ശ്രീലങ്കയ്ക്കെതിരായ ആദ്യ ട്വന്റി-20യില് വെസ്റ്റിന്ഡീസ് നാല് വിക്കറ്റിന്റെ തകര്പ്പന് ജയം
ഒരു ഓവറില് ആറ് സിക്സറുകളുമായി കീറോണ് പൊള്ളാര്ഡ് നിറഞ്ഞാടിയപ്പോള് ശ്രീലങ്കയ്ക്കെതിരായ ആദ്യ ട്വന്റി-20യില് വെസ്റ്റിന്ഡീസ് നാല് വിക്കറ്റിന്റെ തകര്പ്പന് ജയം. ശ്രീലങ്ക ഉയര്ത്തിയ 131 റണ്സ് വിജയലക്ഷ്യം വിന്ഡീസ് 13.1 ഓവറില് ആറ് വിക്കറ്റ് നഷ്ടത്തില് മറികടന്നു.
വിന്ഡീസ് മുന്നിരയെ അകില ധനന്ജയയുടെ ഹാട്രിക്ക് തകര്ത്തുവെങ്കിലും താരത്തിനെ ഓവറില് ആറ് സിക്സറുകള്ക്ക് പറത്തി പൊള്ളാര്ഡ് ആക്രമിച്ചപ്പോള് വിജയം വിന്ഡീസിനൊപ്പമായി. ആദ്യം ബാറ്റ് ചെയ്ത ശ്രീലങ്ക ഒമ്പത് വിക്കറ്റ് നഷ്ടത്തില് 131 റണ്സെടുത്തു.
39 റണ്സ് നേടിയ പതും നിസങ്കയും 33 റണ്സ് നേടിയ നിരോഷന് ഡിക്ക്വെല്ലയുമാണ് ശ്രീലങ്കന് നിരയില് തിളങ്ങിയവര്. വിന്ഡീസിനായി പന്ത് എറിഞ്ഞവര് എല്ലാവരും വിക്കറ്റ് നേടി.
മറുപടി ബാറ്റിംഗില് പൊള്ളാര്ഡ്(11 പന്തില് 38), ജേസണ് ഹോള്ഡര്(29), ലെന്ഡല് സിമ്മണ്സ്(15 പന്തില് 26), എവിന് ലൂയിസ്(10 പന്തില് 28) എന്നിവരുടെ ബാറ്റിംഗാണ് തുണയായത്. ഒന്നാം വിക്കറ്റില് 52 റണ്സാണ് 3.2 ഓവറില് ലെന്ഡല് സിമ്മണ്സ്-എവിന് ലൂയിസ് കൂട്ടുകെട്ട് നേടിയത്.
ധനന്ജയ ലൂയിനെ പുറത്താക്കി തൊട്ടടുത്ത പന്തുകളില് ക്രിസ് ഗെയിലിനെയും നിക്കോളസ് പൂരനെയും പുറത്താക്കിയതോടെ ആതിഥേയര് മൂന്നിന് 52 എന്ന നിലയിലേക്ക് വീണു.
അതിനുശേഷം ധനന്ജയയുടെ മൂന്നാം ഓവറില് ആറ് സിക്സറുകള് പറത്തി പൊള്ളാര്ഡ് കളി മാറ്റിമറിക്കുകയായിരുന്നു.അന്താരാഷ്ട്ര ക്രിക്കറ്റില് ഒരു ഓവറില് ആറ് സിക്സുകള് പറത്തുന്ന മൂന്നാമത്തെ താരമാണ് പൊള്ളാര്ഡ്.
2007 ഏകദിന ലോകകപ്പില് ഹെര്ഷല് ഗിബ്സും 2007ലെ ട്വന്റി-20 ലോകകപ്പില് യുവരാജ് സിംഗും ആറ് സിക്സുകള് നേടിയിരുന്നു.
"
https://www.facebook.com/Malayalivartha