തളരും പിന്നീട് കുതിക്കും; ഇന്ത്യയെ കുറിച്ച് ഐ.എം.എഫ്; 2021 ല് വളര്ച്ചയില് ഒന്നാമത്തേതും; ഇപ്പോഴും ലോകത്തിലെ ഏറ്റവും വേഗത്തില് വളരുന്ന സാമ്പത്തിക ശക്തി ഇന്ത്യ; സമ്പദ്വ്യവസ്ഥ 10.3 ശതമാനം കുറയും, 2021 ല് 8.8 ശതമാനമായി ഉയരുകയും ചെയ്യും
കൊറോണ വൈറസ് മഹാമാരിയുടെ പശ്ചാത്തലത്തില് ബാധിച്ച ഇന്ത്യന് സമ്പദ്വ്യവസ്ഥ ഈ വര്ഷം 10.3 ശതമാനം ചുരുങ്ങുമെന്ന് അന്താരാഷ്ട്ര നാണയ നിധി ചൊവ്വാഴ്ച അറിയിച്ചു. എന്നിരുന്നാലും, 2021 ല് ഇന്ത്യ 8.8 ശതമാനം വളര്ച്ചാ നിരക്കിലേക്ക് കുതിച്ചുകയറാന് സാധ്യതയുണ്ടെന്നും, അങ്ങനെ അതിവേഗം വളരുന്ന സമ്പദ് വ്യവസ്ഥ എന്ന സ്ഥാനം വീണ്ടെടുക്കുകയും ചൈനയുടെ പ്രതീക്ഷിച്ച വളര്ച്ചാ നിരക്കായ 8.2 ശതമാനത്തെ മറികടക്കുകയും ചെയ്യും എന്നും റിപ്പോര്ട്ട് വ്യക്തമാക്കി. ഐഎംഎഫിന്റെയും ലോക ബാങ്കിന്റെയും വാര്ഷിക യോഗങ്ങള്ക്ക് മുന്നോടിയായി പുറത്തിറക്കിയ റിപ്പോര്ട്ടില് ആഗോള വളര്ച്ച ഈ വര്ഷം 4.4 ശതമാനം ചുരുങ്ങുമെന്നും 2021 ല് 5.2 ശതമാനമായി ഉയരുമെന്നും പറയുന്നു.
അമേരിക്കയുടെ സമ്പദ്വ്യവസ്ഥ 2020 ല് 5.8 ശതമാനം ചുരുങ്ങുമെന്നും അടുത്ത വര്ഷം 3.9 ശതമാനം വളര്ച്ച കൈവരിക്കുമെന്നും ഇതോടൊപ്പം ഐഎംഎഫ് അറിയിച്ചു. മൊത്ത ആഭ്യന്തര ഉത്പാദനം രണ്ടാം പാദത്തില് പ്രതീക്ഷിച്ചതിലും അധികമായി ചുരുങ്ങിയ ഇന്ത്യയെ സംബന്ധിച്ചിടത്തോളം തിരിച്ചടികള് പ്രവചനത്തിലെ വിലയിരുത്തലുകളില് വിചാരിച്ചിരുന്നതിനേക്കാള് വലുതാണെന്ന് ഐ.എം.എഫ് റിപ്പോര്ട്ടില് പറയുന്നു. തല്ഫലമായി, 2020 ല് സമ്പദ്വ്യവസ്ഥ 10.3 ശതമാനം കുറയുമെന്ന് പ്രവചിക്കപ്പെടുന്നു, എന്നാല് ഇതില് നിന്നും ഇന്ത്യ കര കയറുകയും 2021 സാമ്പത്തിക വളര്ച്ച ല് 8.8 ശതമാനമായി ഉയരുകയും ചെയ്യും. അതെ സമയം 2019 ല് ഇന്ത്യയുടെ വളര്ച്ചാ നിരക്ക് 4.2 ശതമാനമായിരുന്നു.
ഇന്ത്യയുടെ ജിഡിപി ഈ സാമ്പത്തിക വര്ഷം 9.6 ശതമാനം കുറയുമെന്ന് ലോക ബാങ്ക് കഴിഞ്ഞ ആഴ്ച വ്യക്തമാക്കിയിരുന്നു. മാര്ച്ചില് ആരംഭിച്ച സാമ്പത്തിക വര്ഷത്തില് ഇന്ത്യയുടെ ജിഡിപി 9.6 ശതമാനം ചുരുങ്ങുമെന്നാണ് പ്രതീക്ഷിച്ചിരുന്നത് , 'ദക്ഷിണേഷ്യയിലെ സാമ്പത്തിക ഫോക്കസ് റിപ്പോര്ട്ടിന്റെ ഏറ്റവും പുതിയ ലക്കത്തില് ലോക ബാങ്ക് പറഞ്ഞു. നമ്മള് മുമ്പ് കണ്ടിട്ടുള്ളതിലും വളരെ മോശമാണ് ഇന്ത്യയില് സ്ഥിതി, 'ദക്ഷിണേഷ്യയുടെ ലോക ബാങ്ക് ചീഫ് ഇക്കണോമിസ്റ്റ് ഹാന്സ് ടിമ്മര് കഴിഞ്ഞ ആഴ്ച ഒരു കോണ്ഫറന്സ് കോളില് മാധ്യമപ്രവര്ത്തകരോട് പറഞ്ഞു.' ഇത് ഇന്ത്യയിലെ അസാധാരണമായ ഒരു സാഹചര്യമാണ്.ഈ വര്ഷം രണ്ടാം പാദത്തില് ജിഡിപിയില് 25 ശതമാനം ഇടിവ് രേഖപ്പെടുത്തി, ഇത് ഇന്ത്യയിലെ നടപ്പു സാമ്പത്തിക വര്ഷത്തിന്റെ ആദ്യ പാദമാണ്. വൈറസിന്റെ വ്യാപനവും നിയന്ത്രണ നടപടികളും ഇന്ത്യയിലെ സപ്ലൈ , ഡിമാന്ഡ് സാഹചര്യത്തെ സാരമായി ബാധിച്ചുവെന്നും റിപ്പോര്ട്ടില് പറയുന്നു.
അഭൂതപൂര്വമായ അളവില് രാജ്യം ചുരുങ്ങുമെന്നാണ് പ്രതീക്ഷിക്കുന്നതെങ്കിലും, 2022 സാമ്പത്തിക വര്ഷത്തില് കുത്തനെയുള്ള 8% വളര്ച്ചാ നിരക്കോടെ തകര്ന്ന സാമ്പത്തിക വ്യവസ്ഥയെ ഇന്ത്യക്ക് വീണ്ടെടുക്കാന് ആകുമെന്നും അന്താരാഷ്ട്ര നാണ്യ നിധി പറയുന്നു. പക്ഷേ, അത് സംഭവിക്കാന് ഇന്ത്യന് സര്ക്കാര് മറ്റ് രാജ്യങ്ങള് നടപ്പിലാക്കിയ സാമ്പത്തിക നടപടികളില് നിന്നും അല്പം പഠിക്കേണ്ടതുണ്ട്.
കോവിഡ് മഹാമാരിയുടെ പശ്ചാത്തലത്തില് ഏറ്റവും മോശം പ്രകടനം നടത്തിയ സമ്പദ്വ്യവസ്ഥകളില് ഒന്നായി ഇന്ത്യയെ മാറ്റിയത് സാമ്പത്തിക ഉത്തേജന പാക്കേജുകളുടെ സ്വഭാവത്തിലും വലുപ്പത്തിലുമുള്ള വ്യത്യാസമാണ്. മിക്ക വികസിത സമ്പദ്വ്യവസ്ഥകളും വലിയ തോതില് സാമ്പത്തിക ഉത്തേജന പാക്കേജുകള് വളരെ വേഗത്തില് നല്കിക്കൊണ്ടാണ് പകര്ച്ചവ്യാധികളില് നിന്നുള്ള നാശനഷ്ടങ്ങള് പരിമിതപ്പെടുത്താന് സഹായിച്ചതെന്ന് ഐഎംഎഫ് പറഞ്ഞു. വികസിത സമ്പദ്വ്യവസ്ഥയില് മൊത്ത ആഭ്യന്തര ഉല്പാദനത്തിന്റെ (ജിഡിപി) ശരാശരി 9 ശതമാനം സാമ്പത്തിക ഉത്തേജന പാക്കേജുകള് നല്കുവാന് മാറ്റി വച്ചിട്ടുണ്ടെന്ന് റിപ്പോര്ട്ടില് പറയുന്നു. ജിഡിപിയുടെ 2 ശതമാനത്തില് താഴെ മാത്രം ഉള്ള നേരിട്ടുള്ള ധനപരമായ ഉത്തേജനത്തോടെ ഇന്ത്യ സാമ്പത്തിക നടപടികളില് പിന്നിലാണ്. 'ഇന്ത്യയെ സംബന്ധിച്ചിടത്തോളം ചെയ്യേണ്ടത് , ധനപരമായ പിന്തുണയുടെ ഘടന മാറ്റുക എന്നതാണ് ക്രെഡിറ്റ് ഗ്യാരണ്ടി അഥവാ കൂടുതല് കടം കൊടുക്കുന്നതിനു ബാങ്കുകളെ പ്രോത്സാഹിപ്പിക്കുന്നത് പോലുള്ള പരോക്ഷ നടപടികള്ക്ക് പകരം ഉപഭാക്താക്കള്ക്ക് കൂടുതല് നേരിട്ടുള്ള പിന്തുണയിലേക്കായിരിക്കണം,' ഐഎംഎഫിലെ ലോക സാമ്പത്തിക പഠന മേധാവി മല്ഹര് നബാര് ഒരു വെര്ച്വല് കോണ്ഫറന്സില് പറഞ്ഞു. നിലവില് ഇന്ത്യന് സര്ക്കാര് വിഭവങ്ങളുടെ പുനര് വിന്യാസം , കടം കൊടുക്കുന്നത് വര്ധിപ്പിക്കല് തുടങ്ങിയ പരോക്ഷ സാമ്പത്തിക ഉത്തേജനത്തെയാണ് നിലവില് ആശ്രയിച്ചിരിക്കുന്നത്. അതിനു പകരം നികുതി വെട്ടിക്കുറവ് പോലുള്ള നേരിട്ടുള്ള ആനുകൂല്യങ്ങള് നല്കണം എന്നാണ് ഐ.എം.എഫ് വ്യക്തമാക്കുന്നത്.
ഇന്ത്യ പോലുള്ള ധനപരമായ നിയന്ത്രണമുള്ള രാജ്യങ്ങള്ക്ക് നല്കാന്, ഐഎംഎഫിന് ചില ഉപദേശങ്ങളുണ്ട്. നിയന്ത്രിത ധനസ്ഥിതിയില്പ്പോലും, കൂടുതല് ഉത്തേജനം ആവശ്യമുള്ള സമ്പദ്വ്യവസ്ഥയുടെ ഭാഗങ്ങളിലേക്ക് നിലവില് ഉപയോഗശൂന്യമായി കിടക്കുന്ന സബ്സിഡികള് തിരിച്ചുവിടാന് സര്ക്കാരുകള്ക്ക് കഴിയുമെന്ന് ചീഫ് ഇക്കണോമിസ്റ്റ് ഗീത ഗോപിനാഥ് വിശ്വസിക്കുന്നു. സാമ്പത്തിക വ്യവസ്ഥയുടെ വീണ്ടെടുക്കല് പ്രോത്സാഹിപ്പിക്കുന്നതിന്, പൊതുചെലവുകള് ക്രമേണ നിക്ഷേപത്തിലേക്ക് പതുക്കെ മാറ്റി സ്ഥാപിക്കണമെന്ന് ഐഎംഎഫിന്റെ സാമ്പത്തിക വിലയിരുത്തല് റിപ്പോര്ട്ട് പറയുന്നു. അതായത് നിലവിലെ സാഹചര്യം അല്പം മോശമാണെങ്കിലും ചെറിയ ചില മാറ്റങ്ങളിലൂടെ കോവിഡ് മഹാമാരി കാരണം അല്പം കഷ്ടത്തിലായ ഇന്ത്യന് സാമ്പത്തിക വ്യവസ്ഥയെ ഉയര്ത്തി കൊണ്ട് വരാനും. അടുത്ത വര്ഷങ്ങളില് തന്നെ ലോകത്തിലെ ഏറ്റവും വേഗത്തില് വളരുന്ന സാമ്പത്തിക ശക്തി എന്ന സ്ഥാനം ഇന്ത്യക്ക് തിരിച്ചെടുക്കാനും കഴിയും എന്നാണ് അന്താരാഷ്ട്ര നാണ്യനിധി വ്യക്തമാക്കുന്നത്.
https://www.facebook.com/Malayalivartha