കാണികളെ ആവേശത്തിന്റെ കൊടുമുടിയില്‍ എത്തിച്ച അവസാന ഏകദിനത്തില്‍ ഇന്ത്യയെ നാല് റണ്ണിന് കീഴ്പെടുത്തി ദക്ഷിണാഫ്രിക്ക ഏകദിന പരമ്പര തൂത്തുവാരി. ടോസ് നഷ്ടപ്പെട്ട് ആദ്യം ബാറ്റിംഗിന് ഇറങ്ങിയ ദക്ഷിണാഫ്രിക്ക 49.5 ഓവറില്‍ 287ന് എല്ലാവരും പുറത്തായിരുന്നു. മറുപടി ബാറ്റിംഗില്‍ 49.2 ഓവറില്‍ 283 റണ്ണെടുക്കുമ്ബോഴേക്ക് ഇന്ത്യ ആള്‍ ഔട്ടായി.

34 പന്തില്‍ 54 റണ്ണടിച്ച ദീപക് ചാഹ‌ര്‍ ആയിരുന്നു അവസാന ഓവറുകളില്‍ ഇന്ത്യന്‍ പോരാട്ടം നയിച്ചത്. നേരത്തെ ദക്ഷിണാഫ്രിക്കയുടെ രണ്ട് വിക്കറ്റുകള്‍ വീഴ്ത്തി ബൗളിംഗിലും ചാഹര്‍ മികവ് തെളിയിച്ചിരുന്നു. ക്യാപ്ടന്‍ കെ എല്‍ രാഹുലിനെ തുടക്കത്തില്‍ തന്നെ നഷ്ടമായെങ്കിലും ശിഖര്‍ ധവാനും (61) വിരാട് കൊഹ്‌ലിയും (65) ചേര്‍ന്ന് വലിയ കേടുപാടുകള്‍ കൂടാതെ ഇന്ത്യയെ മുന്നോട്ട് കൊണ്ടുപോയി. എന്നാല്‍ ഇരുവരും പുറത്തായതോടെ ഇന്ത്യക്ക് അടിപതറുകയായിരുന്നു. അവസാന ഓവറുകളിലെ ദീപക് ചാഹറിന്റെ വെടിക്കെട്ട് ഇല്ലായിരുന്നെങ്കില്‍ ഇന്ത്യയുടെ അവസ്ഥ പരിതാപകരമാകുമായിരുന്നു.

നേരത്തെ ഓപ്പണര്‍ ക്വിന്റണ്‍ ഡി കോക്ക് (124) നേടിയ സെഞ്ചുറിയുടെ ബലത്തിലാണ് ദക്ഷിണാഫ്രിക്ക ഇന്ത്യക്കെതിരെ ഭേദപ്പെട്ട സ്കോര്‍ പടുത്തുയര്‍ത്തിയത്. ടോസ് നേടിയ ഇന്ത്യന്‍ ക്യാപ്ടന്‍ കെ എല്‍ രാഹുല്‍ ദക്ഷിണാഫ്രിക്കയെ ബാറ്റിംഗിന് അയയ്ക്കുകയായിരുന്നു. ക്യാപ്ടന്റെ പ്രതീക്ഷയ്ക്ക് അനുസരിച്ച്‌ ഭേദപ്പെട്ട തുടക്കമാണ് ബൗളര്‍മാര്‍ ഇന്ത്യക്ക് നല്‍കിയത്. ദക്ഷിണാഫ്രിക്കയുടെ സ്കോര്‍ എട്ടില്‍ എത്തിയപ്പോള്‍ തന്നെ ദീപക് ചഹാര്‍ ദക്ഷിണാഫ്രിക്കയ്ക്ക് ആദ്യ പ്രഹരം ഏല്‍പ്പിച്ചു. രണ്ടാം ഏകദിനത്തില്‍ തകര്‍ത്ത് കളിച്ച ഓപ്പണ‌ര്‍ ജന്നെമാന്‍ മലാനെ ചഹാറിന്റെ പന്തില്‍ വിക്കറ്റ് കീപ്പര്‍ റിഷഭ് പന്ത് പിടികൂടുകയായിരുന്നു. തുടര്‍ച്ചയായ ഇടവേളകളില്‍ വിക്കറ്റ് നഷ്ടമായികൊണ്ടിരുന്ന ദക്ഷിണാഫ്രിക്ക ഒരു ഘട്ടത്തില്‍ 70-3 എന്ന അവസ്ഥയിലായിരുന്നു. ക്യാപ്ടന്‍ ടെംബ ബാവുമ (8), എയിഡന്‍ മാര്‍ക്ക്റാം (15) എന്നിവരാണ് പുറത്തായത്.

അവിടെനിന്ന് ഡി കോക്കും (124) റാസി വാന്‍ ദെര്‍ ദുസനും (52) ചേ‌ന്നാണ് ദക്ഷിണാഫ്രിക്കയെ കരകയറ്റിയത്. ഇരുവരും ചേര്‍ന്ന് നാലാം വിക്കറ്റില്‍ 144 റണ്‍സ് കൂട്ടിച്ചേര്‍ത്ത് ദക്ഷിണാഫ്രിക്കയെ മത്സരത്തിലേക്ക് മടക്കി കൊണ്ടു വന്നു. എന്നാല്‍ ഇരുവരും അടുത്തടുത്ത ഓവറുകളില്‍ പുറത്തായതോടെ മികച്ച സ്കോര്‍ എന്ന ദക്ഷിണാഫ്രിക്കയുടെ സ്വപ്നം ഫലവത്തായില്ല. പിന്നാലെ എത്തിയ ബാറ്റ‌ര്‍മാരില്‍ 39 റണ്ണെടുത്ത ഡേവിഡ് മില്ലറും 20 റണ്ണെടുത്ത് ഡ്വെയ്ന്‍ പ്രിട്ടോറിയസും മാത്രമാണ് രണ്ടക്കം കടന്നത്. 18 എക്സ്ട്രാ റമ്ണുകളും ഇന്ത്യന്‍ ബൗള‌മാര്‍ സംഭാവനയായി നല്‍കി.

ഇന്ത്യന്‍ നിരയില്‍ മൂന്ന് വിക്കറ്റെടുത്ത പ്രസീദ് കൃഷണയും രണ്ട് വിക്കറ്റ് വീതം നേടിയ ദീപക് ചാഹറും ജസ്പ്രീത് ബുമ്രയും മികച്ച പ്രകടനം കാഴ്ചവച്ചു. യുസ്‌വേന്ദ്ര ചാഹല്‍ ഒരു വിക്കറ്റും സ്വന്തമാക്കി. രണ്ട് ദക്ഷിണാഫ്രിക്കന്‍ താരങ്ങള്‍ റണ്ണൗട്ടായി.