എതിരാളികളെ ആദ്യം കണ്ട എതിര്‍പ്പുകള്‍ ഇല്ലാതാക്കി ഭരണത്തിലേക്ക് കയറുകയാണ് പിണറായി വിജയന്‍. ഏറ്റവും എതിര്‍ത്ത വിഎസ് അച്യുതാനന്ദനേയും പിണറായി ഏറ്റവുമെതിര്‍ത്ത ഉമ്മന്‍ചാണ്ടിയേയും വീട്ടില്‍ പോയ് കണ്ട് ആദ്യത്തെ കൈയ്യടി നേടി.
സ്വകാര്യതയല്ല സ്വീകാര്യതയാണ് സൗഹൃദത്തിന് മുഖമുദ്ര... എന്നാണ് പിണറായി വിജയന്റെ കാറില്‍ എഴുതിയിരിക്കുന്നത്. അങ്ങനെ പിണറായിക്കാരുടെ സ്വന്തം വിജയന്‍ കേരളത്തിന്റെ ഭരണത്തലവനാവുകയാണ്. അതുകൊണ്ട് തന്നെ തലശ്ശേരിക്കും മമ്പറത്തിനും ഇടയിലുള്ള ഒരു പ്രദേശമല്ല ഇന്ന് പിണറായി. കേരളത്തെ നയിക്കാന്‍ നിയോഗിച്ച മുഖ്യമന്ത്രിയുടെ പേരില്‍ ഈ ദേശം ലയിച്ചു ചേര്‍ന്നിരിക്കയാണ്.
പിണറായി എന്ന പാര്‍ട്ടി ഗ്രാമത്തിന്റെ സ്വത്തായ പിണറായി വിജയനെ കയ്യെത്തും ദൂരത്ത് തൊടാനാവില്ലെന്ന ധാരണ പലര്‍ക്കുമുണ്ട്. എന്നാല്‍ അത് പിണറായി വിജയനുണ്ടാക്കിയതല്ല. അങ്ങനെ പ്രചരിച്ചു വെന്നതാണ് സത്യം. സ്‌നേഹിക്കുന്ന ആര്‍ക്കും തൊടാവുന്ന അകലത്തില്‍ പരിചയപ്പെടാവുന്ന പിണറായിയുടെ സ്വന്തം വിജയേട്ടനാണ് അദ്ദേഹം എന്നതാണ് സത്യം.
ചിരിക്കാത്ത കമ്യൂണിസ്റ്റുകാരുടെ നിലയിലായിരുന്നു പിണറായിയെ അടുത്ത് അറിയാത്തവര്‍ കണ്ടത്. എന്നാല്‍ രാഷ്ട്രീയക്കാരന്റെ മൂന്നാം കിട കൃത്രിമ ചിരി ഈ നേതാവില്‍ നിന്നും ആരും പ്രതീക്ഷിക്കേണ്ടതില്ല,. ജീവിതത്തില്‍ കര്‍ശനമായ ചിട്ടയും പ്രശ്‌നങ്ങളോടുള്ള ഗൗരവ സമീപനവും പിണറായിയെ ഒരു കര്‍ക്കശക്കാരനായി കരുതപ്പെട്ടിരുന്നു.
ഒരു രാഷ്ട്രീയ പാര്‍ട്ടിക്ക് ഉണ്ടാകേണ്ടുന്ന കേഡര്‍ സ്വഭാവത്തെക്കുറിച്ച് പിണറായിക്ക് അദ്ദേഹത്തിന്റേതായ കാഴ്ചപ്പാടുണ്ടെന്നത് പ്രവര്‍ത്തനത്തിലൂടെ വ്യക്തമാണ്. പാര്‍ട്ടിയുടെ മേല്‍ കമ്മിറ്റികള്‍ എങ്ങിനെ പ്രവര്‍ത്തിക്കണമെന്നും കീഴ് ഘടകങ്ങളുടെ രീതി എന്തായിരിക്കണമെന്നും കണ്ണൂരിലെ പാര്‍ട്ടി സംവിധാനങ്ങള്‍ കണ്ടാല്‍ മനസ്സിലാവും.
സംസ്ഥാനം മുഴുവന്‍ ഈ രീതിയില്‍ പ്രാവര്‍ത്തികമാക്കാന്‍ കഴിഞ്ഞില്ലെങ്കിലും മലബാറിലെ ഇന്നത്തെ പാര്‍ട്ടി ഘടനയുടെ സംവിധായകന്‍ പിണറായിയായിരുന്നു. സഹകരണ പ്രസ്ഥാനത്തിന്റെ പ്രധാന വക്താവായിരുന്നു പിണറായി വിജയന്‍. സംഘടിച്ച് വിജയം കൈവരിക്കാന്‍ ഒട്ടേറെ സഹകരണ സംഘങ്ങള്‍ക്ക് നേതൃത്വം നല്‍കിയിരുന്നു അദ്ദേഹം. പിണറായിയിലും പരിസരത്തും മാത്രമല്ല കണ്ണൂര്‍ ജില്ലയും കടന്ന് വിവിധ തരത്തിലുള്ള സഹകരണ സംഘങ്ങള്‍ രൂപമെടുത്തതില്‍ പിണറായിയുടെ പങ്ക് വിവരണാതീതമാണ്. വടക്കേ മലബാറിലെങ്ങും നിറഞ്ഞു നില്‍ക്കുന്ന സഹകരണ സംഘത്തിലൂടെ ആയിരങ്ങള്‍ക്കാണ് തൊഴില്‍ ലഭിച്ചിട്ടുള്ളത്.
എതിര്‍ ചേരിയിലുള്ള മുന്‍ മന്ത്രിമാര്‍ ചെയ്ത നല്ല പ്രവര്‍ത്തനങ്ങളെ പിണറായി തമസ്‌ക്കരിക്കാറില്ല. അദ്ദേഹം സഹകരണ വൈദ്യുത മന്ത്രിയായിരുന്നപ്പോള്‍ എം വിരാഘവന്റേയും ജി.കാര്‍ത്തികന്റേയും പ്രവര്‍ത്തനങ്ങളെ പൊതു വേദിയില്‍ വച്ച് തന്നെ എടുത്തു പറയാറുണ്ട്. നയപരമായി അഭിപ്രായ വ്യത്യാസങ്ങളുണ്ടാകാമെങ്കിലും മുന്‍ ഭരണാധികാരികള്‍ തുടങ്ങി വച്ച വികസന പ്രവര്‍ത്തനങ്ങള്‍ക്ക് തുടര്‍ച്ച ഉണ്ടാക്കാനും പിണറായി ശ്രമിച്ചിരുന്നു.
മുന്‍ മന്ത്രിയായിരുന്ന കാലത്ത് ഇത് അദ്ദേഹം തെളിയിച്ചിരുന്നു. സമയത്തിന്റെ കാര്യത്തില്‍ കണിശക്കാരനായിരുന്നു പണറായി. ഉണരുന്നതും ഉണ്ണുന്നതും ഉറങ്ങുന്നതുമെല്ലാം സമയക്രമ മനുസരിച്ചു തന്നെ. ഇനിയെല്ലാം ജനങ്ങള്‍ക്കായി...

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha