വീഡിയോ കോളിനിടെ മധുരചുംബനവുമായി ഭാര്യ; പക്ഷെ ഭർത്താവിന്റെ പ്രതികരണം കുറച്ചു കടുത്തു...
ലോക് ഡൗൺ ആയതിനുശേഷം എല്ലാവരുടെയും ജോലികര്യങ്ങളിൽ കൂടെകൂടിയ ഒന്നാണ് വീഡിയോ കോളുകൾ. നിരവധി പേരാണ് വീട്ടിലിരുന്നു ജോലി ചെയ്യുകയും ഓഫീസിൽ മീറ്റിംഗുകൾക്കായി വീഡിയോ കോളുകളുടെ സഹായം തേടുകയും ചെയ്യുന്നത്. അതെ സമയം വീട്ടിലിരുന്നുള്ള വീഡിയോ കോളുകൾ പലപ്പോഴും നർമരസപ്രധാനമായ മുഹൂർത്തങ്ങൾക്ക് വേദിയൊരുക്കുകയും ചെയ്തിട്ടുണ്ട്. അത്തരത്തിലൊരു വിഡിയോയാണ് ഇപ്പോൾ സമൂഹ മാധ്യമങ്ങളിൽ പ്രചരിക്കുന്നത്.
ഒരു സ്ത്രീ ഭർത്താവിന്റെ സൂം കോൾ മീറ്റിംഗിനിടെ ഭർത്താവിനെ ചുംബിക്കാൻ ശ്രമിക്കുന്ന വീഡിയോയാണ് ഇപ്പോൾ ഹിറ്റായിരിക്കുന്നത്. "സൂം കോൾ തമാശ" എന്ന അടിക്കുറിപ്പോടെ വ്യവസായിയായ ഹർഷ് ഗോയങ്കയാണ് 15 സെക്കന്റ് മാത്രം ദൈർഖ്യമുള്ള വീഡിയോ പോസ്റ്റ് ചെയ്തിരിക്കുന്നത്. വീഡിയോയിൽ, സൂം കോൾ മീറ്റിംഗിനിടെ ഒരു വ്യക്തി വിവിധ വിഷയങ്ങളെപ്പറ്റി സംസാരിച്ചുകൊണ്ടിരിക്കുന്നതിനിടയ്ക്ക്, ഭാര്യ മുറിയിലെത്തുകയും ഭർത്താവിനെ ചുംബിക്കാൻ മുന്നോട്ട് ആയുന്നതും കാണാം. 'നീയെന്താണ് ഈ കാണിക്കുന്നത്, ഞാൻ വീഡിയോ കോളിലാണ്' എന്ന് പറഞ്ഞു ഭർത്താവ് കയർക്കുമ്പോൾ ഒരു പുഞ്ചിരി മാത്രമായിരുന്നു ഭാര്യയുടെ പ്രതികരണം.
മഹീന്ദ്ര ഗ്രൂപ്പ് ചെയർമാൻ ആനന്ദ് മഹീന്ദ്ര വീഡിയോ റീട്വീറ്റ് ചെയ്തിരിക്കുകയാണ്. "ഹാ, ഞാൻ ആ സ്ത്രീയെ ഈ വർഷത്തെ ഏറ്റവും നല്ല ഭാര്യയായി നാമനിർദ്ദേശം ചെയ്യുന്നു. ഭർത്താവിന്റെ പ്രതികരണം കൂടുതൽ ആദരവോടെയും ആഹ്ലാദത്തോടെയും ആയിരുന്നെങ്കിൽ, ഞാൻ അവരെ ഈ വർഷത്തെ ഏറ്റവും മികച്ച ദമ്പതികളായി നാമനിർദ്ദേശം ചെയ്യുമായിരുന്നു, പക്ഷേ അദ്ദേഹത്തിന്റെ പ്രതികരണം അത്ര പോരാ!", ആനന്ദ് മഹീന്ദ്ര കുറിച്ചു. 3 ലക്ഷത്തിലധികം വ്യൂ നേടി ദമ്പതികൾ സമൂഹ മാധ്യമങ്ങളിൽ താരമായിരിക്കുകയാണ്. പലരും ഭാര്യയുടെ നിഷ്കളങ്കമായ സ്നേഹപ്രകടനത്തെ പുകഴ്ത്തുകയും ഭർത്താവിന്റെ ദേഷ്യപെടലിനെ വിമർശിക്കുകയും ചെയ്യുന്നുണ്ട്. "ചില മെക്കാനിക്കൽ ഭർത്താക്കന്മാർ ഓർമ്മിക്കാനുള്ള മധുര നിമിഷങ്ങൾ ആസ്വദിക്കുന്നതിൽ വിമുഖരാണ്," എന്നായിരുന്നു ട്വിറ്റെർ ഉപയോക്താവിന്റെ അഭിപ്രായം.
https://www.facebook.com/Malayalivartha