ദക്ഷിണാഫ്രിക്കയ്‌ക്കെതിരായ തോല്‍വി ഇന്ത്യക്ക് വലിയ പാഠമാണെന്ന് കോച്ച്‌ രാഹുല്‍ ദ്രാവിഡ്. ക്യാപ്റ്റനെന്ന നിലയില്‍ കെ എല്‍ രാഹുലിന്റെ പ്രകടനം മികച്ചതായിരുന്നുവെന്നും ദ്രാവിഡ് പറഞ്ഞു.

ഏകദിന പരമ്ബരയിലെ മൂന്ന് കളിയും തോറ്റെങ്കിലും കോച്ച്‌ രാഹുല്‍ ദ്രാവിഡ് പ്രതീക്ഷ കൈവിടുന്നില്ല. രോഹിത് ശര്‍മ്മ, ഹര്‍ദിക് പാണ്ഡ്യ, രവീന്ദ്ര ജേഡജ തുടങ്ങിയവുടെ അഭാവം തിരിച്ചടിയായി. സമ്മര്‍ദ്ദമില്ലാതെ അവസരം നല്‍കിയിട്ടും മധ്യനിര താരങ്ങള്‍ പ്രതീക്ഷയ്‌ക്കൊത്തുയര്‍ന്നില്ലെന്നും ദ്രാവിഡ് പറഞ്ഞു. അതേസമയം ക്യാപ്റ്റന്‍ കെ എല്‍ രാഹുലിന് പൂര്‍ണ പിന്തുണ നല്‍കുകയാണ് രാഹുല്‍ ദ്രാവിഡ്.

ടെസ്റ്റ് പരമ്ബര 2-1ന് കൈവിട്ട ഇന്ത്യ ഏകദിനത്തില്‍ കെ എല്‍ രാഹുലിന്റെ ക്യാപ്റ്റന്‍സിയില്‍ 3-0ന്റെ വൈറ്റ് വാഷിന് വിധേയരായിരുന്നു. കേപ്ടൗണില്‍ ഇന്നലെ നടന്ന അവസാന ഏകദിനത്തില്‍ നാല് റണ്‍സിനായിരുന്നു ഇന്ത്യയുടെ തോല്‍വി. പ്രോട്ടീസിന്റെ 287 റണ്‍സ് പിന്തുടര്‍ന്ന ഇന്ത്യ 49.2 ഓവറില്‍ 283 റണ്‍സിന് ഓള്‍റൗട്ടാവുകയായിരുന്നു.

2020ല്‍ ന്യൂസിലന്‍ഡിനെതിരെയാണ് ഇതിന് മുമ്ബ് ടീം ഇന്ത്യ സമ്ബൂര്‍ണ പരാജയം ഏറ്റുവാങ്ങിയത്. അന്ന് വിരാട് കോലിക്ക് കീഴില്‍ മൂന്ന് മത്സരങ്ങളുടെ പരമ്ബര തോല്‍ക്കുകയായിരുന്നു. ദക്ഷിണാഫ്രിക്കയില്‍ രണ്ടാം ടെസ്റ്റിലും ഏകദിന പരമ്ബരയിലും കെ എല്‍ രാഹുലാണ് ഇന്ത്യയെ നയിച്ചത്. നയിച്ച നാല് മത്സരങ്ങളിലും രാഹുല്‍ പരാജയം ഏറ്റുവാങ്ങിയതില്‍ വിമര്‍ശനം ശക്തമായിരുന്നു.