എറണാകുളം വാഴക്കാല സെന്റ് തോമസ് മഠത്തിലെ അന്തേവാസിയായ കന്യാസ്ത്രീ ആത്മഹത്യ എന്ന നിഗമനത്തിലേക്ക് പൊലീസ് എത്തുന്നു. ശ്വാസകോശത്തില്‍ വെള്ളം കയറി ശ്വാസം മുട്ടിയാണ് മരിച്ചതെന്നാണ് പോസ്റ്റുമോര്‍ട്ടം റിപ്പോര്‍ട്ടിലെ സൂചന. ശരീരത്തില്‍ ബലപ്രയോഗത്തിന്റെ ലക്ഷണങ്ങളോ മുറിവുകളോ ഇല്ല. അന്നേ ദിവസം ഈ പ്രദേശത്തേക്ക് മറ്റാരെങ്കിലും വന്നതായി പൊലീസിനും സൂചന ലഭിച്ചിട്ടില്ല. ചുറ്റും ഉയര്‍ന്ന മതിലുകളുള്ളതിനാല്‍ പെട്ടെന്ന് ഒരാള്‍ക്ക് ഇവിടേക്ക് എത്തുക സാധ്യമല്ല. കന്യാസ്ത്രീക്ക് ശത്രുക്കള്‍ ഉള്ളതായും പൊലീസിന് വിവരം ലഭിച്ചിട്ടില്ല. ഇടുക്കി കീരിത്തോട് സ്വദേശിയായ ജസീന തോമസിനെ ഈ മാസം 14 ന് ആണ് മഠത്തിനു സമീപമുള്ള പാറമടയില്‍ മരിച്ച നിലയില്‍ കണ്ടെത്തിയത്. മൂന്നു വര്‍ഷമായി വാഴക്കാല സെന്‍തോമസ് കോണ്‍വെന്റിലെ അന്തേവാസിയാണ്.

45 വയസ്സുള്ള ജസീന തോമസിനെ പതിനാലിന് ഉച്ചമുതല്‍ ആണ് മഠത്തില്‍ നിന്നും കാണാതായത്.തുടര്‍ന്ന് മഠം അധികൃതര്‍ പൊലീസിന് പരാതി നല്‍കിയിരുന്നു. 2011 മുതല്‍ മാനസിക പ്രശ്നങ്ങളുമായി ബന്ധപ്പെട്ട് ചികിത്സ തേടിയതായി പരാതിയില്‍ പറയുന്നുണ്ട്. എന്നാല്‍ ജസീന മാനസിക രോഗത്തിന് മരുന്ന് കഴിച്ചിരുന്നതായി അറിവില്ലെന്ന് ബന്ധുക്കള്‍ പറഞ്ഞിരുന്നു. സംഭവത്തില്‍ ഇവര്‍ ദുരൂഹതയും ആരോപിച്ചിരുന്നു. മരണ വിവരം അറിയിക്കാന്‍ വൈകിയെന്നായിരുന്നു ബന്ധുക്കളുടെ മറ്റൊരു ആരോപണം. ഉച്ചയ്ക്ക് രണ്ട് മണിക്ക് ജസീന അന്തേവാസികളായ മറ്റ് കന്യാസ്ത്രീകള്‍ക്ക് ഭക്ഷണം നല്‍കിയതായി പറയുന്നുണ്ട്.

അതിന് ശേഷം കാണാതയി. എന്നാല്‍ വൈകിട്ട് നാല് മണിയോടെ മൃതദേഹം പാറമടയിലെ ജലാശയത്തിന് മുകളില്‍ കാണപ്പെട്ടു. ഇതും സംഭവത്തിന്‍്റെ ദുരൂഹത വര്‍ദ്ധിപ്പിച്ചു. മുങ്ങി മരിച്ചാല്‍ ഇത്രവേഗം മൃതദേഹം പൊങ്ങി വരുന്നത് എങ്ങനെയാണെന്നായിരുന്നു നാട്ടുകാരുടെ ചോദ്യം. പാറമടയില്‍ മുങ്ങി മരിക്കാന്‍ ആവശ്യമുള്ളത്ര വെളളം ഇല്ലെന്നും ആക്ഷേപം ഉയര്‍ന്നിരുന്നു.

കൊച്ചി ഡി.സി.പി.ഐശ്വര്യ ഡോങ്ങ്റെയുടെ നേതൃത്വത്തില്‍ പോലീസ് സംഘം സംഭവസ്ഥലം സന്ദര്‍ശിച്ച്‌ തൊട്ടടുത്ത ദിവസം തന്നെ വിശദമായ അന്വേഷണം ആരംഭിച്ചു. പാറമടയിലെ ജലാശയം ആഫ്രിക്കന്‍ പായല്‍ മൂടിയ നിലയിലാണ്. മൃതദേഹത്തിന്റെ ഇന്‍ക്വസ്റ്റ് നടപടികള്‍ പൂര്‍ത്തിയാക്കി. ദേഹത്ത് കാര്യമായ മുറിവുകളോ ചതവുകളോ ഇല്ല എന്നായിരുന്നു പൊലീസ് നല്‍കുന്ന സൂചന. പോസ്റ്റുമോര്‍ട്ടത്തിനു ശേഷം മൃതദേഹം മഠം അധികൃതര്‍ക്കും ബന്ധുക്കള്‍ക്കും വിട്ടുകൊടുത്തു.