ഓസ്‌ട്രേലിയയ്ക്കെതിരായ മൂന്നാം ഏകദിനത്തില്‍, 32-ാം ഓവറില്‍ ഇന്ത്യ അഞ്ച് വിക്കറ്റ് നഷ്ടത്തില്‍ 152 റണ്‍സെന്ന നിലയില്‍ നില്‍ക്കെ ക്രീസില്‍ ഒരുമിച്ച പാണ്ഡ്യ - ജഡേജ സഖ്യം, ശേഷിച്ച 108 പന്തുകളില്‍നിന്ന് 150 റണ്‍സാണ് അടിച്ചുകൂട്ടിയത്.

ഇന്ത്യയെ മികച്ച സ്‌കോറിലേക്ക് നയിക്കാന്‍ തകര്‍പ്പന്‍ കൂട്ടുകെട്ടൊരുക്കിയ ഇവരുടെ കൂട്ട്‌കെട്ട്, ഇരുവരുടെയും കരിയറിനേക്കാളും പഴക്കമുള്ളൊരു റെക്കോര്‍ഡും പഴങ്കഥയാക്കി.

108 പന്തുകളില്‍നിന്ന് അടിച്ചുകൂട്ടിയ 150 റണ്‍സില്‍ ഹാര്‍ദിക് പാണ്ഡ്യ 76 പന്തില്‍ ഏഴു ഫോറും ഒരു സിക്‌സും സഹിതം 92 റണ്‍സെടുത്തപ്പോള്‍, രവീന്ദ്ര ജഡേജ 50 പന്തില്‍ അഞ്ച് ഫോറും മൂന്നു സിക്‌സും സഹിതം 66 റണ്‍സുമെടുത്തു.

റോബിന്‍ സിങ്ങും സഡഗോപന്‍ രമേശും ചേര്‍ന്ന് 1999-ല്‍ കൊളംബോയില്‍വച്ച് ഓസീസിനെതിരെ നേടിയ 123 റണ്‍സിന്റെ റെക്കോര്‍ഡാണ് ഇവര്‍ക്കു മുന്നില്‍ തകര്‍ന്നത്. ഏകദിനത്തില്‍ കഴിഞ്ഞ 21 വര്‍ഷത്തിനിടെ ഓസ്‌ട്രേലിയയ്ക്കെതിരെ ആറാം വിക്കറ്റില്‍ പിറക്കുന്ന ഇന്ത്യന്‍ താരങ്ങളുടെ ഏറ്റവും ഉയര്‍ന്ന കൂട്ടുകെട്ടാണ് പാണ്ഡ്യയും ജഡേജയും ചേര്‍ന്ന് സ്വന്തം പേരിലാക്കിയത്.

2015-ല്‍ ഹരാരെയില്‍ സിംബാബ്വെയ്ക്കെതിരെ അമ്പാട്ടി റായുഡുവും സ്റ്റുവാര്‍ട്ട് ബിന്നിയും ചേര്‍ന്ന് നേടിയ 160 റണ്‍സും, 2005-ല്‍ ഹരാരെയില്‍ സിംബ്ബ്വെയ്ക്കെതിരെ തന്നെ യുവരാജ് സിങ്ങും മഹേന്ദ്രസിങ് ധോണിയും ചേര്‍ന്ന് നേടിയ 158 റണ്‍സും കഴിഞ്ഞാല്‍ ഏകദിനത്തില്‍ ഇന്ത്യന്‍ സഖ്യത്തിന്റെ ഉയര്‍ന്ന മൂന്നാമത്തെ ആറാം വിക്കറ്റ് കൂട്ടുകെട്ട് കൂടിയാണ് ഇവരുടേത്.

50 ഓവറില്‍ 5 വിക്കറ്റ് നഷ്ടത്തില്‍ 302 നേടിയ ഇന്ത്യയ്‌ക്കെതിരെ 49.3 ഓവറില്‍ 289 റണ്‍സെടുക്കാനേ ഓസ്‌ട്രേലിയയ്ക്ക് കഴിഞ്ഞുള്ളൂ. മല്‍സരം ഇന്ത്യ 13 റണ്‍സിന് വിജയിച്ചു. പരമ്പര 2-1 ന് ഓസ്‌ട്രേലിയ സ്വന്തമാക്കി.