പിണറായി പച്ചക്ക് മതം പറയുമ്പോള്, കേരളത്തില് അതും മതേതരത്വം; മുസ്ലിംലീഗിനെ ചാരി കോണ്ഗ്രസിനെ കുത്തുമ്പോള് വളരുന്നത് ബി.ജെ.പി; നാലു വോട്ടിന് വേണ്ടി രാഷ്ട്രീയം മാറുമ്പോള്; ലക്ഷ്യം സമുദായ സംഘടനകളുടെ പിന്തുണ
നാല് വോട്ടിന് വേണ്ടി നിലപാട് മാറ്റിലെന്ന് വിമ്പു പറയുന്നവരാണ് കമ്മ്യൂണിസ്റ്റുകാര്, പ്രത്യേകിച്ചും ഇരട്ട ചങ്കന് പിണറായി വിജയന്. പക്ഷേ മുഖ്യമന്ത്രി പിണറായി വിജയന്റെ ഇപ്പോഴത്തെ പ്രസ്താവന പരിശോധിച്ചാല് അതിലൊന്നും ഒരു കാര്യമില്ലെന്ന മനസിലാക്കാവുന്നതാണ്. രമേശ് ചെന്നിത്തല പറഞ്ഞതു പോലെ കേരളത്തില് മതസ്പര്ദ്ധ വളര്ത്താനും വര്ഗീയ ചേരിതിരിവുണ്ടാക്കാനും മുഖ്യമന്ത്രിയും ഇടത് മുന്നണിയും ബോധപൂര്വമായി ശ്രമിക്കുന്നുവെന്നു തന്നെ വേണം മനസിലാക്കാന്.
അതിന് കാരണമുണ്ട്. കഴിഞ്ഞ ലോക്സഭാ തിരഞ്ഞെടുപ്പില് എല്.ഡി.എഫിനൊപ്പം നിന്ന ഭൂരിപക്ഷ സമുദായ വോട്ടുകളും കഴിഞ്ഞ നിയമസഭാ തിരഞ്ഞെടുപ്പില് ഒപ്പം നിന്ന ന്യൂനപക്ഷ വോട്ടുകളും ഒരുപോലെ യു.ഡി.എഫിലേക്ക് പോയി. അതിന് പ്രധാനകാരണം ശബരിമല സ്ത്രീ പ്രവേശന വിഷയത്തില് പിണറായി സര്ക്കാര് എടുത്ത നിലപാടാണ്. പരാജയത്തില് നിന്നും പാഠങ്ങള് ഉള്ക്കൊണ്ട് സി.പി.എം സര്ക്കാര് നിലപാടില് നിന്നു പിന്നോട്ട് പോയി. അതോടെ തദ്ദേശ തെരഞ്ഞെടുപ്പില് കാര്യങ്ങള് അവര്ക്ക് അനുകൂലമാകുകയും ചെയ്തു. അതുകൊണ്ടു തന്നെ ഭൂരിപക്ഷ സമുദായങ്ങളുടെ വോട്ടുകള് തങ്ങള്ക്കൊപ്പം നിന്നാല് മാത്രമേ അടുത്ത നിയമസഭാ തെരഞ്ഞെടുപ്പിലും വിജയിക്കാന് സാധിക്കുവെന്ന് അവര് മനസിലാക്കിയത്. അതിനുള്ള പണി ഇപ്പോഴെ പിണറായി വിജയന് തുടങ്ങി വച്ചുവെന്ന് മാത്രം.
മുസ്ലിംലീഗാണ് യു.ഡി.എഫിനെ നിയന്ത്രിക്കതെന്നു വരുത്തി തീര്ത്താല് മുമ്പ് യു.ഡി.എഫ് സര്ക്കാരിന്റെ കാലത്തെ അഞ്ചാം മന്ത്രി വിവാദം പോലെ എന്.എന്.എസ് പോലുള്ള ഭൂരിപക്ഷ സമുദായത്തെ കോണ്ഗ്രസില് നിന്നും അകറ്റാന് അവര്ക്ക് സാധിക്കും. അങ്ങനെ വരുമ്പോള് മതേതര നിലപാടുള്ള ഭൂരിപക്ഷ സമുദായങ്ങള് കോണ്ഗ്രസിന് പകരം സി.പി.എമ്മിനെ പിന്തുണക്കും. ഇത് കൂടുതല് സീറ്റ് നേടാനും അധികാരത്തില് തുടരാനും സഹായമാകുമെന്നാണ് കണക്കു കൂട്ടല്. ബി.ജെ.പി അധികാരത്തില് വരാന് സാധ്യതയില്ലാത്തതിനാല് സമുദായ സംഘടന തങ്ങള്ക്കൊപ്പം നില്ക്കുമെന്ന ആത്മവിശ്വാസ തന്നെയാണ് പിണറായിക്കൊണ്ട് പച്ചക്ക് വര്ഗ്ഗീയത പറയിക്കുന്നതിന് പിന്നിലെ കാരണം.
കേരളത്തെ വര്ഗീയ ചേരിതിരിവിലേക്ക് നയിക്കാനും അതുവഴി തങ്ങളുടെ രാഷ്ട്രീയ താല്പര്യങ്ങള് നേടിയടുക്കാന് സാധിക്കുമെന്ന ധാരണയാണ് ഇടതുമുന്നണിക്കുള്ളത്. യുഡിഎഫ് അപ്രസക്തം എന്ന വ്യാജപ്രചരണമാണ് നടക്കുന്നത്. യുഡിഎഫിനെ അപ്രസക്തമാക്കി ബിജെപിയെ വളര്ത്താനുളള തന്ത്രമാണ് സിപിഎം സ്വീകരിക്കന്നത്. ഈ സൃഗാലതന്ത്രം ശബരിമലയുടെ കാലം മുതല് തുടങ്ങിയതാണ്. ബിജെപിയെ മുഖ്യപ്രതിപക്ഷമാക്കാന് മുഖ്യമന്ത്രിയും ഇടതുപക്ഷവും ശ്രമിക്കുകയാണെന്നും ഇപ്പോഴും അത് തുടരുന്നുവെന്നാണ് രമേശ് ചെന്നിത്തല ഇതിനോട് പ്രതികരിച്ചത്.
തദ്ദേശ സ്വയംഭരണ തിരഞ്ഞെടുപ്പ് ഫലം പുറത്തു വന്നതോടെ യു.ഡി.എഫിന്റെ നേതൃത്വം ഇന്ത്യന് യൂണിയന് മുസ്ലിംലീഗ് ഏറ്റെടുക്കുകയാണോ എന്ന സംശയമാണുയരുന്നതെന്ന് മുഖ്യമന്ത്രി പിണറായി വിജയന് പറഞ്ഞത്. കോണ്ഗ്രസിന്റെ ആഭ്യന്തര കാര്യങ്ങളില് അഭിപ്രായം പറയുവാനും കോണ്ഗ്രസിനെ ആര് നയിക്കണമെന്ന് തീരുമാനിക്കാനുമുള്ള കേന്ദ്രമായി ലീഗ് മാറിയോയെന്നും അദ്ദേഹം ഫെയ്സ്ബുക്കില് കുറിച്ച പോസ്റ്റില് ചോദിച്ചു.
ഒരു കക്ഷിയുടെ നേതൃത്വത്തില് ആര് വേണം എന്ന് മറ്റൊരു കക്ഷി നിര്ദേശം വെക്കുന്നത് രാഷ്ട്രീയത്തില് വിചിത്രമായ അനുഭവമാണ്. യു.ഡി.എഫില് അത്തരം ജനാധിപത്യ വിരുദ്ധവും അസാധാരണവുമായ കാര്യങ്ങളാണ് സംഭവിക്കുന്നത്. ദേശിയ നേതൃത്വത്തിന്റെ എതിര്പ്പുകള് മറികടന്നുകൊണ്ട് പോലും കേരളത്തിലെ കോണ്ഗ്രസിനെക്കൊണ്ട് മതവര്ഗ്ഗീയ കക്ഷികളുമായുള്ള സഖ്യത്തെ അംഗീകരിപ്പിക്കാന് ലീഗിന് കഴിഞ്ഞു എന്നാണ് ലീഗിന്റെയും കോണ്ഗ്രസിന്റെയും പരസ്യ പ്രസ്താവനകളില് നിന്ന് വ്യക്തമാകുന്നതെന്നും മുഖ്യമന്ത്രി പറഞ്ഞു.
ജമാ അത്തെ ഇസ്ലാമി അടക്കമുള്ള വര്ഗീയ സങ്കുചിത ശക്തികളുമായി ഉണ്ടാക്കിയ ബന്ധത്തിന്റെ പേരില് ദുര്ഗന്ധപൂരിതമായ ചര്ച്ചകളാണ് ആ മുന്നണിയില് നിന്ന് പുറത്തുവരുന്നത്. അതിന്റെ തുടര്ച്ചയായി സംസ്ഥാന കോണ്ഗ്രസ് അധ്യക്ഷനെ മാറ്റണം എന്ന് ആവശ്യമുയരുന്നു എന്നാണ് വാര്ത്ത. സ്വന്തം നേതാവിനെ തിരഞ്ഞെടുക്കാനോ രാഷ്ട്രീയം തീരുമാനിക്കാനോ കെല്പ്പില്ലാത്ത തരത്തില് കോണ്ഗ്രസ് ദുര്ബലപ്പെട്ടുവെന്ന് തെളിയിക്കുന്ന അവസ്ഥയാണിത്.
നാല് വോട്ടിനു വേണ്ടി എന്തും ചെയ്യാനുള്ള കോണ്ഗ്രസിന്റെ ലജ്ജയില്ലായ്മയാണ് പരിതാപകരമായ ഈ സ്ഥിതിക്ക് കാരണമെന്നും മുഖ്യമന്ത്രി കുറ്റപ്പെടുത്തി. യു.ഡി.എഫ്. എന്ന സംവിധാനം തന്നെ അപ്രസക്തമായിരിക്കുന്നു. മതനിരപേക്ഷതയും ജനാധിപത്യ മൂല്യങ്ങളും കൈവിട്ട യുഡിഎഫില്നിന്ന് ഇനി ഒന്നും പ്രതീക്ഷിക്കാനില്ല എന്നാണ് ആ മുന്നണിയിലെ ഘടകകക്ഷി നേതാക്കളുടെ പ്രസ്താവനകളില് നിന്ന് മനസിലാക്കാനാവുകയെന്നും പിണറായി വിജയന് പറഞ്ഞു.
മുഖ്യമന്ത്രിയുടെ ഈ പ്രസ്താവനയോട് ശക്തമായി തന്നെയാണ് മുസ്ലിംലീഗ് പ്രതികരിച്ചത്. സന്ദര്ഭങ്ങള്ക്കനുസരിച്ചു കാര്ഡുകള് മാറിക്കളിക്കുന്നയാളാണു മുഖ്യമന്ത്രി. ചിലപ്പോള് ന്യൂനപക്ഷ കാര്ഡ്. മറ്റുചിലപ്പോള് ഭൂരിപക്ഷ കാര്ഡുമാണ് അദ്ദേഹം പ്രയോഗിക്കുന്നതെന്നും പി.കെ കുഞ്ഞാലിക്കുട്ടി കുറ്റപ്പെടുത്തി. കോണ്ഗ്രസിന്റെ കാര്യത്തില് ഇടപെട്ടെന്ന മുഖ്യമന്ത്രി പിണറായി വിജയന്റെ ആരോപണത്തോട് അതിനിശിതമായി തിരിച്ചടിച്ച് ലീഗ്. കെപിസിസി പ്രസിഡന്റിന്റെ കാര്യത്തില് ലീഗിന്റെ ചെറുതോ വലുതോ ആയ ഒരു നേതാവും ഇടപെട്ടിട്ടില്ല. മുഖ്യമന്ത്രി പിണറായി വിജയന്റെ പ്രസ്താവന നിലവാരമില്ലാത്തതാണെന്നും അദ്ദേഹം അഭിപ്രായപ്പെട്ടു.
https://www.facebook.com/Malayalivartha