ഇടക്കിടക്ക്‌ വന്ന്‌ കളി മുടക്കാന്‍ ശ്രമിച്ച മഴക്കും ഇന്ത്യന്‍ യുവ നിരയെ തളര്‍ത്താന്‍ സാധിച്ചില്ല. ആതിഥേയരായ ഇംഗ്ലണ്ടിനെ പരാജയപ്പെടുത്തി ഇന്ത്യ ചാമ്പ്യന്‍സ്‌ട്രോഫിയില്‍ മുത്തമിട്ടു. ഇതുകൂടാതെ ഇന്ത്യയുടെ രവീന്ദ്ര ജഡേജയെ മാന്‍ ഓഫ്‌ ദി മാച്ചായും. ശിഖര്‍ ധവാനെ മാന്‍ ഓഫ്‌ ദി സീരീസായും തെരെഞ്ഞെടുത്തു. ഇത്‌ രണ്ടാം തവണയാണ്‌ ഇന്ത്യ ചാമ്പ്യന്‍സ്‌ ട്രോഫി സ്വന്തമാക്കുന്നത്‌. അവസാന പന്തുവരെ ആവേശം നിറഞ്ഞുനിന്ന മത്സരത്തിലാണ് ഇന്ത്യയുടെ വിജയം. അവസാന പന്തില്‍ സിക്‌സര്‍ നേടിയാല്‍ ഇംഗ്ലണ്ടിന് മത്സരം വിജയിക്കാനാവുമായിരുന്നു. മഴയെ തുടര്‍ന്ന്‌ മത്സരം 20 ഓവറിലേക്കു വെട്ടിച്ചുരുക്കിയിരുന്നു. ആറാം ഓവറിന്റെ അഞ്ചു ബോള്‍ ആയപ്പോഴേക്കും വീണ്‌ടും മഴയെത്തി. ഒരു വിക്കറ്റ്‌ നഷ്ടത്തില്‍ 28 റണ്‍സ്‌ എന്ന നിലയിലായിരുന്നു ഇന്ത്യ അപ്പോള്‍. 6.2 ഓവറില്‍ 38 റണ്‍സ്‌ എന്ന നിലയില്‍ ഇന്ത്യ പതറിയപ്പോള്‍ ഒരിക്കല്‍ക്കൂടി മഴയെത്തി. പിന്നീട്‌ മത്സരം ആരംഭിച്ചപ്പോള്‍ ഇംഗ്ലണ്‌ട്‌ പിടിമുറുക്കി. നേരത്തേ ട്വന്റി-20 പോരാട്ടത്തെ അനുസ്‌മരിപ്പിക്കുന്ന തുടക്കവുമായി ധവാനും രോഹിതും ഇന്ത്യന്‍ ബാറ്റിംഗിന്‌ തുടക്കം കുറിച്ചു. എന്നാല്‍, നാലാം ഓവറില്‍ രോഹിത്‌ ശര്‍മയുടെ വിക്കറ്റ്‌ സ്റ്റൂവര്‍ട്ട്‌ ബ്രോഡ്‌ പിഴുതു. ബ്രോഡിന്റെ ഇന്‍സ്വിംഗര്‍ രോഹിതിന്റെ വിക്കറ്റ്‌ തെറിപ്പിച്ചു. മഴയ്‌ക്കുശേഷം ഇന്ത്യന്‍ ബാറ്റ്‌സ്‌മാന്മാരുടെ ഘോഷയാത്രയ്‌ക്കാണ്‌ എഡ്‌ഗ്‌ബാസ്റ്റണ്‍ സാക്ഷ്യംവഹിച്ചത്‌. അലക്ഷ്യമായ ഷോട്ടുകളിലൂടെ ഇന്ത്യന്‍ മുന്‍നിര ബാറ്റ്‌സ്‌മാന്മാര്‍ വിക്കറ്റ്‌ വലിച്ചെറിഞ്ഞു. 24 പന്തില്‍ 31 റണ്‍സെടുത്ത ശിഖര്‍ ധവാനെ രവി ബൊപ്പാര ട്രെഡ്‌വെല്ലിന്റെ കൈകളിലെത്തിച്ചു. പിന്നാലെയെത്തിയ കാര്‍ത്തികും (6) സുരേഷ്‌ റെയ്‌നയും (1) ക്യാപ്‌റ്റന്‍ ധോണിയും (0) ലക്ഷ്യംമറന്നപ്പോള്‍ ഇന്ത്യ 13 ഓവറില്‍ 66 എന്ന ദയനീയ നിലയിലേക്കു നിലംപൊത്തി. ഒടുവില്‍ വിരാട്‌ കോഹ്‌ലിയും രവീന്ദ്ര ജഡേജയും നടത്തിയ പോരാട്ടമാണ്‌ ഇന്ത്യക്ക്‌ പൊരുതാനുള്ള സ്‌കോര്‍ സമ്മാനിച്ചത്‌. വിരാട്‌ 34 പന്തില്‍ 43 റണ്‍സെടുത്ത്‌ ഇന്ത്യയുടെ ടോപ്‌ സ്‌കോററായി. ഒരു സിക്‌സും നാലു ഫോറും അടങ്ങുന്നതായിരുന്നു കോഹ്‌ലിയുടെ ഇന്നിംഗ്‌സ്‌. ആന്‍ഡേഴ്‌സനാണ്‌ കോഹ്‌ലിയെ മടക്കിയയച്ചത്‌. 25 പന്തില്‍ നിന്ന്‌ രണ്ടു വീതം സിക്‌സും ഫോറും അടിച്ച രവീന്ദ്ര ജഡേജ 33 റണ്‍സെടുത്ത്‌ പുറത്താകാതെ നിന്നു. ക്യാപ്റ്റന്‍ കുക്കിനെ (2) തുടക്കത്തിലേ മടക്കി ഉമേഷ് യാദവ് ഇന്ത്യയെ മത്സരത്തിലേക്ക് കൊണ്ടുവന്നു. മികവോടെ ബാറ്റ് ചെയ്ത ജോനാഥന്‍ ട്രോട്ടിനെയും (20) ജോ റൂട്ടിനെയും (7) ഇയാന്‍ ബെല്ലിനെയും (13) തുടരെ നഷ്ടപ്പെടുകയും ചെയ്തതോടെ ഇംഗ്ലണ്ട് പ്രതിരോധത്തിലായി. മോര്‍ഗനും(33) രവി ബൊപ്പാരയും (30) ചേര്‍ന്ന 64 റണ്‍സിന്റെ അഞ്ചാം വിക്കറ്റ് കൂട്ടുകെട്ട് മത്സരം ഇംഗ്ലണ്ടിന്റെ വഴിയിലേക്ക് കൊണ്ടുവന്നെങ്കിലും അടുത്തടുത്ത പന്തുകളില്‍ ഇരുവരെയും മടക്കി ഇഷാന്ത് ശര്‍മ നിര്‍ണായകമായ ബ്രേക്ക് ത്രൂ സമ്മാനിച്ചു. അവസാനത്തെ പതിനാറു പന്തില്‍ ഇംഗ്ലണ്ടിന്‌ ജയിക്കാന്‍ 20 റണ്‍സ്‌ മതിയായിരുന്നു. അവസാന പന്തില്‍ ആറു റണ്‍സും. എന്നാല്‍ അവസാന ഓവര്‍ എറിയാന്‍ വന്ന അശ്വിന്‍ കരുതലോടെ ബോള്‍ ചെയ്‌ത്‌ വിജയം ഇംഗ്ലണ്ടില്‍ നിന്നും തട്ടിയെടുക്കുകയായിരുന്നു. സ്‌കോര്‍ബോര്‍ഡ്‌ ഇന്ത്യ:രോഹിത്‌ ശര്‍മ ബി ബ്രോഡ്‌ 9, ശിഖര്‍ ധവാന്‍ സി ട്രെഡ്‌വെല്‍ ബി ബൊപ്പാര 31, കോഹ്‌ലി സി ബൊപാര ബി ആന്‍ഡേഴ്‌സണ്‍ 43, കാര്‍ത്തിക്‌ സി മോര്‍ഗന്‍ ബി ട്രെഡ്‌വെല്‍ 6, റെയ്‌ന സി കുക്ക്‌ ബി ബൊപ്പാര 1, ധോണി സി ട്രെഡ്‌വെല്‍ ബി ബൊപ്പാര 0, ജഡേജ നോട്ടൗട്ട്‌ 33, അശ്വിന്‍ റണ്ണൗട്ട്‌ 1, ഭുവനേശ്വര്‍ കുമാര്‍ നോട്ടൗട്ട്‌ 1, എക്‌സ്‌ട്രാസ്‌ 4, ആകെ 20 ഓവറില്‍ ഏഴു വിക്കറ്റ്‌ നഷ്ടത്തില്‍ 129. ഇംഗ്ലണ്ട്‌: അലിസ്റ്റര്‍ കുക്ക്‌ സി അശ്വിന്‍ ബി ഉമേഷ്‌ യാദവ്‌ 2, ബെല്‍ സ്റ്റംപ്‌ഡ്‌ ധോണി ബി ജഡേജ 13, ട്രോട്ട്‌ സ്‌റ്റംപ്‌ഡ്‌ ധോണി ബി അശ്വിന്‍ 20, റൂട്ട്‌ സി ഇഷാന്ത്‌ ബി അശ്വിന്‍ 7, മോര്‍ഗന്‍ സി അശ്വിന്‍ ബി ഇഷാന്ത്‌ 33, ബൊപ്പാര സി അശ്വിന്‍ ബി ഇഷാന്ത്‌ 30, ബട്ട്‌ലര്‍ ബി ജഡേജ 0, ബ്രസ്‌നന്‍ റണ്ണൗട്ട്‌ 2, ബ്രോഡ്‌ നോട്ടൗട്ട്‌ 7, ട്രെഡ്‌വെല്‍ 1, എക്‌സ്‌ട്രാസ്‌ 5, ആകെ 20 ഓവറില്‍ എട്ടു വിക്കറ്റിന്‌ 124.