സംസ്ഥാനത്തെ വിപണയില്‍ നിറപറ ഒറ്റപ്പെട്ട അവസ്ഥയിലേക്ക് എത്തുകയാണ്. ഭക്ഷ്യസുരക്ഷാ കമ്മീഷണര്‍ ടി.വി. അനുപമ നിലപാട് കടുപ്പിച്ചതോടെ നിറപറയുടെ നിലനില്‍പ്പ് തന്നെ ഭീഷണിയിലായി. രണ്ട് ദിവസത്തിനകം നിറപറയുടെ നിരോധിക്കപ്പെട്ട ഉല്‍പ്പനങ്ങള്‍ വിപണിയില്‍ നിന്ന് പൂര്‍ണ്ണമായും പിന്‍വാങ്ങും. അതിനിടെ നിറപറയുടെ നിരോധിക്കപ്പെടാത്ത മറ്റ് നിറപറ ഉല്‍പ്പനങ്ങളേയും വിവാദം ബാധിച്ചിട്ടുണ്ട്. 
വ്യാപകമായി മായം കലര്‍ത്തി എന്ന് തെളിഞ്ഞതിനെ തുടര്‍ന്നാണ് നിറപറയുടെ മൂന്ന് ഉല്‍പ്പന്നങ്ങളായ മല്ലിപ്പൊടി, മുളക്‌പൊടി, മഞ്ഞള്‍പൊടി എന്നിവ വിപണിയില്‍ നിന്നും നിരോധിച്ചത്. ഇവ വിപണിയില്‍ നിന്നും പിന്‍വലിക്കുന്നതിന് സെപ്റ്റംബര്‍ ഒന്‍പതു വരെ സമയം അനുവദിച്ചു. അതിനു ശേഷവും അവ വിപണിയില്‍ കണ്ടാല്‍ കര്‍ശന നിയമ നടപടി സ്വീകരിക്കുമെന്ന് സംസ്ഥാന ടി.വി. അനുപമ പറഞ്ഞു. സംസ്ഥാനത്തെ എല്ലാ ജില്ലകളില്‍ നിന്നും കഴിഞ്ഞ ഒന്നര വര്‍ഷത്തിനുള്ളില്‍ ശേഖരിച്ച 34 സാമ്പിളുകളിലും മായം കണ്ടെത്തിയതിനെ തുടര്‍ന്നാണ് നിറപറയുടെ മല്ലിപ്പൊടി, മുളക് പൊടി, മഞ്ഞള്‍പൊടി എന്നിവ നിരോധിച്ചത്.
പരിശോധനയില്‍ ഇവയിലെല്ലാം 15% മുതല്‍ 70% വരെ അന്നജത്തിന്റെ സാനിദ്ധ്യം കണ്ടെത്തിയിരുന്നു. മല്ലിപ്പൊടിയിലായിരുന്നു അന്നജത്തിന്റെ തോത് കൂടുതല്‍ കണ്ടെത്തിയത്. ഇവയില്‍ ആരോഗ്യത്തിന് ഹാനികരമായ കൂടുതല്‍ രാസവസ്തുക്കള്‍ ചേര്‍ത്തിട്ടുണ്ടോ എന്നിവ ഉള്‍പ്പെടെ അറിയുന്നതിനായി കൂടുതല്‍ പരിശോധനയക്ക് അയച്ചിരിക്കുകയാണ്. നിറപറയുടെ മൂന്ന് കറിപ്പൊടികളില്‍ മായം കലര്‍ന്നതായി വാര്‍ത്തകള്‍ വന്നതോടെ മിക്ക കടകളിലും അവയുടെ വില്‍പ്പന നിറുത്തി വച്ചിരിക്കുകയാണ്. 
മുമ്പും നിരവധി തവണ നിറപറ ഉത്പന്നങ്ങളില്‍ അന്നജത്തിന്റെ സാന്നിദ്ധ്യം കണ്ടെത്തിയിട്ടുണ്ട്. 34 കേസുകള്‍ ഭക്ഷ്യസുരക്ഷാ വകുപ്പ് നിറപറയ്‌ക്കെതിരെ കോടതിയില്‍ ഫയല്‍ ചെയ്തിട്ടുണ്ട്. ഇതില് ആറ് തവണ കോടതി നിറപറയെ ശിക്ഷിച്ചു. മൂന്നു തവണ അഞ്ച് ലക്ഷം രൂപ വീതവും, മൂന്ന് തവണ 25,000 രൂപ വീതവും പിഴയാണ് നിറപറ അടച്ചിട്ടുള്ളത്. എന്നാല്‍ നിറപറയ്ക്ക് എതിരെ ഇത്തവണ ഭക്ഷ്യ സുരക്ഷാ കമ്മീഷണറായ അനുപമ ശക്തമായ നിലപാട് എടുത്തു. ഇതോടെ സമ്മര്‍ദ്ദങ്ങളെല്ലാം വെറുതെയായി. ഈ സാഹചര്യത്തിലാണ് വിപണിയില്‍ നിന്ന് നിരോധനമെത്തിയത്.
കേരളത്തിലെ മൂന്നു ലാഭുകളിലും സ്‌പൈസസ് ബോര്‍ഡിന്റെ പരിശോധനയിലുമാണ് നിറപറ ഉത്പന്നങ്ങളില്‍ മായമുണ്ടെന്ന് കണ്ടെത്തിയത്. ഇതേത്തുടര്‍ന്നാണ് ഉത്പന്നങ്ങള്‍ വിപണിയില്‍നിന്ന് തിരികെ വിളിക്കാനുള്ള നോട്ടീസ് കമ്പനിക്ക് നല്‍കിയതെന്നും ഭക്ഷ്യസുരക്ഷാ കമ്മീഷണര്‍ വ്യക്തമാക്കി. 

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha