സാമ്പത്തിക പ്രതിസന്ധിയുടെ ഈ കാലത്തും സഹജീവിസ്‌നേഹത്തിന് അതിരില്ലാത്ത പിന്തുണ. മലപ്പുറം ജില്ലയിലെ അരിമണല്‍ ഉലുവാന്‍ അഷ്‌റഫിന്റെ മകന്‍ മുഹമ്മദ് അനീസിന്(24) ഒരു കൈത്താങ്ങാകാന്‍ ഒരു നാട് ഒന്നാകെ ശ്രമം നടത്തുകയാണ്. പതിമൂന്നാം വയസ്സില്‍ അനീസിന്റെ ഒരു വൃക്ക നീക്കം ചെയ്തിരുന്നു. 2 മാസം മുന്‍പ് രണ്ടാമത്തെ വൃക്കയും തകരാറിലായി.

അനീസിന്റെ(24) വൃക്കമാറ്റിവയ്ക്കുന്നതിനു പണം കണ്ടെത്താന്‍ എംഎസ്എഫ് പഞ്ചായത്ത് കമ്മിറ്റിയുടെ നേതൃത്വത്തില്‍ വിദ്യാര്‍ഥികള്‍ മന്തി ചാലഞ്ചുമായി രംഗത്ത്. സ്‌നേഹച്ചെമ്പ് എന്നു പേരിട്ട പരിപാടിയില്‍ ഭക്ഷണം ആവശ്യമുള്ളവരില്‍നിന്ന് മുന്‍കൂട്ടി ബുക്കിങ് സ്വീകരിച്ച് മന്തി വീട്ടില്‍ എത്തിച്ചുനല്‍കുകയാണ്. കോവിഡിന്റെ പശ്ചാത്തലത്തില്‍ പണപ്പിരിവ് നടത്താനുള്ള പ്രയാസമാണ് ഭക്ഷണമെത്തിച്ച് പണം സ്വരൂപിക്കാന്‍ പ്രേരണയായത്. സമൂഹ മാധ്യമങ്ങളിലൂടെയും പ്രചാരം നല്‍കിയിരുന്നു.

സംഗതി കേട്ടറിഞ്ഞതോടെ ഭക്ഷണത്തിനാവശ്യമായ പലവ്യഞ്ജനങ്ങളും മറ്റും പലരും വാഗ്ദാനം ചെയ്തു. പുന്നക്കാട് ചുങ്കം കല്ലായി റസാഖ് സൗജന്യമായി ഭക്ഷണം പാകം ചെയ്യാന്‍ മുന്നോട്ടുവന്നു. 200 ഓര്‍ഡര്‍ പ്രതീക്ഷിച്ച സ്ഥാനത്ത് 500-ല്‍ ഏറെ പേരാണ് ഭക്ഷണം ബുക് ചെയ്തത്. ഒരു ദിവസം മാത്രം വിതരണം ചെയ്യാന്‍ കരുതിയ സ്ഥാനത്ത് പല ദിവസങ്ങളിലായാണ് ഇപ്പോള്‍ ഭക്ഷണ വിതരണം. സ്‌നേഹച്ചെമ്പിലൂടെ 2 ലക്ഷം രൂപ സമാഹരിക്കാനാവുമെന്ന് പ്രസിഡന്റ് ടി.ആദില്‍ ജഹാന്‍ പറഞ്ഞു.

പണം സമാഹരിക്കാന്‍ പഞ്ചായത്തംഗം കുര്യച്ചന്‍ ചെയര്‍മാനായും മഠത്തില്‍ അംജദ് കണ്‍വീനറായും കമ്മിറ്റി രൂപീകരിച്ചു ഫെഡറല്‍ ബാങ്ക് കരുവാരകുണ്ട് ശാഖയില്‍ അക്കൗണ്ട് തുടങ്ങി. നമ്പര്‍: 16300100114624. ഐഎഫ്എസ് കോഡ്-FDRL 0001630.