പരസ്യമായി സമ്മതിക്കുന്നില്ലെങ്കിലും ജോസ് കെ. മാണി വിഭാഗം യു.ഡി.എഫ് വിട്ടു പോയത് യു.ഡി.എഫിന് വലിയ ക്ഷീണമാണ് സമ്മാനിച്ചിരിക്കുന്നത്. ഇതിന് പിന്നാലെയാണ് മുഴുവന്‍ സീറ്റും ചോദിച്ച് യു.ഡി.എഫ് പാളയത്തില്‍ പി.ജെ ജോസഫ് പടയൊരുക്കം തുടങ്ങയിത്. നിയമസഭാ സീറ്റുകള്‍ക്കായുള്ള പി.ജെ.ജോസഫിന്റെ അവകാശവാദത്തില്‍ യുഡിഎഫ് നേതൃത്വത്തിന് അതൃപ്തിയുണ്ട്. കേരളകോണ്‍ഗ്രസ് (എം) എല്‍ഡിഎഫിന്റെ ഭാഗമാകുമ്പോള്‍ യുഡിഎഫിനുള്ള പരുക്ക് മാറ്റേണ്ട ഈ സമയത്ത് നിയമസഭാ സീറ്റുകളെക്കുറിച്ചു ചര്‍ച്ച സൃഷ്ടിച്ചത് അനവസരത്തിലായെന്ന വികാരമാണു നേതൃത്വത്തിനുള്ളത്.

കഴിഞ്ഞ യുഡിഎഫ് യോഗത്തിനുശേഷം കോണ്‍ഗ്രസ് നേതൃത്വം പി.ജെ.ജോസഫുമായി പ്രത്യേകം ചര്‍ച്ച നടത്തിയിരുന്നു. തദ്ദേശ തിരഞ്ഞെടുപ്പു മുന്നില്‍ കണ്ടു മധ്യകേരളത്തില്‍ സ്വീകരിക്കേണ്ട തന്ത്രങ്ങളും പ്രവര്‍ത്തനങ്ങളുമാണു വിലയിരുത്തിയത്. ജോസ് പക്ഷത്തിന്റെ പോക്ക് യുഡിഎഫിനു നഷ്ടമുണ്ടാക്കില്ലെന്ന് ഉറപ്പിക്കാനുള്ള നടപടികള്‍ ആലോചിച്ചു. കെ.എം.മാണിയുടെ പൈതൃകമുള്ള പാര്‍ട്ടിയെ ഉപേക്ഷിക്കുകയും ജോസഫിനെ കൂടെ നിര്‍ത്തുകയും ചെയ്ത സാഹചര്യത്തില്‍ യുഡിഎഫിന്റെ കേരളകോണ്‍ഗ്രസ് മുഖമായി ജോസഫ് മുന്നില്‍ നില്‍ക്കണമെന്നായിരുന്നു ആവശ്യം. ജോസ് വിഭാഗത്തില്‍ നിന്ന് ആളുകളെ അടര്‍ത്തിയെടുക്കുന്നതും ചര്‍ച്ച ചെയ്തു. തദ്ദേശ, നിയമസഭാ തിരഞ്ഞെടുപ്പുകളില്‍ മാന്യമായ പരിഗണന ഉറപ്പു നല്‍കി. ഇതിനിടയിലാണു കഴിഞ്ഞതവണ കേരളകോണ്‍ഗ്രസ് മത്സരിച്ച മുഴുവന്‍ സീറ്റുകളും ജോസഫ് ചോദിച്ചത്. അവരുടെ ആവശ്യം കോണ്‍ഗ്രസ് നേതാക്കള്‍ കയ്യോടെ തള്ളി. പുതിയ സാഹചര്യം ചര്‍ച്ച ചെയ്യാനായി കോട്ടയത്ത് ഇന്നു ജില്ലാ കോണ്‍ഗ്രസ് നേതൃയോഗം ചേരും. മധ്യകേരളത്തില്‍ ഉമ്മന്‍ചാണ്ടിയുടെ കൂടുതല്‍ ശക്തമായ ഇടപെടലുകളും കോണ്‍ഗ്രസ് ആലോചിക്കുന്നു.

ജോസ് വിഭാഗം യു.ഡി.എഫ് വിട്ടപ്പോള്‍ കോണ്‍ഗ്രസിലെ ഒരു വിഭാഗത്തിന് അത് വലിയ ആശ്വാസമായിരുന്നു. ഉമ്മന്‍ചാണ്ടിയും തിരുവഞ്ചൂര്‍ രാധാകൃഷ്ണനുമല്ലാതെ കോട്ടയത്ത് നിന്നും കോണ്‍ഗ്രസിന്റെ കൂടുതല്‍ ജനപ്രതിനിധികളെ നിയമസഭയില്‍ എത്തിക്കാന്‍ ഇതു സഹായിക്കുമെന്നാണ് കണക്കൂട്ടിയത്. പ്രധാനമായും കോണ്‍ഗ്രസിലെ എ വിഭാഗത്തിനാണ് ജോസ് വിഭാഗം യു.ഡി.എഫ് വിട്ടത്തില്‍ ഏറ്റവും അധികം പ്രയോജനം ലഭിക്കുക. അതായത് ജോസ് വിഭഗത്തിന് നല്‍കിയിരുന്ന സീറ്റുകള്‍ ഇനി കോണ്‍ഗ്രസ് ഏറ്റെടുക്കുമെന്നാണ് പ്രതീക്ഷിക്കപ്പെടുന്നത്. പി.ജെ ജോസഫിന്റെ ശക്തി കേന്ദ്രം ഇടുക്കിയാതുകൊണ്ടു തന്നെ അവര്‍ തടസവാദം ഉന്നയിക്കില്ലെന്നും കോണ്‍ഗ്രസ് കണക്കു കൂട്ടി. എന്നാല്‍ ഇതിന് വിരുദ്ധമായ നിലപാടാണ് ഇപ്പോള്‍ പി.ജെ. ജോസഫ് വിഭാഗം സ്വീകരിച്ചിരിക്കുന്നത്. കേരളാ കോണ്‍ഗ്രസ് എം യു.ഡി.എഫില്‍ മത്സരിച്ച മുഴുവന്‍ സീറ്റുകളും പി.ജെ. ജോസഫ് ആവശ്യപ്പെടുകയാണ്. ഇവിടെ കണക്ക് കൂട്ടല്‍ പിഴക്കുന്നത് ഉമ്മന്‍ചാണ്ടി ഉള്‍പ്പെടുന്ന എ വിഭാഗത്തിന്റെതായതുകൊണ്ടു തന്നെ യു.ഡി.എഫില്‍ ഈ ആവശ്യം വരും നാളുകളില്‍ കോളിളക്കം സൃഷ്ടിക്കുമെന്ന് തന്നെയാണ് പ്രതീക്ഷിക്കപ്പെടുന്നത്.

കഴിഞ്ഞ തിരഞ്ഞെടുപ്പില്‍ കേരള കോണ്‍ഗ്രസ് (എം) മത്സരിച്ച എല്ലാ സീറ്റും ഇത്തവണയും അവകാശപ്പെട്ടതാണെന്ന് പി.ജെ. നടത്തിയത്. മുന്‍പ് ജോസ് വിഭാഗം മത്സരിച്ച സീറ്റുകളും അവര്‍ പുറത്തുപോയ സ്ഥിതിക്ക് ജോസഫ് ഗ്രൂപ്പിന് അവകാശപ്പെട്ടതാണെന്നും അതില്‍ കൂടുതല്‍ സീറ്റുകള്‍ ആവശ്യപ്പെടില്ലെന്നുമാണ് ജോസഫ് പറയുന്നത്. വിജയസാധ്യത പരിഗണിച്ച് സീറ്റ് വച്ചുമാറ്റത്തിനു തയാറാണ്. തദ്ദേശ തിരഞ്ഞെടുപ്പില്‍ കേരള കോണ്‍ഗ്രസ് മത്സരിച്ച എല്ലാ സീറ്റുകളിലും തങ്ങള്‍ മത്സരിക്കും. ജോസ് കെ.മാണിയെ നേതാക്കള്‍ ഏറെയും കൈവിട്ടു. കള്ളം പറയുന്ന റോഷി അഗസ്റ്റിന്‍ മാത്രമാണ് കൂടെയുള്ളതെന്നും പി.ജെ. ജോസഫ് ആരോപിച്ചു. എന്നാല്‍ ജോസഫ് വിഭാഗത്തെ ദുര്‍ബലപ്പെടുത്തുന്ന ഒരു നീക്കവും സീറ്റ് ചര്‍ച്ചയില്‍ ഉണ്ടാകില്ലെന്നു യുഡിഎഫ് കണ്‍വീനര്‍ എം.എം. ഹസന്‍ പറയുന്നത്.