അമേരിക്കയിലെ കണെക്ടിക്കട്ടിലുള്ള ഒരു രോഗിയില്‍ നിന്നും 60 കിലോയോളം ഭാരം വരുന്ന ഒരു അണ്ഡാശയ മുഴ നീക്കം ചെയ്യുന്നതിന് 20 സര്‍ജന്‍മാര്‍ 5 മണിക്കൂറോളം അദ്ധ്വാനിയ്‌ക്കേണ്ടി വന്നു.38-കാരിയായ രോഗി കഴിഞ്ഞ കുറച്ചു ദിവസങ്ങളായി വീല്‍ ചെയറിലേക്ക് മാറിയിരുന്നു .ആഹാരം ഒന്നും കഴിയ്ക്കുവാന്‍ ആകാതെ അവര്‍ തീര്‍ത്തും അവശ ആയിക്കഴിഞ്ഞിരുന്നു. ഒരാഴ്ചയില്‍ 10 പൗണ്ട് (ഏകദേശം 30 കിലോ) എന്ന രീതിയിലാണ് മുഴയ്ക്ക് തൂക്കം കൂടിക്കൊണ്ടിരുന്നത്. മുഴയുടെ വലിപ്പം കൂടിക്കൂടി അത് പ്രസ്തുത രോഗിയുടെ ദഹനേന്ദ്രിയ വ്യവസ്ഥയെ ഞെരുക്കികൊണ്ടിരുന്നതിനാല്‍ അവര്‍ക്ക് ഭക്ഷണം കഴിയ്ക്കാന്‍ കഴിയുന്നുണ്ടായിരുന്നില്ല.

കണെക്ടിക്കട്ടിലുള്ള ഡാന്‍ബറി ആശുപത്രിയില്‍ വച്ച് ഇക്കഴിഞ്ഞ ഫെബ്രുവരിയില്‍ നടന്ന ശസ്ത്രക്രിയയുടെ വിവരങ്ങള്‍ ഇപ്പോഴാണ് പുറത്തു വിട്ടത്. രണ്ടു മാസത്തെ പഠനത്തിനും തയ്യാറെടുപ്പിനും ശേഷമാണ് ഫെബ്രുവരിയില്‍ ഓപ്പറേഷന്‍ നടത്തിയത്. മുഴ, അവരുടെ എല്ലാ പ്രധാനപ്പെട്ട ആന്തരിക അവയവങ്ങളുടെയും സമീപത്തോളം വളര്‍ന്നിരുന്നതിനാലും അതിന്റെ വലിപ്പം അസാധാരണമായിരുന്നതിനാലുമാണ് ഇത്രയധികം ശ്രദ്ധയും പഠനവും നടത്തിയത്.ശസ്ത്രക്രിയ ചെയ്തു നീക്കം ചെയ്ത മുഴയെ പഠനവിധേയമാക്കുകയാണ് ഇപ്പോള്‍.

ശസ്ത്രക്രിയയ്ക്ക് നേതൃത്വം നല്‍കിയ ഡോക്ടര്‍ വാഗന്‍ ആന്റിക്യാന്‍ പറഞ്ഞത്, താന്‍ ഒരു പത്തു പതിനൊന്നു കിലോ തൂക്കമുള്ള മുഴ ആണ് പ്രതീക്ഷിച്ചിരുന്നതെന്നും 60 കിലോ എന്നൊക്കെ പറയുന്നത് വളരെ അസാധാരണ വലിപ്പം ആണെന്നുമാണ്. ആ രോഗിയ്ക്ക് ജീവിതത്തെ കുറിച്ചുള്ള പ്രതീക്ഷകള്‍ ഒക്കെ നശിച്ചിരുന്നു.ആര്‍ക്കും അവരെ സഹായിയ്ക്കാനാവില്ല എന്നാണ് അവര്‍ കരുതിയിരുന്നത്. ഇല്ല, മാഡം നിങ്ങള്‍ക്കിനിയും പ്രത്യാശയുണ്ട് എന്ന് ഞാന്‍ അവരോടു പറഞ്ഞപ്പോള്‍ അവരുടെ, നിരാശ കൊണ്ട് മങ്ങിയ കണ്ണുകള്‍ പ്രതീക്ഷയില്‍ തിളങ്ങി എന്നാണ് ഡോക്ടര്‍ പറഞ്ഞത്.

ഡാന്‍ബറിയിലെ തങ്ങളുടെ ആശുപത്രിയില്‍ വച്ചു തന്നെ ആ ഓപ്പറേഷന്‍ നടത്താനാവുമെന്ന് തനിയ്ക്ക് പ്രതീക്ഷ ഉണ്ടായിരുന്നു എന്ന് ഡോക്ടര്‍ അറിയിച്ചു. അണ്ഡാശയമുഴകള്‍ ഉണ്ടെന്ന് കണ്ടെത്താന്‍ അല്‍പം പ്രയാസമാണ്. കാരണം അവയുടെ ലക്ഷണങ്ങള്‍ മറ്റു ചില ചെറിയ രോഗങ്ങളുടേതിന് സമാനമായിരിക്കും. ആര്‍ത്തവകാലത്തുള്ള വയറുവേദന പോലെയോ ദഹനക്കേടിന്റേതു പോലുള്ളതോ ലക്ഷണങ്ങള്‍ കാണുമ്പോള്‍ പലരും അത് കാര്യമായി എടുക്കാറില്ല.

ഈ സ്ത്രീയ്ക്കുണ്ടായിരുന്ന മുഴയാകട്ടെ അണ്ഡാശയ മുഴകളില്‍ ഏറെക്കുറെ സാധാരണ കാണപ്പെടുന്ന തരം മുഴയായിരുന്നു. ഇവ പുകവലിയ്ക്കുന്നവരോ, മുന്‍പ് പുകവലിച്ചിരുന്നവരോ ആയവരിലാണ് കാണപ്പെടാറുള്ളത്. ഇത്തരം മുഴകളില്‍ അധികവും ക്യാന്‍സറിന് കാരണമാകാത്തവ ആയിരിക്കും. ഈ രോഗിയുടെ കാര്യത്തിലും അത് അങ്ങനെ തന്നെ ആയിരുന്നു. ഈ രോഗിയുടേത് മ്യൂസിനസ് തരത്തിലുള്ള മുഴ ആയിരുന്നു. ഇത്തരം മുഴകള്‍ക്കുള്ളില്‍ കഫം പോലുള്ള ഒരു സ്രവം നിറഞ്ഞിരിയ്ക്കും. തന്മൂലം അതിന് ഭീമമായ വലിപ്പവും ഭാരവും ഉണ്ടായിരിയ്ക്കും.