39 വര്ഷം മുമ്പ് അവര് ഒന്നായിരുന്നു; അന്ന് സംഭവിച്ചത് ഇതാണ്; കേരള കോണ്ഗ്രസിന്റെ പിറവി മുതല് ഇന്നുവരെയുള്ള മുന്നണി മാറ്റങ്ങളുടെ കഥ; ഒപ്പം കേരള കോണ്ഗ്രസിന്റെ പിളര്പ്പും ഒത്തുചേരലുകളും; എല്.ഡി.എഫ്, യു.ഡി.എഫ് സമീപനങ്ങള്
കേരള കോണ്ഗ്രസ് (എം) ഇടതു മുന്നണിയുമായി ബന്ധം പുനഃസ്ഥാപിക്കുന്നത് 39 വര്ഷത്തിനു ശേഷമാണ്. ഇടതുമുന്നണിയുമായി സഹകരിച്ചു പ്രവര്ത്തിക്കാന് തീരുമാനിച്ചതായി കേരളാ കോണ്ഗ്രസ് എം ചെയര്മാന് ജോസ് കെ മാണിയുടെ പ്രഖ്യാപിച്ചതോടെ ആ പഴയ ബന്ധത്തിന് അന്ന് സംഭവിച്ച് എന്താണ് എന്നും പരിശോധിക്കുകയാണ് ചിലര്. ഒന്നാം നായനാര് മന്ത്രിസഭക്കുള്ള പിന്തുണ 1981 ഒക്ടോബര് 20 ന് മാണി ഗ്രൂപ്പ് പിന്വലിച്ചതിനു ശേഷം എല്ഡിഎഫുമായി വിപുലമായൊരു സഹകരണം ഇതാദ്യമാണ്. കേരള കോണ്ഗ്രസിന്റെ പിറവി മുതല് ഇന്നുവരെയുള്ള മുന്നണി മാറ്റങ്ങളുടെ കഥ.
1964 ല് രൂപമെടുത്ത കേരള കോണ്ഗ്രസ് പാര്ട്ടി അഞ്ചു വര്ഷത്തിനു ശേഷം 1969 ലാണ് ഏതെങ്കിലു മുന്നണിയുമായി സഖ്യത്തില് ഏര്പ്പെടുന്നത്. സി.അച്യുതമേനോന്റെ നേതൃത്വത്തില് രൂപമെടുത്ത സര്ക്കാരില് കേരള കോണ്ഗ്രസിന്റെ പ്രതിനിധിയായി 1969 നവംബര് ഒന്നിന് കെ.എം.ജോര്ജ് അംഗമായതോടെ പാര്ട്ടിയുടെ മുന്നണി ബന്ധത്തിനു തുടക്കമായത്. ഈ സര്ക്കാരില് സിപിഐ, മുസ്ലിംലീഗ്, എസ്എസ്പി എന്നിവര്ക്കൊപ്പമാണു കേരള കോണ്ഗ്രസ് അധികാരം പങ്കിട്ടത്. അന്നു കോണ്ഗ്രസ് സര്ക്കാരിനെ പുറത്തു നിന്നു പിന്തുണക്കുകയായിരുന്നു.
1970 ലെ നിയമസഭാ സ്വതന്ത്ര നിലപാട്; 1971 ലെ ലോക്സഭാ തിരഞ്ഞെടുപ്പില് കോണ്ഗ്രസിനൊപ്പം ഐക്യമുന്നണിയില്. തിരഞ്ഞെടുപ്പിനു ശേഷം സഖ്യം വിട്ടു. 1970 ലെ നിയമസഭാ തിരഞ്ഞെടുപ്പില് കേരള കോണ്ഗ്രസ് ഈ ഐക്യമുന്നണിയുടെ ഭാഗമായിരുന്നില്ല. മത്സരിക്കുന്ന സീറ്റുകളെ ചൊല്ലിയുള്ള തര്ക്കത്തില് കേരള കോണ്ഗ്രസ് മുന്നണി വിട്ടു. പിന്നീട് 1971 ലെ ലോക്സഭാ തിരഞ്ഞെടുപ്പില് കേരള കോണ്ഗ്രസ് ഐക്യമുന്നണിയുമായി സഖ്യത്തിലാണു മത്സരിച്ചത്. തിരഞ്ഞെടുപ്പിനു ശേഷം ഈ സഖ്യം തുടര്ന്നില്ല. മാര്ക്സിസ്റ്റ് പാളയത്തിലേക്കു കേരള കോണ്ഗ്രസിനെ എത്തിക്കാനുള്ള ശ്രമം ഇക്കാലത്തുണ്ടായെങ്കിലും പരാജയപ്പെടുകയായിരുന്നു.
ഇതിനിടിയില് 1975 ജൂണ് 25 ന് രാജ്യത്ത് അടിയന്തരാവസ്ഥ പ്രഖ്യാപിച്ചു. തുടര്ന്നുണ്ടായ ചര്ച്ചകള്ക്കൊടുവില് കേരള കോണ്ഗ്രസ് ഡിസംബര് 26 ന് അച്യുതമേനോന് മന്ത്രിസഭയില് ചേര്ന്നു. കെ.എം.മാണിയും ആര്.ബാലകൃഷ്ണപിള്ളയുമാണു മന്ത്രിമാരായത്. ഇക്കാലത്തു തന്നെ ആര്.ബാലകൃഷ്ണപിള്ള കേരള കോണ്ഗ്രസ് നേതൃത്വവുമായി പിണങ്ങി. പിള്ള വിഭാഗം 1977 ജനുവരി 29 ന് മാര്ക്സിസ്റ്റ് മുന്നണിയുടെ ഭാഗമായി മാറി. 1977 ലെ തിരഞ്ഞെടുപ്പില് മാണി വിഭാഗം ഐക്യമുന്നണിക്കൊപ്പവും ബാലകൃഷ്ണപിള്ള വിഭാഗം ഇടതു ചേരിയിലുമാണ് ജനവിധി തേടിയത്.
കേരള കോണ്ഗ്രസ് മാണി, ജോസഫ് വിഭാഗങ്ങളായി 1979 ജൂലൈ 15 നെടുകെ പിളര്ന്നു. ജോസഫ് ഗ്രൂപ്പ് പ്രതിനിധിയായിരുന്ന ടി.എസ്.ജോണിനെ പികെവി മന്ത്രിസഭയില് നിന്നു പുറത്താക്കാത്തതില് പ്രതിഷേധിച്ചു കെ.എം.മാണി മന്ത്രിസഭയില് നിന്നും മുന്നണിയില് നിന്നും പിന്മാറി. ഈ പിളര്പ്പ് കെ.എം.മാണിയെ സിപിഎമ്മിലേയ്ക്ക് അടുപ്പിച്ചു. 1979 നവംബര് 14 ന് ഇടതുപക്ഷവുമായി ചേര്ന്നു. 1980 ലെ ലോക്സഭാ, നിയമസഭാ തിരഞ്ഞെടുപ്പുകളില് മാണി ഇടതുമുന്നണിയുടെ ഭാഗമായി. സിപിഎം 11 വര്ഷത്തെ ഇടവേളക്കു ശേഷം അധികാരത്തിലെത്തി. കെ.എം.മാണി 1980ലെ നായനാര് മന്ത്രിസഭയില് ധനകാര്യമന്ത്രിയായിരുന്നു.
കെ.എം.മാണി 1981 ഒക്ടോബര് 20 ന് ഇടതുമുന്നണിക്കു നല്കിയ പിന്തുണ പിന്വലിച്ചതോടെ നായനാര് സര്ക്കാര് നിലംപതിച്ചു. രണ്ടു വര്ഷത്തെ ഇടതു ബന്ധം ഉപേക്ഷിച്ചു മാണി വീണ്ടും ജനാധിപത്യ മുന്നണിയുടെ ഭാഗമായി. മാണിക്കൊപ്പം ജോസഫ് വിഭാഗവും യുഡിഎഫിലെ ഘടകകക്ഷിയായിരുന്നു. കേരള കോണ്ഗ്രസ് ജോസഫ് വിഭാഗം 1989 ലെ ലോക്സഭാ തിരഞ്ഞെടുപ്പിലുണ്ടായ സീറ്റു തര്ക്കത്തെ തുടര്ന്നു യുഡിഎഫ് വിട്ടു. പി.ജെ.ജോസഫ് മൂവാറ്റുപുഴയില് സ്വതന്ത്രനായി മത്സരിച്ചെങ്കിലും വിജയിച്ചില്ല. പിന്നീട് 1991 ഏപ്രില് 13ന് ജോസഫ് വിഭാഗം എല്ഡിഎഫിന്റെ ഭാഗമായി. 19 വര്ഷം പി.ജെ.ജോസഫ് എല്ഡിഎഫിന്റെ ഭാഗമായിരുന്നു.
ജോസഫ് ഗ്രൂപ്പ് 2010 ഏപ്രില് 30ന് എല്ഡിഎഫ് വിടുകയും മേയ് 27ന് മാണി വിഭാഗം കേരള കോണ്ഗ്രസില് പാര്ട്ടി ലയിക്കുകയും ചെയ്തു. 2011, 2016 നിയമസഭാ തിരഞ്ഞെടുപ്പുകളില് കേരള കോണ്ഗ്രസ് (എം) യുഡിഎഫിനൊപ്പമാണു മത്സരിച്ചത്. 2016 ഓഗസ്റ്റ് ഏഴിന് കേരള കോണ്ഗ്രസ് (എം) യുഡിഎഫുമായുള്ള ബന്ധം ഉപേക്ഷിച്ചു. യുഡിഎഫ് ബന്ധം വിച്ഛേദിക്കപ്പെട്ടതിനു ശേഷവും നിയമസഭക്ക് അകത്തും തദ്ദേശസ്ഥാപനങ്ങളിലും മാണി ഗ്രൂപ്പ് എല്ഡിഎഫുമായി അകലം പാലിച്ചിരുന്നു. ദേശീയതലത്തില് യുപിഎയ്ക്കു പ്രശ്നാധിഷ്ഠിത പിന്തുണ നല്കി. നിയമസഭയില് പ്രത്യേക ബ്ലോക്ക്. കോട്ടയം ജില്ലാ പഞ്ചായത്ത് പ്രസിഡന്റ് തിരഞ്ഞെടുപ്പില് മാണിഗ്രൂപ്പ് ഇടതുമുന്നണിയുമായി കൈകോര്ത്തു. 2018 ജൂണ് 8ന് വീണ്ടും യുഡിഎഫില്.
2019 ഏപ്രില് 9 ന് കേരള കോണ്ഗ്രസ് (എം) ചെയര്മാന് കെ.എം.മാണി അന്തരിച്ചു. തുടര്ന്ന് പാര്ട്ടി നേതൃത്വത്തെ ചെല്ലി തര്ക്കം. പാര്ട്ടി അനൗദ്യോഗിക പിളര്പ്പിലേക്ക്. 2019 ലെ പാലാ ഉപതിരഞ്ഞെടുപ്പില് ജോസ് വിഭാഗം സ്ഥാനാര്ഥിക്ക് അപ്രതീക്ഷിത തോല്വി. കേരള കോണ്ഗ്രസുകള് തമ്മിലുള്ള തര്ക്കം രൂക്ഷമായി. കോട്ടയം ജില്ലാ പഞ്ചായത്ത് പ്രസിഡന്റ് സ്ഥാനത്തെ ചൊല്ലി ജോസഫ്, ജോസ് വിഭാഗങ്ങള് തമ്മില് തര്ക്കം. കരാര് ലംഘിച്ച ജോസ് വിഭാഗത്തെ 2020 ജൂണ് 29ന് യുഡിഎഫില് നിന്നു പുറത്താക്കി. അതിന് ശേഷം മൂന്ന് മാസങ്ങള്ക്ക് ശേഷമാണ് ഇടതുമുന്നണിക്ക് എന്ന പ്രഖ്യാപനം ജോസ് വിഭാഗം നടത്തുന്നത്.
https://www.facebook.com/Malayalivartha