വന്‍ഭൂരിപക്ഷത്തില്‍ ജയിച്ചെങ്കിലും ഗണേശ് കുമാറിന്റെ കലി തീരുന്നില്ല. എതിര്‍ സ്ഥാനാര്‍ത്ഥിയായിരുന്ന നടന്‍ ജഗദീഷിനെതിരെ രൂക്ഷ വിമര്‍ശനവുമായി ഗണേശ് കുമാര്‍ വീണ്ടും. ജഗദീഷ് നീചമായും മ്ലേച്ഛമായും സംസ്‌കാരശൂന്യമായുമാണ് തനിക്കെതിരെ പ്രചരണം നടത്തിയതെന്ന് ഗണേശ് പറഞ്ഞു. അഴിമതിക്കെതിരായ വിജയമാണിത്. എല്ലാ അഗ്‌നിപരീക്ഷകളെയും അതിജീവിച്ച് തിരിച്ചുവരാന്‍ അവസരമൊരുക്കിയത് ജനങ്ങളാണ്.
അഴിമതിക്കാരായ മന്ത്രിമാര്‍ക്കെതിരെ നിയമസഭയില്‍ പ്രസംഗിച്ചതു കൊണ്ടാണ് തനിക്ക് യു.ഡി.എഫ് വിടേണ്ടി വന്നത്. കഴിഞ്ഞ മൂന്ന് തവണയും തനിക്കെതിരെ മത്സരിച്ചത് ഇടതുപക്ഷത്തിന്റെ ശക്തരായ, അന്തസുള്ള നേതാക്കന്മാരായിരുന്നു. എന്നാല്‍ ഇത്തവണ നീചനായ ഒരാളോട് മത്സരിക്കേണ്ടിവന്ന ഗതികേട് മറ്റാര്‍ക്കും ഉണ്ടാകരുതെന്നും ഗണേശ് പറഞ്ഞു.
തീര്‍ത്തും അപ്രതീക്ഷിതമായാണ് ഗണേശിനെതിരെ ജഗദീഷിനെ കോണ്‍ഗ്രസ് സ്ഥാനാര്‍ത്ഥിയാക്കിയത്. ഇതോടെ ബിജെപി ഭീമന്‍ രഘുവിനെ രംഗത്തിറക്കി ശരിക്കും താരപോരാട്ടമാക്കി. ഇതിനിടെ ഗണേശിന് വോട്ട് ചോദിച്ച് മോഹന്‍ലാല്‍ പത്തനാപുരത്ത് എത്തി. ഗണേശിനെ ജയിപ്പിക്കണമെന്ന് നിവിന്‍ പോളി ഫേസ്ബുക്കിലും ആവശ്യപ്പെട്ടു. സലിം കുമാറിന്റെ അമ്മയില്‍ നിന്നുള്ള പ്രതിഷേധ രാജിയും ചര്‍ച്ചയായി.
ഈ വിഷയം ഇനിയും സിനിമാ ലോകത്ത് കത്തിപടരുമെന്ന സൂചനയാണ് ഗണേശ് നല്‍കുന്നത്. അമ്മയുടെ യോഗത്തില്‍ ഗണേശ് ഈ വിഷയം ചര്‍ച്ചയാക്കും. പത്തനാപുരത്ത് തനിക്കെതിരെ മത്സരിക്കുന്നത് ജഗദീഷിന് ഒഴിവാക്കാമായിരുന്നു. ഇതാണ് സിനിമാ ലോകത്ത് തന്നെ പുതിയ ചര്‍ച്ചകള്‍ക്ക് സാധ്യയുണ്ടാക്കിയതെന്നാണ് ഗണേശ് പക്ഷം പറയുന്നത്.
തെരഞ്ഞെടുപ്പില്‍ ജഗദീഷ് സ്ഥാനാര്‍ത്ഥിയായതോടെയാണ് വിവാദങ്ങള്‍ തുടങ്ങുന്നത്. സോളാര്‍ കേസ് ഉള്‍പ്പെടെയുള്ളവ ഉയര്‍ത്തി ഗണേശിന്റെ സ്വാഭാവത്തെ കുറ്റപ്പെടുത്തി ജഗദീഷ് രംഗത്ത് എത്തിയതാണ് ഇതിന് തുടക്കമിട്ടത്. ഇതോടെ മറുപടിയുമായി ഗണേശുമെത്തി. സ്വന്തം അച്ഛന്‍ മരിച്ചതറിഞ്ഞിട്ടും വിദേശത്ത് സ്‌റ്റേജ് ഷോയുമായി കറങ്ങി നടന്ന ഒരു ഹാസ്യ നടന്‍ മലയാളത്തിലുണ്ടെന്നും സ്‌നേഹം നടിച്ച് വൈകാതെ നിങ്ങളുടെ സമീപത്തെത്തുമ്പോള്‍ സൂക്ഷിക്കണമെന്നുമായിരുന്നു ഗണേശിന്റെ പ്രസംഗം.
വായില്‍ വെള്ളിക്കരണ്ടിയുമായി ജനിച്ചവര്‍ക്ക് സാധാരണക്കാരുടെ പ്രശ്‌നങ്ങള്‍ മനസ്സിലാക്കാന്‍ കഴിയില്ലെന്നും നാടിന് അപമാനകരമായ യാതൊരു കാര്യവും നേതാക്കന്മാരായവര്‍ പ്രവര്‍ത്തിക്കാന്‍ പാടില്ലെന്നും ജഗദീഷ് തിരിച്ചടി നല്‍കി. ഈ വിവാദത്തില്‍ സിനിമാക്കാര്‍ ആരും പക്ഷം പിടിച്ചില്ല. ഇതിനിടെയാണ് ഏവരേയും ഞെട്ടിപ്പ് ഗണേശിന് വോട്ട് പിടിക്കാന്‍ മോഹന്‍ലാല്‍ പത്തനാപുരത്ത് എത്തിയത്. ലാലിന്റേയും പ്രിയദര്‍ശന്റേയും വരവ് തനിക്ക് വേദനയുണ്ടാക്കിയെന്ന് ജഗദീഷും പറഞ്ഞു. ഇതിനിടെ മോഹന്‍ലാലിനെതിരെ വിമര്‍ശനം ഉന്നയിച്ച് സലിംകുമാര്‍ അമ്മയില്‍ നിന്ന് രാജിവച്ചു. എന്നാല്‍ ഇതൊന്നും പത്തനാപുരത്ത് ജഗദീഷിനെ ബാധിച്ചതുമില്ല. ഈ വിവാദം ഫലം പ്രഖ്യാപനത്തിന് ശേഷം സിനിമാ വേദികളില്‍ പൊതു ചര്‍ച്ചയാകുമെന്ന് ഉറപ്പാണ്.
ഗണേശിനെതിരെ ജഗദീഷ് മത്സരിച്ചതിന്റെ ധാര്‍മികതയാകും ഒരുപക്ഷം ഉയര്‍ത്തുക. അതിന്റെ ആവശ്യം ജഗദീഷിനില്ലായിരുന്നു. കോണ്‍ഗ്രസിനോട് ചോദിച്ചെങ്കില്‍ ഏത് സീറ്റ് വേണമെങ്കിലും ജഗദീഷിന് നല്‍കുമായിരുന്നു. അതിന് പകരം സിനിമാക്കാരെ ആശയക്കുഴപ്പത്തിലാക്കാന്‍ പത്തനാപുരം ജഗദീഷ് ചോദിച്ചുവാങ്ങിയെന്നാണ് വിമര്‍ശനം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha