കലാപകലുഷിതമായ സിറിയയില്‍ നിന്നും സമാധാനജീവിതം തേടി പലായനം ചെയ്യവെ ജീവിതം തന്നെ നഷ്ടപ്പെട്ട അബ്ദുല്ല കുര്‍ദിയുടെ കഥ ആരുടേയും കരളലിയിക്കും. കഴിഞ്ഞ ദിവസം തുര്‍ക്കിയില്‍നിന്നു ഗ്രീസിലേക്കുള്ള യാത്രാമധ്യേ കുടിയേറ്റ ബോട്ടില്‍ നിന്നും കടലില്‍ വീണ് തുര്‍ക്കികടല്‍ത്തീരത്ത് മരിച്ചടിഞ്ഞ മൂന്നു വയസുകാരന്‍ അയ്‌ലാന്റെ പിതാവാണ് അബ്ദുല്ല കുര്‍ദി.

\'ഞാന്‍ ഭാര്യയുടെ കൈപിടിച്ചു മക്കളെ ചേര്‍ത്തുനില്‍ക്കുകയായിരുന്നു. പക്ഷേ, അയ്‌ലാന്‍ എന്റെ കയ്യിലൂടെ വഴുതിപ്പോയി. ഞങ്ങള്‍ ചെറിയ ബോട്ടിലേക്കു മാറാന്‍ ശ്രമിച്ചു. പക്ഷേ, പരാജയപ്പെട്ടു. ഇരുട്ടത്ത് എല്ലാവരും നിലവിളിക്കുകയായിരുന്നു\' ലോകത്തിന്റെ നൊമ്പരമായി മാറിയ അയ്‌ലാന്റെ പിതാവ് അബ്ദുല്ല കുര്‍ദി പറയുന്നു.

ആ ബോട്ട് മുങ്ങാന്‍ തുടങ്ങുമ്പോള്‍ മറ്റൊരു ചെറിയ ബോട്ടിലേക്കു മാറാന്‍ ശ്രമിച്ചെങ്കിലും അബ്ദുല്ലയെ ജീവിതത്തില്‍ തനിച്ചാക്കി അയ്‌ലാനും സഹോദരന്‍ ഗാലിപും അമ്മയും ആ അപകടത്തില്‍ മുങ്ങിത്താണു. അവരെക്കൂടാതെ സിറിയന്‍ അഭയാര്‍ഥികളായ 13 പേരും മരിച്ചു.

ഐസിസ് ഭീകരര്‍ സ്വസ്ഥത ഇല്ലാതാക്കിയ സിറിയയില്‍ നിന്നും പുതിയ ജീവിതത്തിന് അഭയം നല്‍കുമോ എന്ന് നേരത്തെ അബ്ദുള്ള കാനഡയോടപേക്ഷിച്ചിരുന്നെങ്കിലും കാനഡ അഭയം നിഷേധിച്ചിരുന്നു. അഭയാര്‍ഥികളുടെ പ്രശ്‌നങ്ങളും ഭീകരമായ അവസ്ഥയും ലോകത്തിനു മുന്നില്‍ തുറന്നു കാണിക്കുന്നതായിരുന്നു കടല്‍ തീരത്ത് മരണത്തെ ചുംബിച്ചു കിടക്കുന്ന മൂന്നു വയസുകാരന്‍ അയ്‌ലാന്റെ ചിത്രം.

\'ഇനിയാര്‍ക്കും ഇത്തരം അനുഭവങ്ങള്‍ ഉണ്ടാകരുത്. ഇത് അവസാനത്തേതാകണം. ഈ സംഭവത്തിന് നേരെ ലോകത്തിന്റെ മുഴുവന്‍ ശ്രദ്ധ ഞാന്‍ ക്ഷണിക്കുന്നുവെന്ന് അബ്ദുല്ല പറഞ്ഞു. നേരത്തെ അഭയം നിഷേധിച്ച കാനഡ ഇപ്പോള്‍ അബ്ദുള്ളയെ രാജ്യത്തേക്ക് ക്ഷണിച്ചെങ്കിലും സിറിയയിലേക്കു തിരിച്ച് പോകാനാണ് തീരുമാനം. ഭാര്യയെയും കുടുംബത്തെയും സിറിയയില്‍ സംസ്‌കരിച്ച് അവിടെ തന്നെ കഴിയണം\' അബ്ദുല്ല പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha