കേരളത്തിന്റെ അതിര്‍ത്തി മേഖലകളില്‍ തമിഴ് ചുമരെഴുത്തുകാര്‍ക്കു പൊന്നും വില. തമിഴിലുള്ള ചുമരെഴുത്തുകള്‍ വൈകിയതോടെ മുന്നണികളും സ്ഥാനാര്‍ഥികളും വെട്ടിലായി. കോവിഡ് നിയന്ത്രണങ്ങളില്‍ കുരുങ്ങി തമിഴ്‌നാട്ടില്‍നിന്നു ചുമരെഴുത്തിന് ആളെ കിട്ടാതായതോടെ പല മുന്നണികളും ഇപ്പോഴും നെട്ടോട്ടത്തിലാണ്.

കോയമ്പത്തൂര്‍ ചാവടി, മധുക്കര, ഗാന്ധിപുരം, പുതൂര്‍, കുനിയംപുത്തൂര്‍, ഈറോഡ്, സേലം, തിരുപ്പൂര്‍, ആനമല തുടങ്ങിയ ഭാഗങ്ങളില്‍നിന്നാണ് എഴുത്തുകാരെ എത്തിച്ചിരുന്നത്. വാളയാര്‍ ഉള്‍പ്പെടെ പലയിടത്തും ഇപ്പോഴും ചുമരുകളില്‍ 'ബുക്ക്ഡ്' എന്നു മാത്രമാണുള്ളത്. തമിഴ് എഴുത്തുകാരെ കിട്ടിയാലെ ഇവിടങ്ങളിലെ ചുമരുകളില്‍ എഴുത്തും സ്ഥാനാര്‍ഥികളുടെ മനസ്സും തെളിയുകയുള്ളു.

പലരും കേരളത്തിലേക്കു വരാന്‍ മടിക്കുകയാണെന്ന് മുന്നണികള്‍ പറയുന്നു. ഇവരെ എത്തിക്കാനും പെടാപാടുണ്ട്. കോവിഡ്-19 പോര്‍ട്ടലില്‍ റജിസ്‌ട്രേഷന്‍ നടത്തിയാണ് എത്തിക്കുന്നത്. പ്രതിസന്ധികള്‍ തരണം ചെയ്ത് എത്തിച്ചവരാകട്ടെ വലിയ ഡിമാന്‍ഡാണു മുന്നോട്ടുവയ്ക്കുന്നത്.

സാധാരണ ചുമരെഴുത്തുകാര്‍ക്കു ലഭിക്കുന്നതു 700-800 രൂപവരെയാണ്. എന്നാല്‍ തമിഴ് എഴുത്തുകാര്‍ക്ക് ദിവസം 1300-1600 രൂപ വരെ കൂലിയായി നല്‍കണം. ഒപ്പം ഭക്ഷണവും. തമിഴ് എഴുത്തുകാര്‍ക്കു താമസസൗകര്യം വരെ നല്‍കുന്ന മുന്നണികളുണ്ട്.