ദിവസവും ചൂട് കൂടി വരുമ്പോൾ അല്‍പ്പം ഐസ്ക്രീം കഴിച്ച്‌ ശരീരം തണുപ്പിക്കുന്നത് എന്തുകൊണ്ടും നല്ലതാണ്. മനുഷ്യര്‍ക്ക് മാത്രമല്ല മൃഗങ്ങള്‍ക്കും ചൂടുകാലത്ത് അല്‍പ്പം ഐസ്ക്രീമൊക്കെയാകാം. തന്റെ വളര്‍ത്തു മൃഗമായ പൂച്ചയ്ക്ക് ഐസ്ക്രീം വായില്‍ വച്ച്‌ കൊടുക്കുന്ന ഉടമയുടെ വീഡിയോയാണ് ഇപ്പോള്‍ സോഷ്യല്‍ മീഡിയയില്‍ വൈറലായിരിക്കുന്നത്.

ഐസ്ക്രീം കാണുമ്പോഴുള്ള പൂച്ചയുടെ പ്രതികരണമാണ് ഇന്റര്‍നെറ്റില്‍ ആളുകളുടെ ഹൃദയം കീഴടക്കിയത്. റെഡ്ഡിറ്റില്‍ പോസ്റ്റ് ചെയ്ത ഈ വീഡിയോ ആരംഭിക്കുന്നത് ഐസ് ട്രേയില്‍ നിന്ന് പൂച്ചയുടെ ഉടമ ഐസ്ക്രീം പുറത്തെടുക്കുന്നത് ആകാംക്ഷയോടെ കാത്തിരിക്കുന്ന പൂച്ചയെ കാണിച്ചു കൊണ്ടാണ്. ഐസ് ട്രേയില്‍ നിന്ന് പുറത്തെടുത്ത ഉടന്‍ ഐസ്ക്രീം പൂച്ചയ്ക്ക് നേരെ നീട്ടുന്നതും കാണാം. തുടര്‍ന്ന് പൂച്ച രുചികരമായ ഐസ്ക്രീം സന്തോഷത്തോടെ കഴിക്കുന്നതാണ് കാണുന്നത്.

30 സെക്കന്‍ഡ് ദൈര്‍ഘ്യമുള്ള വീഡിയോയ്ക്ക് റെഡ്ഡിറ്റിലെ 98% ഉപയോക്താക്കളും അപ്‍വോട്ട് രേഖപ്പെടുത്തി. ജൂണ്‍ 9 ന് പോസ്റ്റ് ചെയ്ത ഈ വീഡിയോയ്ക്ക് ഇതുവരെ 300ല്‍ അധികം കമന്റുകള്‍ ലഭിച്ചു. r/aww എന്ന റെഡ്ഡിറ്റ് അക്കൗണ്ടാണ് വീഡിയോ ഷെയ‍ര്‍ ചെയ്തിരിക്കുന്നത്.

ഐസ്ക്രീം സന്തോഷത്തോടെ ആസ്വദിച്ച്‌ കഴിക്കുന്ന പൂച്ചക്കുട്ടിയെ കാണുന്നത് എത്ര മനോഹരമായ കാഴ്ച്ചയാണെന്ന് ചില‌ര്‍ പോസ്റ്റിന് കമന്റായി കുറിച്ചു. ഒരു റെഡ്ഡിറ്റര്‍ പൂച്ചയ്ക്ക് വേണ്ടി ഐസ്ക്രീം ഉണ്ടാക്കുന്നതിനുള്ള പാചകക്കുറിപ്പും പങ്കിട്ടു. നിരവധി പേ‍ര്‍ വീഡിയോയ്ക്ക് താഴെ കമന്റായി ഐസ്ക്രീമിന്റെ റെസിപ്പി ചോദിച്ചിരുന്നു.

'ഞാന്‍ ട്യൂണ മത്സ്യം ഉപയോഗിച്ചാണ് ഐസ്ക്രീം ഉണ്ടാക്കാറുള്ളത്. ഒരു സ്പൂണ്‍ ഉപയോ​ഗിച്ച്‌ ട്യൂണ നന്നായി ഇളക്കുക. മത്സ്യത്തിന്റെ ആകൃതിയിലുള്ള ഐസ് ക്യൂബില്‍ ട്യൂണ അല്‍പ്പം വെള്ളം കൂടി ചേ‍ര്‍ത്ത് ഒഴിക്കുക. തുട‍ര്‍ന്ന് ഐസ്ക്രീം തണുപ്പിക്കാന്‍ വയ്ക്കുക. പിന്നീട് ഫ്രീസറില്‍ നിന്ന് പുറത്തെടുക്കുമ്പോൾ ഒരു നിമിഷം തണുപ്പ് അല്‍പ്പം കുറയാന്‍ മാറ്റി വച്ച ശേഷം പൂച്ചയ്ക്ക് കൊടുക്കുക.

ചൂടുള്ള ദിവസങ്ങളില്‍ ഇത് പൂച്ചകള്‍ക്ക് കൊടുക്കുന്നത് വളരെ നല്ലതാണ്.' ഒരു റെഡ്ഡിറ്റ് ഉപഭോക്താവ് തന്റെ പാചക കുറപ്പ് പങ്കുവച്ചു കൊണ്ട് പറഞ്ഞു. കടുത്ത ചൂടില്‍ നായ്ക്കള്‍ക്കും ഇത്തരത്തില്‍ ഐസ്ക്രീം ട്രീറ്റുകള്‍ നല്‍കാമെന്ന് മറ്റൊരു ഉപഭോക്താവ് പറഞ്ഞു.

വള‍ര്‍ത്തു മൃ​ഗങ്ങളെ സ്വന്തം മക്കളെ പോലെ സ്നേഹിക്കുന്ന നിരവധിയാളുകളുണ്ട്. വിദേശ രാജ്യങ്ങളിലും മറ്റും മനുഷ്യരെക്കാള്‍ രാജകീയമായിട്ടായിരിക്കും പലപ്പോഴും പല വളര്‍ത്തു മൃഗങ്ങളുടേയും ജീവിതം.

പല വീടുകളിലും അവിടുത്തെ ഒരു അംഗത്തെ പോലെ ആയിരിക്കും ഇക്കൂട്ടരുടെ സ്ഥാനവും. വളര്‍ത്തു മൃഗങ്ങള്‍ക്ക് വേണ്ടി പ്രത്യേക കളിപ്പാട്ടങ്ങള്‍ വാങ്ങുന്നത് മുതല്‍ അവയ്ക്ക് ഒരു റേസ് ട്രാക്ക് നിര്‍മ്മിക്കുന്നതും പ്രത്യേക കിടക്കകളും ഫര്‍ണിച്ചറുകളും വരെ നിര്‍മ്മിച്ചു നല്‍കി മനുഷ്യന്‍ തങ്ങളുടെ പ്രിയ സഹചാരികളോടുള്ള സ്‌നേഹം പ്രകടിപ്പിക്കുന്ന കഥകള്‍ ഒരുപാടുണ്ട്.