപ്പ് വഴി നല്കുന്ന ടോക്കണുകള് ഏറിയ പങ്കും ബാറുകളിലേക്കാണ് പോകുന്നതെന്ന പരാതികള് ഉയര്ന്നിരുന്നു. ബാറുകളെ സഹായിക്കാനാണ് സര്ക്കാര് ആപ്പ് കൊണ്ടുവന്നതെന്ന ആരോപണം പ്രതിപക്ഷവും ഉയര്ത്തിയിരുന്നു. ഇതില് വിജിലന്സ് അന്വേഷണവും പ്രതിപക്ഷം ആവശ്യപ്പെട്ടിട്ടുണ്ട്. ആപ്പ് പിന്വലിക്കണമെന്ന ആവശ്യവുമായി ബെവ്കോയിലെ ഭരണപ്രതിപക്ഷ യൂണിയനുകള് സര്ക്കാരിനെ സമീപിച്ചിട്ടുണ്ട്. ബെവ് കോ മാനെജ്മെന്റിനും സമാന നിലപാടായിരുന്നു. ഇത് പരിഹാരമാണ് ആപ്പിന്റെ പുതിയ പരിഷ്കരണം.
https://www.facebook.com/Malayalivartha