വിശ്വസിച്ചവര്‍ക്ക് പണികൊടുക്കുന്ന രമണ്‍ ശ്രീവാസ്തവ; കെ കരുണാകരന്റെ പടിയിറക്കത്തില്‍ പങ്കു വഹിച്ചത് ശ്രീവാസ്തവ; പിണറായിക്കും തിരിച്ചടി കിട്ടുമെന്ന് കെ. മുരളീധരന്‍; സി.പി.എമ്മില്‍ പുകയുന്ന പ്രശ്‌നങ്ങള്‍
കെ.എസ്.എഫ്.ഇയിലെ റെയ്ഡുമായി ബന്ധപ്പെട്ട് സി.പി.എമ്മിനുള്ളില്‍ നിന്നു തന്നെ മുഖ്യമന്ത്രിയുടെ പോലീസ് ഉപദേശകന്‍ രമണ്‍ ശ്രീവാസ്തവക്കെതിരെ പടയൊരുക്കം നടന്നിയിരുന്നു. എന്നാല്‍ രമണ്‍ ശ്രീവാസ്തവയെ വിശ്വാസത്തിലെടുത്ത് പിന്തുണക്കുന്ന നിലപാടാണ് മുഖ്യമന്ത്രി പിണറായി വിജയന്‍ സ്വീകരിക്കുന്നത്. എന്നാല്‍ രമണ്‍ ശ്രീവാസ്തവ വിശ്വാസിക്കാന്‍ കൊള്ളാത്തവനാണെന്ന പ്രസ്താവന സി.പി.എം നേതാക്കള്‍ക്കൊപ്പം ഉയര്‍ത്തുന്ന കോണ്‍ഗ്രസ് നേതാവും എം.പിയുമായ കെ.മുരളീധരനാണ്. കെ. കരുണാകരന്റെ വിശ്വസ്തന്‍ ഇപ്പോള്‍ പിണറായി വിജയന്റെ വിശ്വസ്തനായി എന്നതു ചൂണ്ടികാട്ടിയാണ് കെ. മുരളീധരന്റെ വിമര്‍ശനം. മുഖ്യമന്ത്രിയുടെ പോലീസ് ഉപദേശകന്‍ രമണ്‍ ശ്രീവാസ്തവ മന്ത്രിമാരേക്കാള്‍ ശക്തനായി മാറിയെന്ന് കെ മുരളീധരന്‍ ആരോപിക്കുന്നു. മുന്‍ മുഖ്യമന്ത്രി കെ കരുണാകരന് ഉള്‍പ്പെടെ ശ്രീവാസ്തവയെ വിശ്വസിച്ചവര്‍ക്കൊക്കെ പണികിട്ടിയിട്ടുണ്ട്. കരുണാകരന്റെ പടിയിറക്കത്തില്‍ പങ്കുവഹിച്ച വ്യക്തിയാണ് ശ്രീവാസ്തവ. രാജ്യദ്രോഹിയെന്ന് വിളിച്ചവര്‍ തന്നെ ഇപ്പോള്‍ ശ്രീവാസ്തവയെ തലയിലേറ്റി നടക്കുകയാണെന്നും മുരളീധരന്‍ പരിഹസിച്ചു.
വര്‍ഷങ്ങള്‍ക്ക് മുമ്പ് കരുണാകരന് ഭരിക്കുന്ന സമയത്ത്, പിണറായി വിജയന്‍ നിയമസഭയില്‍ എംഎല്‍എയായി ഉണ്ടായിരുന്ന സമയത്താണ് 'ചാരമുഖ്യന്‍ രാജിവെക്കുക', 'ശ്രീവാസ്തവയെ അറസ്റ്റ് ചെയ്യുക'യെന്ന മുദ്രാവാക്യം ഉയന്നത്. ആ ശ്രീവാസ്തവ ഇപ്പോള്‍ പിണറായിയുടെ ഏറ്റവും വലിയ വിശ്വസ്തനായി. ശിവശങ്കറുണ്ടാക്കിയ പരിക്കിനൊപ്പം ശ്രീവാസ്തവ കൂടിയായാല്‍ പിണറായിക്കത് തിരിച്ചടിയാകുമെന്നും മുരളീധരന്‍ കൂട്ടിച്ചേര്‍ത്തു. കെഎസ്എഫ്ഇയിലെ വിജിലന്‍സ് റെയ്ഡിന് പിന്നില്‍ രമണ്‍ ശ്രീവാസ്തവക്ക് പങ്കുണ്ടെന്ന ആരോപണമുയരുന്ന സാഹചര്യത്തിലാണ് കെ കരുണാകരന്റെ മകന്‍ കൂടിയായ മുരളീധരന്റെ പ്രതികരണം.
നേരത്തെ പ്രമാദമായ ഐഎസ്ആര്‍ഒ ചാരക്കേസ് നടക്കുമ്പോള്‍ ദക്ഷിണമേഖലാ ഐജിയായിരുന്ന ശ്രീവാസ്തവയക്ക് കേസിലെ പ്രതികളുമായി ബന്ധമുണ്ടെന്ന ആരോപണമുയര്‍ന്നിരുന്നു. തന്റെ വിശ്വസ്തനായിരുന്ന ശ്രീവാസ്തവയെ പക്ഷേ കരുണാകരന് സംരക്ഷിക്കാന്‍ ശ്രമിച്ചു. ശ്രീവാസ്തവയുമായുള്ള അടുപ്പമാണ് കരുണാകരന് തിരിച്ചടിയായതും അധികാരമൊഴിയേണ്ട നിലയിലേക്ക് കാര്യങ്ങളെ എത്തിച്ചതും. നിലവില്‍ പിണറായി വിജയന്റെ വിശ്വസ്തനായി മാറിയ രമണ്‍ ശ്രീവാസ്തവയ്ക്ക് സിപിഎമ്മിനും സര്‍ക്കാറിനും തലവേദനയായി മാറിയ കെഎസ്എഫ്ഇ വിജിലന്‍സ് റെയ്ഡില്‍ പങ്കുണ്ടെന്ന ആരോപണമാണ് ഉയരുന്നത്.
അതെ സമയം കെഎസ്എഫ്ഇയില്‍ നടന്ന വിജിലന്‍സ് പരിശോധനയില്‍ രമണ്‍ ശ്രീവാസ്തവയ്‌ക്കെതിരെ ഉയര്‍ന്ന ആരോപണങ്ങള്‍ മുഖ്യമന്ത്രി തള്ളി. രമണ്‍ ശ്രീവാസ്തവയ്ക്ക് പങ്കില്ലെന്ന് മുഖ്യമന്ത്രി വ്യക്തമാക്കി. ആരോപണങ്ങള്‍ക്ക് പിന്നില്‍ മാധ്യമ സിന്‍ഡിക്കേറ്റുകളാണെന്നും മുഖ്യമന്ത്രി തിരിച്ചടിച്ചു. പോലീസും ഫയര്‍ഫോഴ്‌സും ജയിലും അടക്കം ആഭ്യന്തര വകുപ്പില്‍ നേരിട്ട് ഇടപെടാന്‍ ശ്രീവാസ്തവക്ക് കഴിയില്ല. ആരും അദ്ദേഹത്തെ റിപ്പോര്‍ട്ട് ചെയ്യേണ്ടതില്ല, ആരും ശ്രീവാസ്തവയുടെ നിര്‍ദ്ദേശം സ്വീകരിക്കേണ്ട കാര്യമില്ലെന്നും മുഖ്യമന്ത്രി പറഞ്ഞു.
എന്നാല്‍ മുഖ്യമന്ത്രിയുടെ നിലപാടിനെതിരെ സിപിഎമ്മില്‍ അമര്‍ഷം പുകയുകയാണ്. സിപിഎമ്മിനേയും സര്‍ക്കാരിനേയും പ്രതിക്കൂട്ടിലാക്കുന്ന നിരവധി നടപടികളാണ് ആഭ്യന്തരവകുപ്പുമായി ബന്ധപ്പെട്ട് നാലര വര്‍ഷത്തിനിടെ ഉണ്ടായിട്ടുള്ളത്. ഇതിന്റെ എല്ലാം പിന്നില്‍ പ്രവര്‍ത്തിക്കുന്നത് മുഖ്യമന്ത്രിയുടെ പോലീസ് ഉപദേഷ്ടാവായ രമണ്‍ ശ്രീവാസ്തവയാണെന്ന പൊതുവികാരമാണ് ഇപ്പോള്‍ സിപിഎമ്മില്‍ ഉയര്‍ന്നിരിക്കുന്നത്. ഒരു സ്വകാര്യ ധനകാര്യ സ്ഥാപനത്തിന്റെ ഉപദേഷ്ടാവായി രമണ്‍ ശ്രീവാസ്തവ നിലവില്‍ പ്രവര്‍ത്തിക്കുന്നുണ്ടെന്നാണ് നേതാക്കളിപ്പോള്‍ കണ്ടെത്തിയിട്ടുള്ളത്. പോലീസ് ഉപദേഷ്ടാവായി വരുന്നതിന് മുമ്പേ ശ്രീവാസ്തവ ഈ ധനകാര്യ സ്ഥാപനത്തിന്റെ ഉപദേഷ്ടാവായിരുന്നു. അദ്ദേഹം ഇപ്പോഴും ആ പദവി വഹിക്കുന്നുണ്ടെന്നാണ് സ്ഥാപനത്തിന്റെ വെബ്‌സൈറ്റിലുള്ളത്. അങ്ങനെയുള്ള ഒരാളുടെ കൃത്യമായ ലക്ഷ്യത്തിന്റെ അടിസ്ഥാനത്തിലാണ് കെഎസ്എഫ്ഇയില്‍ റെയ്ഡ് നടത്താനും പൊതുജനത്തിന് മുന്നില്‍ സ്ഥാപനത്തെ താറടിച്ച് കാണിക്കാനുമുള്ള നടപടിയുണ്ടായിട്ടുള്ളത് എന്നാണ് സിപിഎം നേതാക്കളുടെ വിലയിരുത്തല്‍.
https://www.facebook.com/Malayalivartha
