രാജ്യത്തിന്റെ ഓരോ തുണ്ട് ഭൂമിയും കാത്തുസൂക്ഷിക്കും; ചൈനക്കും പ്രതിപക്ഷത്തിനും മറുപടി ; അമിത്ഷായുടെ ശബ്ദം, മോദിസര്‍ക്കാരിന്റെ ജാഗ്രത; ചൈനീസ് സൈനികരോട് യുദ്ധത്തിന് തയാറാകാന്‍ പ്രസിഡന്റ് ഷീജിങ് പിങ്; ഇന്ത്യന്‍ സൈന്യം ഏത് അടിയന്തര സാഹചര്യത്തേയും നേരിടാന്‍ തയാറെന്ന് അമിത് ഷാ
ചൈന സൃഷ്ടിക്കുന്ന അതിര്‍ത്തി പ്രശ്‌നങ്ങള്‍ക്ക് ഇന്ത്യ സേന അതിര്‍ത്തിയില്‍ തിരിച്ചടികള്‍ നല്‍കുമ്പോള്‍ കേന്ദ്രസര്‍ക്കാര്‍ നയപരമായി നീക്കത്തിലൂടെ ചൈനയെ ലോകരാജ്യങ്ങള്‍ക്കിടയില്‍ ഒറ്റപ്പെടുത്തുകയുമാണ്. എന്നാല്‍ ലഡാക്ക് സംഘര്‍ഷം കേന്ദ്രസര്‍ക്കാരിനെതിരെ ആയുധമാക്കുന്ന നിലപാടാണ് കോണ്‍ഗ്രസ് ഉള്‍പ്പെടെയുള്ള പ്രതിപക്ഷ കക്ഷികള്‍ സ്വീകരിച്ചത്. ഇതിന് കൃത്യമായൊരു മറുപടിയാണ് കേന്ദ്ര ആഭ്യന്തരമന്ത്രി അമിത് ഷാ നല്‍കിയിരിക്കുന്നത്. രാജ്യത്തിന്റെ ഓരോ തുണ്ട് ഭൂമിയും കാത്തുസൂക്ഷിക്കാന്‍ മോദി സര്‍ക്കാര്‍ പൂര്‍ണ ജാഗ്രത പുലര്‍ത്തുന്നുണ്ടെന്നും ആര്‍ക്കും അത് കൈക്കലാക്കാന്‍ കഴിയില്ലെന്നും കേന്ദ്ര ആഭ്യന്തരമന്ത്രി അമിത് ഷാ. ലഡാക്കില്‍ ചൈനയുമായി തുടരുന്ന സംഘര്‍ഷം പരിഹരിക്കാന്‍ സര്‍ക്കാര്‍ സാധ്യമായ എല്ലാ സൈനിക, നയതന്ത്ര നടപടികളും സ്വീകരിക്കുമെന്നും അദ്ദേഹം പറഞ്ഞു. ചൈനയുമായുള്ള ഉരസല്‍ നിരന്തരം തുടരുന്നതിനിടയിലാണ് കേന്ദ്ര ആഭ്യന്തരമന്ത്രിയുടെ പരാമര്‍ശം.
'നമ്മുടെ ഓരോ തുണ്ട് ഭൂമിയും ജാഗ്രതയോടെ കാത്തുസൂക്ഷിക്കുന്നുണ്ട്. ആര്‍ക്കും അത് അപഹരിക്കാനാവില്ല. രാജ്യത്തിന്റെ പരമാധികാരവും അതിര്‍ത്തിയും സംരക്ഷിക്കാന്‍ നമ്മുടെ പ്രതിരോധ സേനയ്ക്കും നേതൃത്വത്തിനും കഴിവുണ്ട് ' അദ്ദേഹം ഒരു ദേശീയ ചാനലിന് നല്‍കിയ അഭിമുഖത്തില്‍ പറഞ്ഞു. ഇന്ത്യന്‍ സൈന്യം ഏത് അടിയന്തര സാഹചര്യത്തേയും നേരിടാന്‍ തയാറാണെന്നും അമിത് ഷാ പറഞ്ഞു. 'എല്ലാ രാജ്യങ്ങളും യുദ്ധത്തിന് തയാറാണ്. സൈന്യത്തെ പരിപാലിക്കുന്നതിന്റെ ഉദ്ദേശ്യം ഏത് തരത്തിലുള്ള ആക്രമണത്തോടും പ്രതികരിക്കുക എന്നതാണ്. ഏതെങ്കിലും പ്രത്യേക അഭിപ്രായങ്ങളെ പരാമര്‍ശിച്ചല്ല ഞാന്‍ ഇത് പറയുന്നത്. പക്ഷേ ഇന്ത്യയുടെ പ്രതിരോധ സേന എല്ലായ്പ്പോഴും തയ്യാറാണ്.' അദ്ദേഹം പറഞ്ഞു.
ചൈനീസ് സൈനികരോട് യുദ്ധത്തിന് തയാറാകാന്‍ പ്രസിഡന്റ് ഷീജിങ് പിങ് ആവശ്യപ്പെട്ടതിന് പിന്നാലെയാണ് ഷായുടെ പരാമര്‍ശം. രാജ്യത്തോട് വിശ്വസ്തത പുലര്‍ത്താനും തികഞ്ഞ ജാഗ്രതയോടെയിരിക്കാനും സൈനികരോട് ഷീജിങ് പിങ് നിര്‍ദേശിച്ചതായി റിപ്പോര്‍ട്ടുകളുണ്ടായിരുന്നു. ഗുവാങ്‌ഡോങ് സൈനിക ക്യാമ്പ് സന്ദര്‍ശിച്ച ഷി ജിന്‍പിങ് സൈനികരോട് മനസ്സും ഊര്‍ജവും യുദ്ധ തയ്യാറെടുപ്പുകള്‍ക്കായി സമര്‍പ്പിക്കാനും ജാഗ്രത പാലിക്കാനും നിര്‍ദേശിച്ചതായി സിഎന്‍എന്‍ ആണ് റിപ്പോര്‍ട്ടുചെയ്തത്. ചൈനീസ് വാര്‍ത്താ ഏജന്‍സിയായ ഷിന്‍ഹുവയെ ഉദ്ധരിച്ചാണ് റിപ്പോര്‍ട്ട്. പോരാട്ടശേഷി ഉയര്‍ത്തുന്ന നടപടികള്‍ വേഗത്തിലാക്കുക, ബഹുവിധ കഴിവുകളുളള കരുത്തുറ്റ ശക്തിയെ കെട്ടിപ്പടുക്കുക, ദ്രുതപ്രതികരണം ഉറപ്പാക്കുക എന്നീ കാര്യങ്ങള്‍ക്ക് ഊന്നല്‍ കൊടുത്താണ് ഷി സൈനികരെ അഭിസംബോധന ചെയ്തതെന്ന് വാര്‍ത്താ ഏജന്‍സി റിപ്പോര്‍ട്ട് ചെയ്തു.
എന്നാല്‍ ആരെ ഉദ്ദേശിച്ചാണ് ഷി ജിന്‍പിങ് സൂചിപ്പിച്ചത് എന്ന് വ്യക്തമല്ല. ഇന്ത്യക്ക് പുറമേ യുഎസുമായും ചൈന നല്ല ബന്ധത്തിലല്ല. ഇന്ത്യയും ചൈനയും തമ്മിലുളള സംഘര്‍ഷത്തിന്റെ പശ്ചാത്തലത്തില്‍ ചൊവ്വാഴ്ച ഇന്ത്യയും ചൈനയും ഏഴാംവട്ട കമാന്‍ഡര്‍ തല ചര്‍ച്ചകള്‍ നടത്തിയിരുന്നു. മെയ് മാസത്തിലാണ് ലഡാക്കില്‍ ഇന്ത്യയും ചൈനയും തമ്മിലുളള സംഘര്‍ഷം ആരംഭിക്കുന്നത്. ജൂണില്‍ ഇരുസൈന്യവും ഗാല്‍വന്‍ താഴ് വരയില്‍ ഏറ്റുമുട്ടിയിരുന്നു. 20 ഇന്ത്യന്‍ സൈനികരാണ് അന്ന് വീരമൃത്യുവരിച്ചത്. ചൈനീസ് സൈന്യത്തിനും ആള്‍നാശമുള്‍പ്പടെ ഉണ്ടായെങ്കിലും സ്ഥിരീകരണം നടത്താന്‍ ചൈന തയ്യാറായിരുന്നില്ല. സംഘര്‍ഷം പരിഹരിക്കുന്നതിനായി നിരവധി തവണ സൈനിക, നയതന്ത്ര, മന്ത്രിതല ചര്‍ച്ചകള്‍ ഇരുരാജ്യങ്ങളും തമ്മില്‍ നടന്നിരുന്നു.
അതെ സമയം ഇന്ത്യ-ചൈന അതിര്‍ത്തി സംഘര്‍ഷത്തിന്റെ പശ്ചാത്തലത്തില്‍ പാര്‍ലമെന്ററി പാനല്‍ ഈ മാസം അവസാനം ലഡാക്ക് സന്ദര്‍ശിക്കാന്‍ ഒരുങ്ങുകയാണ്. ഒക്ടോബര്‍ 28, 29 തീയതികളില്‍ നടക്കുന്ന ദ്വിദിന സന്ദര്‍ശനത്തില്‍ പാര്‍ലമെന്ററി പാനല്‍ സൈനികരെ സന്ദര്‍ശിച്ച് അവരുടെ തൊഴില്‍ സാഹചര്യങ്ങളെക്കുറിച്ച് വിലയിരുത്തും. കോണ്‍ഗ്രസ് എം.പി. അധീര്‍ രഞ്ജന്‍ ചൗധരിയുടെ നേതൃത്വത്തിലുള്ള പബ്ലിക് അക്കൗണ്ട്‌സ് കമ്മിറ്റി അംഗങ്ങളാണ് ലഡാക്കിലെ ലേ സന്ദര്‍ശിക്കുന്നത്. ലഡാക്കില്‍ വിന്യസിച്ചിരിക്കുന്ന സൈനികര്‍ക്ക് ഉയര്‍ന്ന പ്രദേശത്ത് ഉപയോഗിക്കുന്ന വസ്ത്രങ്ങളുടെയും മറ്റ് ഉപകരണങ്ങളുടെയും അഭാവമുണ്ടെന്ന സിഎജി റിപ്പോര്‍ട്ടിനേ തുടര്‍ന്നാണ് പാര്‍ലമെന്റ് പാനലിന്റെ സന്ദര്‍ശനം.
ലോക്‌സഭ സ്പീക്കര്‍ ഓം ബിര്‍ളയ്ക്ക് കഴിഞ്ഞ മാസം ചൗധരി കത്തെഴുതിയതിനെ തുടര്‍ന്നാണ് സന്ദര്‍ശനം നിശ്ചയിച്ചിരിക്കുന്നത്. പബ്ലിക് അക്കൗണ്ട്‌സ് കമ്മിറ്റിയെ ലഡാക്ക് സെക്ടര്‍ സന്ദര്‍ശിച്ച്, അവിടെ വിന്യസിച്ചിരിക്കുന്ന സൈനികരുമായി സംവദിക്കാനും അവരുടെ ജോലി സാഹചര്യങ്ങളും ആവശ്യകതകളും മനസിലാക്കാനും അനുവദിക്കണമെന്നാവശ്യപ്പെട്ടാണ് ചൗധരി കത്തെഴുതിയത്. ചീഫ് ഓഫ് ഡിഫന്‍സ് സ്റ്റാഫ് ജനറല്‍ ബിപിന്‍ റാവത്തുമായി പിഎസി സെപ്റ്റംബര്‍ ആറിന് നടത്തിയ ചര്‍ച്ചയില്‍ സൈനികരുടെ റേഷന്‍, വസ്ത്രം എന്നിവയുമായി ബന്ധപ്പെട്ട ചില പ്രശ്‌നങ്ങള്‍ ചര്‍ച്ച ചെയ്തിരുന്നു. യോഗത്തില്‍ എംപിമാരുടെ ലഡാക്ക് സന്ദര്‍ശനത്തെക്കുറിച്ച് പിഎസി ചെയര്‍മാന്‍ സംസാരിച്ചിരുന്നു. തുടര്‍ന്നാണ് അധീര്‍ രഞ്ജന്‍ ചൗധരി ലോക്‌സഭാ സ്പീക്കര്‍ക്ക് കത്തയച്ചത്.
https://www.facebook.com/Malayalivartha
