മുഖ്യമന്ത്രിയുടെ മുന്‍ പ്രിന്‍സിപ്പള്‍ സെക്രട്ടറി എം. ശിവശങ്കറിന്റെ മൊഴി പിണറായി വിജന്‍ പെടുത്തി. കസ്റ്റംസിന്റെ ആവര്‍ത്തിച്ചുള്ള ചോദ്യം ചെയ്യലില്‍ ശിവശങ്കര്‍ നല്‍കിയ മറുപടിയാണ് ഇനി അന്വേഷണം മുഖ്യമന്ത്രിയുടെ ഓഫീസില്‍ എത്താതെ വഴിയില്ല നിലയില്‍ എത്തിച്ചിരിക്കുന്നത്. ലൈഫ് മിഷന്‍ ഇടപാടും ഈന്തപ്പഴ വിതരണവുമാണ് മുഖ്യമന്ത്രിയുടെ ഓഫീസിനെ ബന്ധിപ്പിക്കുന്നതിന് നിലവില്‍ അന്വേഷണ ഏജന്‍സികള്‍ക്ക് ലഭിച്ചിരിക്കുന്ന മൊഴികള്‍. ഓരോ അന്വേഷണ ഏജന്‍സികളും എം.ശിവശങ്കറിനെ ചോദ്യം ചെയ്യുമ്പോള്‍ അടുത്തത് മുഖ്യമന്ത്രിയുടെ ഓഫീസിലേക്കോ എന്ന് സംശയം ബലപ്പെടുകയാണ്. ഈന്തപ്പഴ വിതരണം നടന്നത് മുഖ്യമന്ത്രിയുടെ കോണ്‍ഫറന്‍സ് ഹാളിലാണെന്ന് സ്വര്‍ണക്കടത്തു പ്രതികളുടെ മൊഴിയില്‍ നിന്ന് ഇതിനോടകം തന്നെ വ്യക്തമായിട്ടുണ്ട്.

ലൈഫ് മിഷന്‍ ഇടപാടിലും തദ്ദേശസ്വയംഭരണ വകുപ്പും മുഖ്യമന്ത്രിയുടെ ഓഫീസും സംശയനിഴലിലാണ്. എന്നാല്‍ ഒരുതരത്തിലുള്ള തെറ്റായ ഇടപെടലുകള്‍ക്കും കൂട്ടുനിന്നിട്ടില്ലെന്ന് ഉറപ്പിച്ച് പറയുന്ന മുഖ്യമന്ത്രി ഏതു തരത്തിലുള്ള അന്വേഷണവും നടക്കട്ടേ എന്ന നിലപാടിലാണ്. സിപിഎമ്മും സിപിഐയും അന്വേഷണ ഏജന്‍സികളെ സംശയിച്ചപ്പോഴും മുഖ്യമന്ത്രി അതിന് തയാറായിട്ടില്ല. എന്നാല്‍ മണിക്കൂറുകളോളും ശിവശങ്കര്‍ ആവര്‍ത്തിച്ച് ചോദ്യം ചെയ്യപ്പെടുന്നത് സര്‍ക്കാരിനെ ആശങ്കപ്പെടുത്തുന്നുണ്ട്. ഒരു അന്വേഷണ ഏജന്‍സിയും ശിവശങ്കറിന് ക്ലീന്‍ ചിറ്റ് കൊടുക്കാന്‍ തയാറായിട്ടുമില്ല. അന്വേഷണം ഇഴച്ചു നീക്കി സര്‍ക്കാരിനെ പ്രതിരോധത്തിലാക്കാനുള്ള നീക്കമാണ് അന്വേഷണ ഏജന്‍സികള്‍ നടത്തുന്നുവെന്ന് വികാരം സര്‍ക്കാരില്‍ തന്നെയുണ്ട്.എന്നാല്‍ പരസ്യമായി പറയാതെ അന്വേഷണം തിരിച്ചടിയാകില്ലെന്ന പ്രതീക്ഷ പ്രകടിപ്പിക്കുകയാണ് സര്‍ക്കാര്‍ വൃത്തങ്ങള്‍.

യു.എ.ഇ. കോണ്‍സുലേറ്റിന്റെ മതഗ്രന്ഥവിതരണവും ഈന്തപ്പഴവിതരണവും മുഖ്യമന്ത്രിയുടെ അറിവോടെയല്ലെന്ന് മുന്‍ പ്രിന്‍സിപ്പല്‍ സെക്രട്ടറി എം. ശിവശങ്കര്‍. ഈന്തപ്പഴവിതരണത്തില്‍ മുഖ്യമന്ത്രിയോട് ഒരുമിനിറ്റ് നേരത്തേക്ക് വന്ന് ഉദ്ഘാടനംചെയ്യാന്‍ താനാണ് ആവശ്യപ്പെട്ടതെന്ന് ശിവശങ്കര്‍ വെളിപ്പെടുത്തി. അറിവില്ലായിരുന്നെങ്കില്‍ മുഖ്യമന്ത്രി എങ്ങനെയാണ് പദ്ധതി ഉദ്ഘാടനം ചെയ്യാന്‍ തയ്യാറായതെന്ന ചോദ്യത്തിന് ശിവശങ്കര്‍ മറുപടി പറഞ്ഞത്, താന്‍ നിര്‍ബന്ധിച്ചതുകൊണ്ടുമാത്രമെന്നാണ്. ഇതിനെ തുടര്‍ന്ന് ഈന്തപ്പഴവിതരണത്തിലും മതഗ്രന്ഥം സ്വീകരിച്ച വിഷയത്തിലും ശിവശങ്കറിന്റെ മൊഴിയില്‍ വ്യക്തതവരുത്താന്‍ മുഖ്യമന്ത്രിയുടെ ഓഫീസിലെ ചില ഉദ്യോഗസ്ഥരോട് വിശദീകരണം ചോദിക്കാന്‍ കസ്റ്റംസ് തീരുമാനിച്ചു.

അതെ സമയം കോണ്‍സുലേറ്റില്‍നിന്ന് മതഗ്രന്ഥം സ്വീകരിച്ചതിന് മന്ത്രി കെ.ടി. ജലീലിനെ പരസ്യമായി ന്യായീകരിക്കുമ്പോഴും ഇതേക്കുറിച്ച് മുഖ്യമന്ത്രിക്ക് അറിവുണ്ടായിരുന്നില്ലെന്നാണ് ശിവശങ്കര്‍ പറയുന്നത്. മന്ത്രി ജലീല്‍ മതഗ്രന്ഥം സ്വീകരിക്കുന്നതിനുമുമ്പ് സര്‍ക്കാരില്‍നിന്ന് ഒരുതരത്തിലുള്ള അനുമതിയും ചോദിച്ചിട്ടില്ലായിരുന്നുവെന്ന് ശിവശങ്കറിന്റെ മൊഴിയോടെ വ്യക്തമായി. അനുമതി വാങ്ങിയില്ലായിരുന്നെന്ന് മൊഴിവന്നതോടെ വിഷയത്തില്‍ മന്ത്രി ജലീലിനെ കസ്റ്റംസ് ചോദ്യംചെയ്‌തേക്കുമെന്നാണ് സൂചന.