സിനിമാ ലോകത്ത് ഏറെ ആഘോഷിക്കപ്പെട്ടതായിരുന്നു നടന്‍ ബാലയുടെയും എലിസബത്തിന്റെയും വിവാഹം. ബാല വിവാഹിതനാവുന്നു എന്ന വാര്‍ത്ത പുറത്തുവന്നപ്പോഴും വധുവിനെ കുറിച്ച്‌ ഒരു സൂചനപോലും പുറത്തുവന്നില്ല, ഇതിനിടെ പല പേരുകളും ഉയര്‍ന്നുവന്നു.

ഒടുവില്‍ ഒരു വിഡിയോയിലൂടെയാണ് ആ സസ്‌പെന്‍സ് പുറത്തായത്. പക്ഷെ ആ വിഡിയോ പോസ്റ്റ് ചെയ്തയാള്‍ ബാലയുടെ വിവാഹത്തിന് പോലും എത്തിയില്ല. ആ പരിഭവം നിലനില്‍ക്കെയാണ് കക്ഷിയെ എയര്‍പോര്‍ട്ടില്‍ വച്ച്‌ ബാല കാണുന്നത്. പിന്നെ ഒട്ടും വൈകിയില്ല. കയ്യോടെ പിടികൂടി വിഡിയോയിലാക്കി സോഷ്യല്‍ മീഡിയയില്‍ ഇട്ടു.

ക്രിക്കറ്റ് താരവും നടനുമായ ശ്രീശാന്ത് ആണ് ആ ആള്‍. അന്ന് ഷൂട്ടിംഗ് ഉള്ളതുകൊണ്ടാണ് വിവാഹത്തിന് പങ്കെടുക്കാതിരുന്നതെന്നും ശ്രീശാന്ത് വിഡിയോയില്‍ പറയുന്നുണ്ട്. സോഷ്യല്‍ മീഡിയയില്‍ സജീവമായ ഡോക്ടര്‍ ആണ് എലിസബത്ത്. ഇവരുടേത് പ്രണയവിവാഹമായിരുന്നു. സെപ്റ്റംബർ 5നായിരുന്നു കേരളത്തിൽ വെച്ച് ഉറ്റ സുഹൃത്തുക്കൾക്കൊപ്പം ബാലയുടെയും എല്ലുവിന്റെയും വിവാഹ റിസപ്‌ഷൻ.

വിവാഹ റിസപ്‌ഷന് ശേഷംബാല തന്റെ പ്രിയതമയ്ക്ക് നൽകിയ സമ്മാനവും ഏറെ ശ്രദ്ധ നേടിയിരുന്നു. ഓഡിയുടെ എസ് യു വിയായ Q3 യാണ് ബാല വിവാഹ സമ്മാനമായി എലിസബത്തിനു നൽകിയത്. ഭാര്യക്ക് ബാല താക്കോൽ കൈമാറുന്ന വീഡിയോ സമൂഹമാധ്യമങ്ങളിൽ വൈറലായിരുന്നു. 32.20 ലക്ഷം രൂപ മുതൽ 43.61 ലക്ഷം രൂപ വരെയാണ് ഓഡി Q3 യുടെ എക്സ് ഷോറൂം വില.

രജനികാന്ത് നായകനായി തമിഴില്‍ ഒരുങ്ങുന്ന ബിഗ് ബജറ്റ് ചിത്രം 'അണ്ണാത്തെ' യില്‍ അഭിനയിക്കുന്നതിന്റെ സന്തോഷത്തിലാണ് ഇപ്പോൾ ബാല. ബാലയുടെ സഹോദരനും സംവിധായകനുമായ ശിവ സംവിധാനം ചെയ്യുന്ന ചിത്രമാണെന്ന പ്രത്യേകത കൂടി സിനിമയ്ക്കുണ്ട്. അടുത്തിടെ സിനിമയുടെ ചിത്രീകരണത്തിനിടെ ബാലയ്ക്ക് പരിക്ക് പറ്റിയെന്നുള്ള വാര്‍ത്ത വലിയ രീതിയില്‍ ചര്‍ച്ചയാക്കിയിരുന്നു.

അപകടത്തിന് ശേഷം തന്റെ വലത് കണ്ണിന്റെ കാഴ്ചയ്ക്ക് ചെറിയ പ്രശ്‌നമുണ്ടെന്ന് കഴിഞ്ഞ ദിവസം പൊതുവേദിയില്‍ ബാല തന്നെ വെളിപ്പെടുത്തുകയും ചെയ്തു. ഇപ്പോഴിതാ അണ്ണാത്തെ സിനിമയെ കുറിച്ചും ചിത്രീകരണത്തിനിടയില്‍ തനിക്ക് പരിക്ക് പറ്റിയത് എങ്ങനെയാണെന്ന് ബാല പറഞ്ഞിരുന്നു. ''അണ്ണാത്തെ സിനിമയുടെ സംഘട്ടന രംഗം ചിത്രീകരിക്കവേ ആണ് തനിക്ക് പരിക്കേല്‍ക്കുന്നത്. ഇരുപത് മുതല്‍ മുപ്പത് ഫീറ്റ് വരെ ഉയരത്തില്‍ തലകീഴായി നിന്നിട്ടുള്ള സംഘട്ടനമാണ് ചിത്രീകരിച്ചത്.

എങ്ങനെയാണ് എന്റെ കണ്ണിന് പരിക്ക് പറ്റിയതെന്ന് വ്യക്തമല്ല. അപകട കാരണം അറിയാന്‍ വീഡിയോസ് എല്ലാം പരിശോധിച്ച് നോക്കുന്നുണ്ട്. ആ സീനിന് ശേഷം കണ്ണില്‍ നിന്നും രക്തം വരാന്‍ തുടങ്ങിയതോടെയാണ് ആശുപത്രിയില്‍ പ്രവേശിപ്പിച്ചത്.

ആദ്യം ലക്‌നൗവിലെ ആശുപത്രിയിലും പിന്നീട് കേരളത്തില്‍ വന്നും ചികിത്സയക്ക് വിധേനായതായി ബാല വ്യക്തമാക്കുന്നു. അതേ സമയം സിനിമയിലെ റിസ്‌ക് ഏറ്റെടുക്കാന്‍ താന്‍ ബാധ്യസ്ഥനാണെന്ന് കൂടി ബാല ഓര്‍മ്മപ്പെടുത്തുകയാണ്.

ഒരു നടന്‍ എന്ന നിലയ്ക്ക് ഇതെന്റെ ജോലിയുടെ ഭാഗമാണ്. അതിലൊരു പരാതിയുമില്ലെന്നാണ് താരം പറയുന്നത്. രജനികാന്ത് നായകനാവുന്ന അണ്ണാത്തെ 240 കോടി മുതല്‍ മുടക്കില്‍ നിര്‍മ്മിക്കുന്ന വലിയ ചിത്രമാണ്. എന്റെ സഹോദരന്‍ സംവിധാനം ചെയ്യുന്ന സിനിമയാണെന്ന പ്രത്യേകത കൂടി അണ്ണാത്തെയ്ക്ക് ഉണ്ടെന്ന് കൂടി ബാല സൂചിപ്പിച്ചിരുന്നു.