യു.എ.ഇ കോണ്സുലേറ്റില് എത്തിയത് 17000 കിലോ ഈന്തപഴം; ഈന്തപഴം എത്തിച്ചത് കോണ്സുലേറ്റ് ജനറലിന്റെ സ്വന്തം ആവശ്യത്തിന്, അതും മൂന്നരവര്ഷത്തനിടെ; എത്തിയത് ഈന്തപഴം തന്നെയാണോ; കസ്റ്റംസ് അന്വേഷണം ആരംഭിച്ചു
നയതന്ത്രപാക്കേജ് വഴി സ്വര്ണ്ണം കടത്തിയ സംഭവത്തില് യു.എ.ഇ കോണ്സുലേറ്റിനും ബന്ധമുണ്ടെന്ന് നേരത്തെ വാര്ത്തകളുണ്ടായിരുന്നു. ഇതിനെ സാധുകരിക്കുന്ന വിവരങ്ങളാണ് ഇപ്പോള് പുറത്ത് വരുന്നത്. യു.എ.ഇ കോണ്സുലേറ്റ് ജനറല് സ്വന്തം ആവശ്യത്തിന് ഇറക്കുമതി ചെയ്തത് 17000 കിലോ ഈന്തപഴം. അതും മൂന്നര വര്ഷം കൊണ്ട്. യു.എ.ഇ. കോണ്സുലേറ്റ് 2016 ഒക്ടോബറില് തുടങ്ങിയശേഷം ഏറ്റവുമധികം വന്നത് ഈന്തപ്പഴമാണെന്നു കണ്ടെത്തി. കോണ്സുല് ജനറലിന്റെ സ്വന്തം ആവശ്യത്തിനെന്നപേരില് 17,000 കിലോഗ്രാമാണ് യു.എ.ഇ.യില്നിന്ന് എത്തിയത്. തിരുവനന്തപുരം വിമാനത്താവളത്തില് സ്വര്ണം പിടിച്ച നയതന്ത്രബാഗിലും ഈന്തപ്പഴമുണ്ടായിരുന്നു. ഇതിന്റെ അടിസ്ഥാനത്തില് തിരുവനന്തപുരത്തെ എല്ലാ കോണ്സുലേറ്റുകളുടെയും നയതന്ത്ര ഇറക്കുമതികള് അന്വേഷിക്കാന് കസ്റ്റംസിനു നിര്ദ്ദേശം. യു.എ.ഇ. കോണ്സുലേറ്റിന്റെ പേരില് വന്ന നയതന്ത്ര ബാഗേജുകള് സംശയമുനയിലായതിനെത്തുടര്ന്നാണിത്.
മൂന്നരവര്ഷത്തിനിടെ ഒരാളുടെയോ കോണ്സുലേറ്റിന്റെയോ ആവശ്യത്തിന് ഇത്രയധികം ഈന്തപ്പഴം ഇറക്കുമതി ചെയ്തതില് അസ്വഭാവികതയുണ്ടെന്നാണ് വിലയിരുത്തല്. വ്യക്തിപരമായ ആവശ്യത്തിന് വിദേശത്തുനിന്ന് എന്തുകൊണ്ടുവരാനും പരിധി നിശ്ചയിച്ചിട്ടുണ്ട്. ഇത്രയധികം അളവിലെത്തുന്ന സാധനം 'വാണിജ്യ ആവശ്യത്തിന്' എന്നാണ് കസ്റ്റംസ് കണക്കാക്കുക. ഇതിന് വിലയുടെ 38.5 ശതമാനം കസ്റ്റംസ് ഡ്യൂട്ടി നിലവില് അടയ്ക്കണം. ഇതിനു തയ്യാറായില്ലെങ്കില് പിടിച്ചുവെയ്ക്കുകയാണു ചെയ്യാറുള്ളത്. കോണ്സുലേറ്റിലെ എല്ലാവരും വീതംവെച്ചു എന്ന് അവകാശപ്പെട്ടാല്പ്പോലും ഇത്രയധികം ഈന്തപ്പഴം എത്തിയെന്നത് അമ്പരപ്പുണ്ടാക്കുന്നതാണ്. ഇതേക്കുറിച്ച് സംസ്ഥാന പ്രോട്ടോകോള് വിഭാഗത്തില് യു.എ.ഇ. കോണ്സുലേറ്റ് എന്ത് അറിയിപ്പാണ് നല്കിയതെന്ന് ഞങ്ങള് പരിശോധിക്കുന്നുണ്ടെന്നും ഉന്നത കസ്റ്റംസ് ഉദ്യോഗസ്ഥന് പറഞ്ഞു.
സ്വന്തം ആവശ്യത്തിനെന്ന പേരില് വന്നത് പുറത്തേക്കു നല്കരുതെന്നാണു നിയമം. പുറത്ത് നല്കിയിട്ടുണ്ടെങ്കില് കസ്റ്റംസ് നിശ്ചയിക്കുന്ന നികുതിയടയ്ക്കണം. സാധാരണഗതിയില് അന്താരാഷ്ട്ര കരാറനുസരിച്ച് കോണ്സുല്ജനറലോ കോണ്സുലേറ്റുകളോ വിദേശമന്ത്രാലയത്തിനു കീഴിലുള്ള സ്ഥാപനങ്ങളോ പുറമേനിന്നു കൊണ്ടുവരുന്ന സാധനങ്ങള്ക്ക് നികുതി ഈടാക്കാറില്ല. വിദേശകാര്യമന്ത്രാലയത്തിന്റെ സെക്രട്ടേറിയറ്റുകള് വഴിയാണ് നികുതി ഒഴിവാക്കി കൊടുക്കാറുള്ളത്. മന്ത്രാലയ സെക്രട്ടേറിയറ്റുകള് ഇല്ലാത്ത കേരളംപോലുള്ള സംസ്ഥാനങ്ങളില് ഈ ചുമതല സംസ്ഥാന പ്രോട്ടോകോള് ഓഫീസിനാണ്. എന്നാല്, കഴിഞ്ഞ വര്ഷങ്ങളിലൊന്നും യു.എ.ഇ. കോണ്സുലേറ്റില്നിന്ന് നയതന്ത്ര ബാഗേജുകള്ക്ക് നികുതി ഒഴിവാക്കിനല്കാന് ആവശ്യം വന്നിരുന്നില്ലെന്ന് സംസ്ഥാന പ്രോട്ടോകോള് ഓഫീസര് നേരത്തേ അറിയിച്ചിട്ടുണ്ട്. സ്വകാര്യ ആവശ്യത്തിനെന്ന പേരില് ഭക്ഷണവസ്തുക്കള്, ശൗചാലയ ഉപകരണങ്ങള്, ഗൃഹോപകരണങ്ങള് എന്നിവയടക്കം നയതന്ത്ര ബാഗേജായി എത്തിയിട്ടുണ്ട്. ഇതെല്ലാം ശരിയാണോ എന്നതിലാണ് അന്വേഷണം. തിരുവനന്തപുരത്തെ മറ്റു കോണ്സുലേറ്റുകള് ഇത്തരം ഇറക്കുമതിയുടെ വിവരങ്ങള് സംസ്ഥാന പ്രോട്ടോകോള് ഓഫീസില് അറിയിച്ചിട്ടുണ്ടോ എന്നും പരിശോധിക്കുന്നുണ്ട്.
കാര്ഗോ ക്ലിയറന്സിന് സംസ്ഥാനത്തിന്റെ സര്ട്ടിഫിക്കേഷന് വേണമെന്ന ചട്ടം യു.എ.ഇ കോണ്സുലേറ്റ് പാലിക്കാറില്ലെന്ന് പ്രോട്ടോക്കോള് വിഭാഗം നേരത്തെ സര്ക്കാരിനെ അറിച്ചിരുന്നു. മാര്ച്ച് 23ന് വല്ലാര്പാടം ടെര്മിനലില് വന്ന ബാഗേജ് കസ്റ്റംസില് നിന്ന് കഌയര് ചെയ്ത് കിട്ടിയതിന്റെ തെളിവുകളോടെയാണ് വിവരങ്ങല് കൈമാറിയത്. 20 ലക്ഷം രൂപ വരെ വിലവരുന്ന നയതന്ത്ര ബാഗ്ഗേജുകലുടെ ക്ലിയറന്സിന് നികുതി ഇളവ് ലഭിക്കാന് പ്രോട്ടോക്കോള് വിഭാഗത്തിന്റെ സര്ട്ടിഫിക്കേഷന് നിര്ബന്ധമാണ്. പക്ഷേ ഇതൊന്നും യു.എ.ഇ കോണ്സിലേറ്റ് പാലിച്ചിരുന്നില്ല. ഇതിനിടെ തിരുവനന്തപുരം സ്വര്ണക്കടത്ത് കേസില് യു.എ.ഇ. കോണ്സുലേറ്റിലെ അറ്റാഷെയുടെ മൊഴിയെടുക്കാന് ഇന്ത്യ അനുമതി തേടിയിരുന്നു. പക്ഷേ ഇതുവരെ അന്വേഷണ സംഘത്തിന് അറ്റാഷെയെ ചോദ്യം ചെയ്യാന് സാധിച്ചിട്ടുമില്ല.
https://www.facebook.com/Malayalivartha