'നര വീണില്ല, തൊലി ചുളിഞ്ഞില്ല, പല്ലു കൊഴിഞ്ഞില്ല, പറയത്തക്ക അസുഖങ്ങളില്ല.. പക്ഷേ അവരെ ചുറ്റുമുള്ളവര് ഒരുപാടധികം മുതിര്ന്നവളായി കണക്കാക്കും. അവള്ക്കാണെങ്കില് കുഞ്ഞായിരുന്ന് മതിയായിട്ടുണ്ടാവില്ല.. ' വൈറലായി കുറിപ്പ്
ഇരുപത് വയസില് പെണ്കുട്ടി ആയിരിക്കുന്നവള് രണ്ടോ മൂന്നോ വര്ഷത്തിനിപ്പുറം അമ്മച്ചിയു, തള്ളയും കിളവവിയുമാകുന്ന കാഴ്ച. രണ്ട് വര്ഷമല്ലേ കഴിഞ്ഞു പോയുള്ളൂ എന്ന് സ്ത്രീകള് അത്ഭുതപ്പെടുകയും ചെയ്യും. പക്ഷേ അവരെ ചുറ്റുമുള്ളവര് ഒരുപാടധികം മുതിര്ന്നവളായേ കാണക്കാക്കൂ. അവള്ക്ക് കുഞ്ഞായി മതിയായിട്ടും ഉണ്ടാവില്ല. പ്രണയ ദിനത്തില് ജീനകി രാവണ് എന്ന യുവതി തന്റെ ഫേസ്ബുക്കില് പങ്കുവെച്ച ഈ വാക്കുകള് ശ്രദ്ധേയമാവുകയാണ്.
ഫേസ്ബുക്ക് കുറിപ്പ് ഇങ്ങനെ;
അമ്മയായവളെ, മുപ്പത് കഴിഞ്ഞവളെ, നാല്പത് കഴിഞ്ഞവളെ, ഭര്ത്താവ് ഉപേക്ഷിച്ചവളെ, മന്ത്രവാദിനിയെ,കവയിത്രിയെ...അങ്ങനെ ആരെ പ്രേമിക്കണമെന്ന് എല്ലാവരും പറഞ്ഞുകഴിഞ്ഞ സ്ഥിതിക്ക് കവിതയല്ലാത്ത കുറച്ച് കാര്യങ്ങള് ക്രമമില്ലാതെ പറയട്ടെ ??നിങ്ങള് പ്രണയിക്കുന്ന ആള്ക്ക് ആര്ത്തവമുണ്ടെങ്കില് ആ സമയത്ത് തീര്ച്ചയായും അവളെ സാധാരണയിലധികം പരിഗണിക്കണം. മനസിലാക്കാന് പോലുമാകാത്ത അസ്വസ്ഥതകള് ചിലപ്പോള് അനുഭവിക്കുന്നുണ്ടാകാം, അതുകൊണ്ട്...
ഏതെങ്കിലും തരത്തിലുള്ള മാനസിക പ്രശ്നങ്ങള് നേരിടുന്നുണ്ടെന്നു മനസിലാക്കിയാല്, അത് നിങ്ങള്ക്ക് ഡീല് ചെയ്യാന് പറ്റുന്നില്ലെന്ന് തോന്നുകയാണെങ്കില് ഒന്നുകില് മാന്യമായി, വേദനിപ്പിക്കാതെ പരമാവധി നേരത്തെ അവസാനിപ്പിക്കുക. കൂടെ നില്ക്കാന് ഉദ്ദേശിക്കുന്നെങ്കിലും പരമാവധി മാന്യമായി,വേദനിപ്പിക്കാതെ ഡീല് ചെയ്യാന് ശ്രമിക്കുക (പക്ഷേ സത്യത്തില് നിങ്ങളെത്ര നന്നായി ഡീല് ചെയ്താലും അത് അവര് അര്ഹിക്കുന്നതിനേക്കാള് ഒരുപാട് താഴെയായിരിക്കും, എന്നാലും....)
മന്ത്രവാദിനി ആയാലും എഴുത്തുകാരി ആയാലും അമ്മയായാലും അമ്മൂമ്മയായാലും നിങ്ങള്ക്ക് മനസിലായാലും ഇല്ലെങ്കിലും സ്ത്രീകള് സവിശേഷമായ ചില പ്രശ്നങ്ങള് അനുഭവിക്കുന്നുണ്ട്... സ്ത്രീകളെ നിരാശ ബാധിക്കുന്നത് വളരെ വേഗത്തിലാണ്. കാരണം അവര്ക്ക് പുരുഷന്മാരേക്കാള് വേഗം വയസാകും... ഇരുപത് വയസില് പെണ്കുട്ടിയായിരിക്കുന്നവള് രണ്ടോ മൂന്നോ വര്ഷത്തിനിപ്പുറം അമ്മച്ചിയാവും, തള്ളയാവും, കിളവിയാവും... രണ്ട് വര്ഷമല്ലേ കഴിഞ്ഞുപോയുള്ളൂവെന്ന് സ്ത്രീകള് അത്ഭുതപ്പെടും. നര വീണില്ല, തൊലി ചുളിഞ്ഞില്ല, പല്ലു കൊഴിഞ്ഞില്ല, പറയത്തക്ക അസുഖങ്ങളില്ല.. പക്ഷേ അവരെ ചുറ്റുമുള്ളവര് ഒരുപാടധികം മുതിര്ന്നവളായി കണക്കാക്കും. അവള്ക്കാണെങ്കില് കുഞ്ഞായിരുന്ന് മതിയായിട്ടുണ്ടാവില്ല.. മുതിര്ന്നയാളായി മുഴുവന് പേരും പരിഗണിക്കാന് തുടങ്ങുമ്പോള് ബുദ്ധിമുട്ടി അവളും മുതിര്ന്നയാളാകാന് ശ്രമിക്കും. അപ്പോള് ഉള്ളിലുള്ള കുഞ്ഞും യുവതിയും വൃദ്ധയും എല്ലാം തമ്മിലേറ്റുമുട്ടും... ഒടുവില് വലിയൊരാളായി തുടങ്ങുന്ന നേരത്ത് എല്ലാം തകര്ത്തുകൊണ്ട് ചിലരുടെ ഓമനിക്കലുകള് വരും. അത് അനുഭവിച്ചുകൊണ്ടിരിക്കുമ്പോള് പക്വത പോരെന്ന് അവരും പറയും... പിരിഞ്ഞുപോകും.. ഇതിങ്ങനെ തുടരും.
ഒടുവില് എല്ലാ പ്രണയങ്ങളോടും എല്ലാ സന്തോഷങ്ങളോടും വെറുപ്പുള്ളവരായി അവര് മാറും. വാലന്റൈന്സ് ദിനത്തില് വെറുപ്പ് നിറച്ച കുറിപ്പുകളെഴുതി പോസ്റ്റ് ചെയ്യും.. മുഴുവന് മനുഷ്യരുടെയും നാശം സ്വപ്നം കാണും. ഇരുന്നിടത്ത് ഇരിപ്പുറക്കാതെ, ഒച്ചയില്ലാതെ കരഞ്ഞ് ജോലിയെടുക്കും. 'ഇതെന്തൊരു നാശം പിടിച്ച പെണ്ണാണ്' എന്ന് ആളുകളെക്കൊണ്ട് പറയിക്കും... ഇനി പറയൂ, ഇങ്ങനെയുള്ള സ്ത്രീകളെക്കൂടി ചേര്ത്ത്, എന്നെക്കൂടി ചേര്ത്ത് നിങ്ങള്ക്കൊരു കവിത എഴുതാന് പറ്റുമോ....?
https://www.facebook.com/Malayalivartha