ഉപ്പുതറ സെന്റ് ഫിലോമിനാസ് സ്‌കൂളില്‍ സൂക്ഷിച്ചിട്ടുള്ള ജെസിബി, എമര്‍ജന്‍സി ലൈറ്റ് എന്നിവ, ഉപ്പുതറ പുത്തന്‍പുരയ്ക്കല്‍ ബോബന്റെയും പീരുമേട് താലൂക്ക് ആശുപത്രിയിലെ നഴ്‌സായ ഷൈനിയുടെയും മകനായ കെല്‍വിന്റെ അഭിരുചിയുടേയും മിടുക്കിന്റേയും സാക്ഷ്യങ്ങളാണ്.

നാം ഉറക്കത്തില്‍ കാണുന്നതല്ല സ്വപ്നം, നമ്മുടെ ഉറക്കം നഷ്ടപ്പെടുത്തുന്നതാണ് യഥാര്‍ഥ സ്വപ്നമെന്ന മുന്‍ രാഷ്ട്രപതി എ.പി.ജെ അബ്ദുല്‍കലാമിന്റെ ഈ വാക്കുകള്‍ കെല്‍വിന്റെ ജീവിതത്തിലും സംഭവിച്ചു. അടുത്തിടെയായി കെല്‍വിന്റെ ഉറക്കം കെടുത്തുകയായിരുന്നു ഒരു ഡ്രോണ്‍ സ്വന്തമായി നിര്‍മ്മിക്കണമെന്ന സ്വപ്‌നം.

ഈ പത്താം ക്ലാസുകാരന്‍ വിദ്യാര്‍ഥി തന്റെ കഠിനപരിശ്രമം കൊണ്ടു തന്റെ ഉറക്കം കളഞ്ഞ ഡ്രോണ്‍ എന്ന സ്വപ്നം യാഥാര്‍ഥ്യമാക്കി എടുത്തു. ആരും അവിശ്വസിക്കേണ്ട! യൂട്യൂബില്‍ തിരഞ്ഞായിരുന്നു ഡ്രോണ്‍ നിര്‍മാണത്തിനു തുടക്കം. പിന്നീട് ഇതിനാവശ്യമായ നിര്‍മാണ സാമഗ്രികള്‍ സംഘടിപ്പിക്കുന്നതായിരുന്നു വെല്ലുവിളി.

ഓണ്‍ലൈനിലൂടെ ഹരിയാന, ബെംഗളൂരു, മഹാരാഷ്ട്ര എന്നിവിടങ്ങളില്‍ നിന്നായി ഇലക്ട്രിക് സ്പീഡ് കണ്‍ട്രോളര്‍, മോട്ടര്‍, ഫ്‌ലൈറ്റ് കണ്‍ട്രോളര്‍ റിമോട്ട് കണ്‍ട്രോളര്‍ ആന്‍ഡ് റിസീവര്‍, ലിപ്പോ ബാറ്ററി, എന്നിവ വാങ്ങിയെടുത്തു. സാധനങ്ങള്‍ എത്താന്‍ വന്ന കാലതാമസവും നിര്‍മാണവും എല്ലാം കൂടി 6 മാസമെടുത്തു ഡ്രോണ്‍ നിര്‍മാണം പൂര്‍ത്തിയാകാന്‍.

വീടിനു സമീപത്തെ പള്ളിയുടെ മൈതാനത്ത് 1000 അടി ഉയരത്തില്‍ 1.5 കിലോമീറ്റര്‍ ദൂരം ഡ്രോണ്‍ പറത്തുകയും ചെയ്തു . സാധാരണ ഡ്രോണില്‍ നിന്നും ഇതിനുളള ഏകവ്യത്യാസം ക്യാമറ ഇല്ല എന്നതാണ്. ക്യാമറ സ്ഥാപിക്കാന്‍ നിയമപരമായ നടപടികള്‍ ആവശ്യമായതിനാല്‍ ഇതിനു ശ്രമിച്ചില്ല.

ഹൈസ്‌കൂള്‍ മുതല്‍ ഇത്തരം പ്രവര്‍ത്തനങ്ങളില്‍ തല്‍പരന്‍ ആയിരുന്നു. ഇനി അടുത്ത ലക്ഷ്യം ചെറുവിമാനം നിര്‍മിക്കുകയാണെന്നു പ്ലസ് വണ്‍ പ്രവേശനം കാത്തിരിക്കുന്ന കെല്‍വിന്‍ പറയുന്നു.