തദ്ദേശ തെരഞ്ഞെടുപ്പ് കൊടുപിരികൊണ്ടിരിക്കുന്ന സമയത്തുണ്ടായ കെ.എസ്.എഫ്.ഇ ശാഖകളില്‍ നടന്ന വിജിലന്‍സ് റെയ്ഡിലൂടെ മുഖ്യമന്ത്രി പിണറായി വിജയന്‍ ലക്ഷ്യമിട്ടത് എന്താണെന്ന ചോദ്യം കേരള രാഷ്ട്രീയത്തില്‍ വലിയ ചര്‍ച്ചയാകുകയാണ്. കണ്ണൂര്‍ ലോബിക്കെതിരെ പാര്‍ട്ടിയില്‍ ഉയരുന്ന വെല്ലുവിളി തടയിടാനാണോ പിണറായി വിജയന്റെ ഈ നീക്കം എന്നാണ് സംശയക്കുന്നത്. പിണറായി വിരുദ്ധ ചേരിക്ക് നേതൃത്വം നല്‍കുന്നതില്‍ മുന്നില്‍ നില്‍ക്കുന്നത് തോമസ് ഐസക്കാണ്. തോമസ് ഐസക്കിനെ ഒതുക്കാനുള്ള പിണറായിയുടെ തന്ത്രമാണ് വിജിലന്‍സ് അന്വേഷണമെന്നാണ് രാഷ്ട്രീയ നിരീക്ഷകര്‍ വിലയിരുത്തുന്നത്. ഇതിലൂടെ ആഭ്യന്തര വകുപ്പില്‍ നിയന്ത്രണം നഷ്ടമായില്ലെന്ന് പറയാതെ പറയാന്‍ എല്ലാം കുറ്റവും ഏറ്റെടുക്കുകയാണ് മുഖ്യമന്ത്രി പിണറായി വിജയന്‍. തദ്ദേശ തെരഞ്ഞെടുപ്പിന് ശേഷം പാര്‍ട്ടിയിലെ ഭിന്നാഭിപ്രായക്കാരെ കൃത്യമായി തന്നെ കൈകാര്യം ചെയ്യുമെന്ന സൂചനകളാണ് സിപിഎമ്മില്‍ പിണറായി പക്ഷം നല്‍കുന്നത്.

ഇതിന്റെ സൂചനയാണ് സി.പി.എമ്മിന്റെ കേന്ദ്ര നേതൃത്വവും നല്‍കുന്നത്. കെഎസ്എഫ്ഇ റെയ്ഡ് വിവാദവുമായി ബന്ധപ്പെട്ട് സംസ്ഥാനത്തെ നേതാക്കളുടെ പരസ്യപ്രസ്താവനയില്‍ സിപിഎം കേന്ദ്ര നേതൃതം അതൃപ്തി രേഖപ്പെടുത്തിയിരിക്കുകയാണ്. തോമസ് ഐസക്ക് ഉള്‍പ്പടെയുള്ള മുതിര്‍ന്ന നേതാക്കള്‍ വികാരപരമായി പ്രതികരിച്ചത് ശരിയായില്ലെന്ന നിലപാടിലാണ് കേന്ദ്ര നേതൃത്വം. പ്രസ്താവനകള്‍ നടത്തുമ്പോള്‍ ജാഗ്രത വേണമെന്ന നിലപാട് കേന്ദ്ര നേതാക്കള്‍ ആവര്‍ത്തിക്കുന്നു. വിജിലന്‍സ് നടത്തിയ റെയ്ഡുമായി ബന്ധപ്പെട്ട കാര്യങ്ങളില്‍ സംസ്ഥാനത്ത് ചര്‍ച്ച നടത്തി ഉചിതമായ തീരുമാനം എടുക്കും. തെരഞ്ഞെടുപ്പ് അടുത്ത സാഹചര്യത്തില്‍ ജാഗ്രത പുലര്‍ത്താനുള്ള നിര്‍ദ്ദേശം മുതിര്‍ന്ന നേതാക്കള്‍ക്ക് നല്കുമെന്നാണ് സൂചന. തെരഞ്ഞെടുപ്പ് അടുത്തതിനാല്‍ അച്ചടക്ക നടപടി ആലോചിക്കില്ലെന്നാണ് വിവരം. പക്ഷേ തെരഞ്ഞെടുപ്പിന് ശേഷം അതുണ്ടായേക്കുമെന്നാണ് സൂചന.

സിപിഎം സെക്രട്ടറിയേറ്റ് അംഗം ആനത്തലവട്ടം ആനന്ദന്‍, ധനമന്ത്രി തോമസ് ഐസക്ക് അടക്കമുള്ള നേതാക്കള്‍ വിജിലന്‍സ് നടപടിക്കെതിരെ രൂക്ഷ വിമര്‍ശനവുമായി രംഗത്തെത്തിയിരുന്നു. വട്ടാണെന്നുള്ള തോമസ് ഐസക്കിന്റെ പ്രതികരണവും മുഖ്യമന്ത്രിയും ആഭ്യന്തരവകുപ്പുമാണ് വിഷയത്തില്‍ മറുപടി നല്‍കേണ്ടതെന്നുള്ള ആനത്തലവട്ടത്തിന്റെ വാക്കുകളുമാണ് വിഷയം കൂടുതല്‍ വിവാദത്തിലാക്കിയതെന്നാണ് ഒരു വിഭാഗം ആരോപിക്കുന്നത്. ഏതായാലും കെഎസ്എഫ്ഇ റെയ്ഡില്‍ തൂങ്ങി ഇനിയൊരു പരസ്യചര്‍ച്ചവേണ്ടെന്നാണ് പാര്‍ട്ടിയിലും മുന്നണിയിലുമുള്ള ധാരണ.

പോലീസ് ഉപദേഷ്ടാവായ രമണ്‍ ശ്രീവാസ്തവയെ പൂര്‍ണ്ണമായും പിന്തുണച്ച മുഖ്യമന്ത്രി കെ എസ് എഫ് ഇയിലെ വിജിലന്‍സ് ഇടപെടല്‍ തെറ്റല്ലെന്നും എല്ലാം എല്ലാവരും അറിഞ്ഞു കൊണ്ടു മാണെന്ന സൂചനകളും നല്‍കി. ഇതോടെ തന്നെ കടന്നാക്രമിക്കാന്‍ വരുന്നവരെ നേരിടാന്‍ തയ്യാറാണെന്ന സന്ദേശം നല്‍കുകയാണ് പിണറായി. കെ.എസ്.എഫ്.ഇയില്‍ വിജിലന്‍സ് നടത്തിയതു റെയ്ഡല്ല, പ്രാഥമിക പരിശോധന മാത്രമെന്നു മുഖ്യമന്ത്രി പറയുന്നു. കെ.എസ്.എഫ്.ഇയിലെ തന്നെ ചില ഉദ്യോഗസ്ഥര്‍ പോരായ്മകള്‍ കണ്ടെത്തിയതിന്റെ തുടര്‍ച്ചയായാണു വിജിലന്‍സ് പരിശോധന നടത്തിയത്. ലഭ്യമാകുന്ന വിവരങ്ങളുടെ അടിസ്ഥാനത്തില്‍ പരിശോധന നടത്താന്‍ വിജിലന്‍സിന് അവകാശമുണ്ടെന്നും അദ്ദേഹം പറഞ്ഞു. ഫലത്തില്‍ വിജിലന്‍സിനെ പൂര്‍ണ്ണമായും ന്യായീകരിക്കുകയാണ് മുഖ്യമന്ത്രി. ഇതിനൊപ്പം വിജിലന്‍സ് റെയ്ഡ് മുഖ്യമന്ത്രിയുടെ പോലീസ് ഉപദേഷ്ടാവായ രമണ്‍ ശ്രീവാസ്തവ അറിഞ്ഞിരുന്നുവെന്ന വാര്‍ത്തയെ അദ്ദേഹം നിഷേധിച്ചതിലും രാഷ്ട്രീയമുണ്ട്.

ശ്രീവാസ്തവയ്‌ക്കെതിരേയും സിപിഎം. നേതാക്കളില്‍ എതിര്‍പ്പ് ഏറെയുണ്ട്. പോലീസ് നിയമഭേദഗതിയുമായി ബന്ധപ്പെട്ട വിവാദത്തിലും അദ്ദേഹത്തിന്റെ പേര് ഉയര്‍ന്നിരുന്നു. പാര്‍ട്ടിക്കുള്ളിലെ പടയൊരുക്കത്തിന് തടയിടുകയെന്നതും മുഖ്യമന്ത്രിയുടെ മറുപടിക്ക് പിന്നിലുണ്ട്. കെ.എസ്.എഫ്.ഇയുടെ 40 ശാഖകളില്‍ മിന്നല്‍ പരിശോധന നടത്തിയ വിജിലന്‍സിനെതിരേ ധനമന്ത്രി തോമസ് ഐസക്കും സിപിഎം. സംസ്ഥാന സെക്രട്ടേറിയറ്റ് അംഗം ആനത്തലവട്ടം ആനന്ദനും രംഗത്തുവന്നിരുന്നു. ഇതെല്ലാം ലഘൂകരിച്ച് മുഖ്യമന്ത്രിയുടെ വിശദീകരണം എത്തുമ്പോള്‍ ഇനി നേതാക്കള്‍ പരസ്യ വിര്‍ശനവും നിര്‍ത്തും. തള്ളി പറയുന്നവരെ വെട്ടി നിരത്തി പാര്‍ട്ടിയുടെ ചുക്കാന്‍ തന്റെ കൈയില്‍ തന്നെ നിര്‍ത്താനാണ് പിണറായിയുടെ നീക്കം.